مەملەكەت باسشىسى وزبەكستاننىڭ ولي ءماجىلىسى زاڭ شىعارۋ پالاتاسىنىڭ سپيكەرى نۋردينجون يسمويلوۆپەن كەزدەستى. بۇل تۋرالى اقوردانىڭ رەسمي سايتى حابارلادى.

نۇرسۇلتان نازارباەۆ قازاقستان مەن وزبەكستان اراسىنداعى ەكى جاقتى قارىم-قاتىناستاردىڭ وڭ قارقىنمەن دامىپ كەلە جاتقانىن ەرەكشە اتاپ ءوتتى.

– بۇگىندە ءوزارا قارىم-قاتىناستارىمىز جوعارى دەڭگەيدە. ءبىز شاۆكات ميرزيوەۆپەن جىلىنا بىرنەشە رەت كەزدەسىپ، ەكونوميكالىق جانە ساياسي ىنتىماقتاستىق سالاسىنداعى وزەكتى ماسەلەلەردىڭ ءبارىن تالقىلاپ كەلەمىز. قابىلدانعان قۇجاتتار مەن قول جەتكىزىلگەن ۋاعدالاستىقتاردى جۇزەگە اسىرۋ ىسىندە ەكى مەملەكەتتىڭ پارلامەنتتەرى ماڭىزدى ءرول اتقارادى، – دەدى قازاقستان پرەزيدەنتى.

نۋردينجون يسمويلوۆ وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ سالەمىن جەتكىزىپ، ەكى ەل پارلامەنتتەرى اراسىندا وتكەن كەلىسسوزدەردىڭ ناتيجەلەرى جونىندە ايتتى.

– شىن مانىندە، سوڭعى ۋاقىتتا وزبەكستان مەن قازاقستان اراسىنداعى ىنتىماقتاستىق جوعارى دەڭگەيگە جەتتى. بۇعان، ەڭ الدىمەن، وزبەكستان مەن قازاقستان بايلانىسىنىڭ جاڭا كەزەڭىنە جول اشقان ەكى مەملەكەتتىڭ پرەزيدەنتتەرى اراسىنداعى دوستىق قارىم-قاتىناستاردىڭ ارقاسىندا قول جەتكىزىلدى. سىزدەر حالىقتارىمىزدىڭ ىنتىماق پەن كەلىسىم اياسىندا بىرلەسە ءومىر سۇرسەك دەگەن وي-نيەتىن جۇزەگە اسىردىڭىزدار. سول ءۇشىن سىزدەرگە زور العىس ايتامىز، – دەدى وزبەكستاننىڭ ولي ءماجىلىسى زاڭ شىعارۋ پالاتاسىنىڭ سپيكەرى.

Abai.kz