قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى اياسىندا 2018 جىلعى 14 قاراشا ساعات 11.00-دە (استانا ۋاقىتى بويىنشا) رەسپۋبليكا بويىنشا لاتىن گرافيكاسى نەگىزىندەگى «جالپىحالىقتىق ديكتانت» ءوتتى.

مادەنيەت جانە سپورت مينيسترلىگىنىڭ اقپاراتى بويىنشا، رەسپۋبليكالىق اكتسيا ەلىمىزدىڭ بارلىق وڭىرلەرىن قامتيدى جانە وعان شامامەن 2 ملن.قازاقستاندىق قاتىسادى. ديكتانت ءبىر ۋاقىتتا رەسپۋبليكا بويىنشا وڭىرلەردەگى تىلدەردى دامىتۋ باسقارمالارى دايىنداعان ارنايى اۋديتوريالاردا وتكىزىلەدى.

سونداي-اق قاشىقتىقتان قاتىسۋعا نيەت بىلدىرگەن رەسپۋبليكا تۇرعىندارى ءۇشىن ديكتانتتى تىڭداۋ ساعات 11.00-دە (استانا ۋاقىتى بويىنشا) «قازاق راديوسى»، «شالقار» راديولارىنىڭ تىكەلەي ەفيرىندە جانە emle.kz, tilalemi.kz سايتتارىندا قولجەتىمدى بولادى.

جالپىرەسپۋبليكالىق اكتسيا جاڭا قازاق ءالىپبيىن ناسيحاتتاۋعا، لاتىننەگىزدى قازاق ءالىپبيىن پراكتيكالىق تۇرعىدان مەڭگەرۋگە داعدىلاندىرۋعا باعىتتالعان.

شاراعا قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەديۇلى قاتىسىپ، جالپىحالىقتىق ديكتانت قاتىسۋشىلارعا ساتتىلىك تىلەدى.

قۇرمەتتى قاۋىم!

قازاقستان رەسپۋبليكاسىنىڭ پرەزيدەنتى – ەلباسى نۇرسۇلتان ءابىشۇلى نازارباەۆتىڭ قازاق ءتىلى ءالىپبيىن كيريلليتسادان لاتىن قارپىنە كوشىرۋ تۋرالى جارلىققا قول قويعانىن بارشا حالىق ىستىق ىقىلاسپەن قابىلدادى. بۇل ەلىمىزدەگى ەرەكشە ماڭىزدى شەشىمدەرىنىڭ ءبىرى بولدى.

رۋحاني جاڭعىرۋ – بۇل ءتول ادەبيەتىمىزدى، مادەنيەتىمىزدى جاڭعىرتۋ، ۇلتتىق سانانى وياتۋ.

ءالىپبيدىڭ العاشقى نۇسقاسىنا قوعام اراسىنداعى تالقىلاۋدان كەيىن وزگەرىستەر ەنگىزىلىپ، 2018 جىلعى 19 اقپانداعى №637 جارلىعىمەن جاڭا رەداكتسياداعى ءالىپبي نۇسقاسى بەكىتىلدى.

جازۋدى جاڭا الىپبيگە كوشىرۋدىڭ مادەني-الەۋمەتتىك، لينگۆيستيكالىق، ەكونوميكالىق، ساياسي، اقپاراتتىق، پەداگوگيكالىق سەبەپتەرى بار. وسى ورايدا، قازاق جازۋىن لاتىن گرافيكاسىنا كوشىرۋ دە مەزگىلى جەتكەن ماسەلە ەكەنىن قازىرگى قازاقستان قوعامىندا بولىپ جاتقان تالقىلاۋلار كورسەتىپ وتىر.

بۇگىنگى «جالپىحالىقتىق ديكتانتتى» ۇيىمداستىرۋداعى ماقساتىمىز - رەسپۋبليكا تۇرعىندارىنا جاڭا الىپبيدە تاڭبا عانا اۋىساتىنىن، قازاق دىبىستارى سول كۇيىندە قالاتىنىن ءتۇسىندىرۋ، جازۋ داعدىسىنا بەيىمدەلۋ.

ديكتانتتىڭ ەرەكشەلىگى سول رەسپۋبليكا بويىنشا بارلىق ازاماتتاردىڭ قاتىسۋ ەركىندىگىندە.

حالىق پراكتيكالىق تۇرعىدا سەزىنگەندە عانا الدىمىزدا تۇرعان قازاق ءالىپبيىن لاتىن گرافيكاسىنا كوشىرۋ جۇمىستارىنىڭ ماڭىزدىلىعىن تۇسىنەدى.

وسى جالپىحالىقتىق شاراعا ءبارىمىز ات سالىسىپ، جاڭا تاڭبالارمەن جازۋىمىزدى باستايىق!

سونىمەن قاتار قازاقستان رەسپۋبليكاسى مادەنيەت جانە سپورت مينيسترلىگىنىڭ جالپىحالىقتىق ديكتانتتى وتكىزۋ باستاماسىن بەلگىلى قوعام قايراتكەرلەرى، جازۋشىلار، عالىمدار، سپورتشىلار، سونىمەن قاتار مادەنيەت جانە ونەر سالاسىنىڭ تۇلعالارى دا قولداپ وتىر.

قازاقستان رەسپۋبليكاسى ۇلتتىق اكادەميالىق كىتاپحاناسىندا ديكتانتقا بەلگىلى قوعام قايراتكەرى، اقىن-جازۋشىلار روزا مۇقانوۆا، قونىسباي ءابىلوۆ، قازاقستاندىق ارتىستەر مايرا مۇحامەدقىزى تۇرار الىپباەۆ، نۇربولات ارزاماس، باقتيار ادامجان، سپورتشىلاردان ۇلان رىسقۇل، سەرىك اقتاەۆ، ايبەك ورالباي، ايگەرىم ابىلقادىروۆا جانە باسقا دا بەلگىلى مادەنيەت جانە ونەر قايراتكەرلەرى قاتىسادى.

ديكتانتتىڭ تاقىرىبى – «رۋحاني جاڭعىرۋ» باعدارلاماسى. ءماتىن 80-گە جۋىق سوزدەن تۇرادى. ديكتانت اياقتالعاننان سوڭ ءماتىننىڭ جازباشا نۇسقاسى emle.kz, tilalemi.kz سايتتارىندا جاريالانىپ، ءار قاتىسۋشى ءوزىنىڭ جاڭا قازاق ءالىپبيىن مەڭگەرۋ دەڭگەيىن تەكسەرە الادى.

Abai.kz