ەلباسى ن.نازارباەۆ قازاقستان حالقىن باسپانامەن قامتاماسىز ەتۋ ماقساتىندا “7-20-25” اتتى باعدارلاماسىن قابىلداعان بولاتىن. سونداي-اق، “قازاقستاندىقتاردىڭ ءال-اۋقاتىنىڭ ءوسۋى:تابىس پەن تۇرمىس ساپاسىن ارتتىرۋ” اتتى حالىققا جولداۋىندا دا بۇل ماسەلەگە باسا نازار اۋدارىلدى.

جولداۋدان كەيىن وسى ماسەلەگە وراي تۇركىستان وبلىسىنىڭ اكىمى جانسەيىت تۇيمەباەۆ «تۇرعىن ءۇي قۇرىلىس جيناق بانكى» اق-نىڭ وڭتۇستىك فيليالى ديرەكتورى قۇدايبەرگەن سەيتمامبەتوۆپەن كەزدەستى. تاراپتار «نۇرلى جەر» مەملەكەتتىك تۇرعىن ءۇي باعدارلاماسىنىڭ باعىتتارىن ءسوز ەتىپ، كرەديتتىك تۇرعىن ءۇي قۇرىلىسىن دامىتۋ ماسەلەلەرىن تالقىلادى

كەزدەسۋ بارىسىندا قولجەتىمدى باسپانا ماسەلەسىن شەشۋ جاعدايلارى ءسوز بولدى. اتالعان بانكتىڭ وڭىرلىك جەتەكشىسى سالاداعى اتقارىلعان بىرقاتار جۇمىستاردىڭ بارىسىن بايانداپ، الداعى جوسپارلارىمەن ءبولىستى. بۇگىنگى تاڭدا «تۇرعىن ءۇي قۇرىلىس جيناق بانكى» اق-نىڭ وڭتۇستىك فيليالى «باسپانا» مەكەمەسىمەن قول قويۋ شارالارىن جۇرگىزۋدە. اعىمداعى جىلدىڭ 1-ءشى جەلتوقسانىنان باستاپ بانك ۇجىمى «7-20-25» باعدارلاماسى بويىنشا ءتيىستى جۇمىستاردى ىسكە اسىرا باستايدى.

سونىمەن بىرگە، باسقوسۋدا قۇدايبەرگەن سەيتمامبەتوۆ اكىمگە وبلىس تۇرعىندارى ءۇشىن وتە ءتيىمدى دە، ىڭعايلى بولاتىن ۇسىنىسىن جەتكىزدى. العاشقى سالىمسىز-اق، باسپانالى بولۋعا بولاتىن جوبادا قاراپايىم حالىقتىڭ جاعدايى ەسكەرىلگەن. مۇنان بولەك، بانك وكىلدەرى اكىمدىك تاراپىنان تۇرعىن ءۇي قۇرىلىس جيناق جۇيەسى بويىنشا ءتۇسىندىرۋ جۇمىستارىن جۇرگىزۋدە قولداۋ كورسەتۋدى سۇرادى.

وسىناۋ ۇسىنىس، تىلەكتەرگە قانىققان ايماق باسشىسى، ەڭ باستىسى، باسپانالاردىڭ قولجەتىمدى بولۋى قاجەتتىگىن اتاپ ءوتتى. «7-20-25» باعدارلاماسىن وڭىردە مىقتاپ قولعا الۋ ءۇشىن تۇسىندىرمە جۇمىستارىن كەڭىنەن جۇرگىزۋدى ءتيىستى باسقارما باسشىلارىنا تاپسىردى.

ايتا كەتەيىك، اعىمداعى جىلى «7-20-25» باعدارلاماسىن وبلىستا ىسكە اسىرۋ ماقساتىندا تۇركىستان قالاسىندا قۇرىلىس كومپانياسى «تۇركىستان» اكك» اق-ى ارقىلى 6 كوپقاباتتى تۇرعىن ءۇيدىڭ (288 پاتەر، 15,6 مىڭ ش.م.) قۇرىلىسىن باستاعان بولاتىن. بۇل پاتەرلەردى 2019 جىلى پايدالانۋعا تاپسىرۋ جوسپارلانىپ، بارلىق ۇيلەردى «7-20-25» باعدارلاما ارقىلى تاراتۋ كوزدەلۋدە. «7-20-25» باعدارلاماسى ارقىلى سالىنعان تۇرعىن ۇيلەردى تاراتۋ وبلىستىڭ ەنەرگەتيكا، تۇرعىن ءۇي-كوممۋنالدىق شارۋاشىلىق باسقارماسى ارقىلى جۇرگىزىلەدى. سونىمەن قاتار، «تۇرعىن ءۇي قۇرىلىس جيناق بانكى» اق باسشىلىعىنىڭ مالىمەتىنە سايكەس 2019 جىلى وبلىس ورتالىعى - تۇركىستان قالاسىندا بانكتىڭ وبلىستىق فيليالى اشىلاتىن بولادى.

Abai.kz