ەلباسى “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ”اتتى قازاقستان حالقىنا ارناعان جولداۋىندا جاڭادان قۇرىلعان تۇركىستان وبلىسىنا ۇلكەن كوڭىل ءبولۋ قاجەتتىگىن باسا ايتقان بولاتىن.

وسىعان وراي، تۇركىستان وبلىسىنىڭ اكىمى جانسەيىت تۇيمەباەۆ وڭىردەگى بىرقاتار ساۋلەتشىلەرمەن كەزدەسىپ، تۇركىستان قالاسىن دامىتۋ ماسەلەسىن جان-جاقتى تالقىلادى.

ايماقتىڭ ءباسپاسوز قىزمەتىنەن ءمالىم ەتكەندەي، جيىن بارىسىندا جانسەيىت تۇيمەباەۆ تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ بويىنشا باس جوسپار تۇجىرىمداماسىن ازىرلەۋ كونكۋرسى ۇيىمداستىرىلعانىن اتاپ ءوتتى.

«قالامىزدى تۋريستىك ورتالىققا اينالدىرۋ ماقساتىندا ۇيىمداستىرىلعان بايقاۋعا وتاندىق جانە شەتەلدىك ماماندار قاتىستى. اتاپ ايتقاندا، تۇركيا، وڭتۇستىك كورەيا، وزبەكستان ەلدەرىنەن 42 كاسىبي ساۋلەتشىلەر باقتارىن سىنادى. بىراق، حاتتاماعا سايكەس 22 جوبا جولداندى. ولارعا قويىلىپ وتىرعان باستى تالاپ، قالاداعى جاڭا قۇرىلىس ساۋلەت ءستيلى جەرگىلىكتى ۇلتتىق سالت-داستۇرگە ساي بولۋى ءتيىس. سونداي-اق، قالانىڭ بارلىق تۇسىنان قوجا احمەت ياساۋي كەسەنەسى كورىنىپ تۇرۋى كەرەك. مۇنىمەن ماسەلە شەشىلمەيدى. تۇركىستان وبلىسىنىڭ قارىشتاپ دامۋى ءبىزدىڭ ەرەن ەڭبەگىمىزگە تىكەلەي بايلانىستى. سوندىقتان، ەل ەرتەڭى ءۇشىن، بالالارىمىزدىڭ بولاشاعى ءۇشىن ورتاق جۇمىستاردى اتقارىپ، جان-جاقتى قوسىلۋىمىز قاجەت»، - دەدى جانسەيىت تۇيمەباەۆ.

سونداي-اق، وبلىس اكىمى تۇركىستان قالاسىندا ەلباسىنىڭ ۇسىنىسىمەن بىرقاتار ۇلتتىق كومپانيا، بيزنەس وكىلدەرى مەن شەتەلدىك ينۆەستورلار 30-عا جۋىق الەۋمەتتىك جانە كاسىپكەرلىك نىسان سالاتىنىن جەتكىزدى. ودان بولەك، جوبا اياسىندا تۋريستەر مەن جەرگىلىكتى حالىققا قىزمەت كورسەتەتىن مەيرامحانالار، ءدامحانالار مەن ارباتتار سالىنباق.

بۇگىندە بوي كوتەرەتىن نىسانداردىڭ ەسكيزدىك جوبالارىنا حالىقارالىق كونكۋرس جاريالانعان. ءوڭىر باسشىسى ساۋلەتشىلەردى قالانى دامىتۋعا بايلانىستى ۇسىنىس بىلدىرۋگە جانە جاريالانعان بايقاۋعا بەلسەندى قاتىسۋعا شاقىردى.

Abai.kz