كەشە ماسكەۋدەن جەتكەن سۋىت حابار ەلىمىزدىڭ اۋىلشارۋاشىلىق ءونىمىن وندىرۋشىلەردى ابدىراتىپ تاستادى. رەسەي اۋىل شارۋاشىلىعى مينيسترلىگى ۆەتەرينارلىق جانە فيتوسانيتارلىق قاداعالاۋ فەدەرالدى قىزمەتىنىڭ حابارلاۋىنشا، ورىستاردىڭ قازاقستاننان قۇس ەتىنىڭ تاسىلۋىنا تىيىم سالعانى بەلگىلى بولدى. شەكتەۋ مۇنىمەن عانا شەكتەلمەيدى. قازاقستاننىڭ ون وبلىسىنان ەت جانە ەت ونىمدەرىن رەسەيگە اپارۋعا تاعى دا توسقاۋىل قويىلدى.
رەسەيلىك «ينتەرفاكس» اگەنتتىگى تاراتقان اقپاراتقا قاراعاندا، قازاقستاننان باراتىن تاۋىق ەتىنە تىيىم سالىنۋىنا رەسەيگە ءبىزدىڭ ەلدەن ەت ءونىم وتە مول تاسىمالدانا باستاۋى سەبەپ بولىپ وتىر. بۇل – قازاقستان اۋماعىنا شەتەلدەردەن، ونىڭ ىشىندە كۇماندى ەلدەردەن كەلگەن يمپورتتىق تاۋىق ەتىنىڭ رەسەيگە ءوتىپ كەتۋى مۇمكىن دەگەن كۇدىك تۋدىرىپ وتىرسا كەرەك. ال قازاقستاننىڭ 10 وبلىسىنان مال ەتىنىڭ تاسىمالدانۋىنا تىيىم سالۋعا ەپيزووتيكالىق قاتەر سەبەپ بولىپ وتىر. اتاپ ايتقاندا، رەسەي ۆەتەرينارلىق جانە فيتوسانيتارلىق قاداعالاۋ قىزمەتىنىڭ «قارا تىزىمىنە» ىلىككەن 10 وبلىس مىناۋ: اقتوبە، الماتى، اتىراۋ، شىعىس قازاقستان، جامبىل، باتىس قازاقستان، قاراعاندى، قىزىلوردا، پاۆلودار، وڭتۇستىك قازاقستان.
وسىعان وراي شۇعىل تۇسىنىك بەرگەن قازاقستاننىڭ اۋىل شارۋاشىلىعى مينيسترلىگى اگروونەركاسىپ كەشەنىندەگى مەملەكەتتىك ينسپەكتسيا كوميتەتىنىڭ توراعاسى سەرىك سۇلەيمەنوۆتىڭ ايتۋىنشا، 2007 جىلى ەلىمىزدىڭ بىرقاتار وبلىستارىندا اۋسىل اۋرۋىنىڭ تارالۋىنا بايلانىستى مال ەتىنىڭ بارلىق تۇرلەرىن كورشى مەملەكەتتەرگە شىعارۋعا شەكتەۋ قويىلعان بولاتىن. الايدا مەجەلى 12 اي مەرزىم وتكەن سوڭ ەلىمىزگە حالىقارالىق ەپيزووتيكالىق بيۋرو وكىلدەرى شاقىرىلىپ، ناتيجەسىندە قازاقستاننىڭ ءۇش وبلىسىنىڭ رەسەيگە ەت ونىمدەرىن ەكسپورتتاۋىنا رۇقسات بەرىلەدى. وعان دەيىن ەلىمىزدە اۋسىلدى جويۋعا بايلانىستى بارلىق شارالار اتقارىلعان. كەيىنىرەك رەسەي ماماندارى تاعى دا ينسپەكتورلىق زەرتتەۋ جۇمىستارىن جۇرگىزىپ، ناتيجەسىندە ماڭعىستاۋ وبلىسىنان دا ەت ەكسپورتتاۋعا قايتا جول اشىلادى. ال رەسەي ۆەتەرينارلىق جانە فيتوسانيتارلىق قاداعالاۋ قىزمەتىنىڭ كەشەگى مالىمدەمەسى تۇسىنىكسىز…
2006 جىلى رەسەي پولشادان ەت اكەلۋگە تىيىم سالعاندا، وعان ساياساتكەرلەردىڭ تۇز بەن بۇرىشتى جاقسىلاپ قوسقانىن ەشكىم ۇمىتقان جوق شىعار…

بەسبوعدا التاي
«الاش ايناسى» گازەتى 12 ماۋسىم 2009 جىل