ەلباسى ن.نازارباەۆ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا شەت ەل ينۆەستورلارىن كوپتەپ تارتۋدىڭ تيىمدىلىگىنە توقتالعان ەدى.

وسىعان وراي، تۇركىستان وبلىسىنىڭ اكىمى جانسەيىت تۇيمەباەۆ «حايۆيلل قازاقستان» كومپانياسىنىڭ باس ديرەكتورى دجون دە كانگتى قابىلداعان بولاتىن. كەزدەسۋدە تاراپتار ەكىجاقتى ارىپتەستىكتى كۇشەيتىپ، تۇركىستان قالاسىن دامىتۋ ماسەلەلەرىن ءسوز ەتكەن.

«حايۆيلل قازاقستان» كومپانياسىنىڭ باس ديرەكتورى دجون دە كانگ تۇركىستان قالاسىندا ءتۇرلى الەۋمەتتىك نىساندار مەن كوپقاباتتى ۇيلەر سالۋعا نيەتتى ەكەنىن جەتكىزدى. ال، ءوڭىر باسشىسى قۇرىلىس سالاسىندا وزىندىك ورنى بار كورەيالىق كومپانيامەن بىرلەسىپ جۇمىس ىستەۋگە دايىن ەكەنىن جەتكىزدى.

«تۇركىستان قالاسىن دامىتۋ ەلباسىمىز نۇرسۇلتان نازارباەۆتىڭ تىكەلەي باقىلاۋىندا تۇر. الدىمىزدا اۋقىمدى مىندەتتەر بار. قازىردىڭ وزىندە تۇركىستاندا عيماراتتار سالۋعا كوپتەگەن كومپانيالار قىزىعۋشىلىق تانىتىپ جاتىر. سىزدەردى دە بىرگە جۇمىس ىستەۋگە شاقىرامىز. كەلىسسوزىمىز ءساتتى اياقتالسا، جەر بەرىلىپ، ينفراقۇرىلىم تارتىلادى. زامان تالابىنا ساي نىسانداردى سالۋعا مۇمكىندىكتەرىڭىز بار»، - دەدى جانسەيىت تۇيمەباەۆ.

كەزدەسۋدە وبلىس اكىمدىگى مەن كومپانيا باسشىلىعى الداعى ۋاقىتتا دا كەلىسسوزدەردى جالعاستىرۋ جونىندە ۋاعدالاستى. جيىننان سوڭ كورەيالىق كومپانيا وكىلدەرى تۇركىستان قالاسىن دامىتۋ جونىندەگى جوبالار مەن جوسپارلارمەن تانىستى.

Abai.kz