ەلباسى ن.نازارباەۆتىڭ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىۋ” اتتى قازاقستان حالقىنا ارناعان جولداۋىندا جاڭا مەكتەپتەر، بالاباقشالار، اۋرۋحانالار قۇرىلىسىن ەلدى مەكەندەردى دامىتۋ جوسپارلارىمەن ۇشتاستىرۋ قاجەت، سونداي-اق، بۇل سەكتورعا جەكە ينۆەستورلاردى تارتۋ ءۇشىن جاعداي جاساعان ءجون, - دەپ اتاپ كورسەتكەن بولاتىن. وسىعان وراي، تۇركىستان وبلىسى، كەلەس اۋدانىندا ءۇش تىلدە ءبىلىم بەرەتىن بالاباقشا اشىلعان بولاتىن.

بىرتىرەك اۋىلدىق وكرۋگىنىڭ ەڭبەكشى ەلدى مەكەنىندە ورنالاسقان بوبەكجاي ەلباسىنىڭ «رۋحاني جاڭعىرۋ» باعدارلاماسىنىڭ «تۋعان جەر» جوباسى شەڭبەرىندە ىسكە اسىرىلدى.

مەملەكەتتىك-جەكەمەنشىك ارىپتەستىك اياسىندا پايدالانۋعا بەرىلگەن نىساندى جەرگىلىكتى كاسىپكەر ءوز قارجىسىنا سالعىزىپ، تۋعان اۋىلىنا تارتۋ ەتكەن. جوبالىق سمەتالىق قۇنى 30 ملن تەڭگە. 200 ورىنعا لايىقتالعان بالاباقشادا 36 ادام جۇمىس ىستەيدى. ولاردىڭ بارلىعى جەرگىلىكتى تۇرعىندار. پسيحولوگ، دەفەكتولوگ ماماندارى دا بار. مۇندا بالالاردىڭ الاڭسىز ويناپ، جان-جاقتى بولىپ قالىپتاسۋى ءۇشىن بارلىق جاعداي جاسالعان. ويىن، ءان-كۇي، جاتىن بولمەلەرى دە زامانعا ساي قاجەتتى جابدىقتارمەن قامتىلعان.

جالپى كەلەس اۋدانىندا مەكتەپكە دەيىنگى ءبىلىم بەرەتىن 67 بالاباقشا بار. ونىڭ 47-ءسى جەكەمەنشىك، 12-ءسى مەملەكەتتىك، قالعان 8-ءى شاعىن ورتالىقتار.

بالاباقشا قۇرىلتايشىسى جايىق ورازباەۆتىڭ ايتۋىنشا، بۇگىندە بۇل بوبەكجاي ءۇش تىلدە ءبىلىم بەرىپ جاتىر ەكەن. سونىمەن قاتار، مۇندا قول ونەر ءبولىمى مەن بي بولىمدەرى جۇمىس ىستەيدى. جانە ءۇش مەزگىل تاماق بەرىلەدى. ال، اتا-انالار ايىنا 5 مىڭ تەڭگەدەن تولەيدى ەكەن.

Abai.kz