ەلباسى نۇرسۇلتان نازارباەۆ جاڭادان قۇرىلعان تۇركىستان وبلىسىنا ەرەكشە ءمان بەرىپ وتىرعانى بەلگىلى. وڭىردەگى ءار سالانىڭ دامۋى مەن شەشىلۋى ءتيىس ماسەلەلەردى ءجىتى نازارعا الىپ وتىرعان پرەزيدەنت، وڭىردەگى تۋريزم سالاسىنا دا ايرىقشا كوڭىل ءبولىپ وتىر.

وسىعان سايكەس، جۋىردا  قر سىرتقى ىستەر مينيسترلىگى تاراپىنان ۇيىمداستىرىلعان پرەسس-تۋر اياسىندا 8 شەتەلدىك جۋرناليست تۇركىستاندا بولعان ەدى.

سولاردىڭ ءبىرى، يندونەزيالىق «Indonesia Tatler» باسىلىمىنىڭ ءجۋرناليسى ليۆياني سينتيانا تۇركىستان — قازاقستاننىڭ «جاسىرىن قالعان جاۋھارى» دەپ ەسەپتەيدى.

ساپار بارىسىندا شەتەلدىك «The Calvert Journal» (ۇلىبريتانيا), «Saga Magazine» (ۇلىبريتانيا), «AGIR» (يتاليا), «Agora Vox le media» (فرانتسيا), «Turystyka» (پولشا), Global Times» (قىتاي), «Indonesia Tatler» (يندونەزيا), «International Policy Digest» (كورەيا) تىلشىلەرى قازاقستان حالقىنىڭ ماتەريالدىق جانە رۋحاني مادەنيەتىنە، سونداي-اق ءتۋريزمدى دامىتۋ ماسەلەلەرىنە باسا نازار اۋداردى. جۋرناليستەر ساياحاتىنىڭ باعدارلاماسى استانا، الماتى جانە تۇركىستان قالالارىنىڭ مادەني جانە تاريحي مەكەمەلەرىن، تاريحي ەسكەرتكىشتەر مەن باستى تۋريستىك كورىكتى جەرلەرىنە ساپار جاساۋدى قامتيدى. استانادا جۋرناليستەرگە ارناپ قازاق حالقىنىڭ ءداستۇرلى ۇلتتىق مادەنيەتى مەن مودەرن ەلەمەنتتەرى ۇيلەسكەن باعدارلاما ازىرلەندى.

ولاردىڭ ايتۋىنشا، قازاق ۇلتتىق ونەر ۋنيۆەرسيتەتى ستۋدەنتتەرىنىڭ قازاق ۇلتتىق مۋزىكالىق اسپاپتارىندا ورىنداعان كۇيلەرى مەن اندەرى ۇمىتىلماس اسەر قالدىردى. «استانا وپەرا» تەاترىندا وپەرالىق انشىلەر مەن تەاتر وركەسترىنىڭ دايىندىقتارىن ەرەكشە ىقىلاسپەن باقىلادى.

«Ballet Academy» قازاق ۇلتتىق حورەوگرافيا اكادەمياسىندا بالەتتەگى جاس ارتىستەردىڭ ونەرىن تاماشالادى. سونداي-اق «ەكسپو-2017» حالىقارالىق مامانداندىرىلعان كورمەسىنىڭ قازاقستاندىق پاۆيلونىن، ۇلتتىق مۋزەي مەن «حان شاتىر» ساۋدا جانە ويىن-ساۋىق ورتالىعىن ارالادى.

تۇركىستانعا ساپار بارىسىندا جۋرناليستەر ەجەلگى وتىرار قالاسى، قوجا احمەت ياساۋي، گاۋحار انا كەسەنەسى جانە ت.ب. تاريحي جانە مادەني مۇرا نىساندارىن ارالادى.

ساپار اياسىندا ولاردى تۇركىستان وبلىسىنىڭ اكىمى جانسەيىت تۇيمەباەۆ قابىلداپ، تۇركىستان قالاسىنىڭ ەرەكشە ورنى مەن ايماقتىڭ دامۋى تۋرالى ەجگەي-تەگجەيلى ايتىپ بەردى. مەيماندار ءۇشىن قازاق حالقىنىڭ تۇرمىسى مەن سالتىن كورسەتەتىن ارنايى مادەني-اعارتۋشىلىق باعدارلاما دايىندالدى.

ال الماتىعا ساپار كەزىندە ءا. قاستەەۆ اتىنداعى مەملەكەتتىك ونەر مۋزەيىن ارالاپ، يۋنەسكو-نىڭ رەپرەزەنتاتيۆتى تىزىمىنە ەنگەن مادەني مۇرانىڭ ەلەمەنتتەرىمەن تانىستى، ءداستۇرلى مۋزىكانىڭ مۋلتيمەديالىق ورتالىعى مەن «Qazaq-Oner» قولونەرشىلەر ورتالىعىنىڭ قىزمەتىن كوردى. سونداي-اق، جۋرناليستەر شارىن كانونى، شىمبۇلاق جانە كوكتوبە سەكىلدى كورىكتى جەرلەردە بولىپ قايتتى.

يندونەزيالىق جۋرناليست ل. سينتيانا ءۇشىن پرەسس-تۋردىڭ ەڭ ەستە قالارلىق ءساتى تۇركىستانعا ساپار بولعانىن ايتپا كەتكەن ءجون. «مەن بارلىق دوستارىمدى جانە وتانداستارىمدى بۇل وتە كەرەمەت جانە اسا قوناقجاي ادامدارى بار ەجەلگى قالاعا ساپار شەگۋگە مىندەتتى تۇردە شاقىراتىن بولامىن»، — دەپ اتاپ ءوتتى ول.

پولشادان كەلگەن جۋرناليست اننا كلوسسوۆسكا قازاقستاندا وتكىزگەن ءاربىر كۇن توسىن سىيعا تولى بولعاندىعىن جەتكىزدى. «مەن ءوزىم ءۇشىن بۇل كوپەتنيكالىق حالىقتىڭ باي جانە سان الۋان مادەنيەتى مەن سالت-ءداستۇرىن اشتىم.

باتىستىڭ باق-تارى استانانى دۋبايمەن سالىستىرىپ جاتادى، الايدا مەن استانا تەك زاماناۋي عيماراتتار ەمەس ەكەندىگىن ايتقىم كەلەدى. قالانىڭ وزىندىك رۋحى بار، ول ۇلتتىق ناقىشتاعى ديزاينمەن كوركەمدەلگەن فاسادتاردا كورىنىس تابادى»، — دەپ اتاپ ءوتتى ول. «The Calvert Journal» اتتى بريتاندىق باسىلىمنىڭ ءجۋرناليسى ناديا بەرد بۇل پرەسس-تۋردى ەلدىڭ مادەنيەتى جانە تاريحي مۇراسىمەن تانىسۋ ءۇشىن تاماشا مۇمكىندىك بولعاندىعىن اتاپ ءوتتى.

«بۇل ساپار بارىسىندا ءبىز قازاقستاندىق حالىقتىڭ تەك مادەنيەتىنىڭ الۋاندىعىنا ەمەس، سونىمەن قاتار سان الۋان تابيعاتى مەن ساۋلەتىنە كۋا بولدىق. جالپى ايتقاندا جاڭانى، ەسكىنى جانە ءداستۇرلى زاتتاردى كورگەن كەرەمەت بولدى دەپ ويلايمىن»، — دەپ اعىنان اقتارىلدى بريتاندىق جۋرناليست.

«جاھاندىق الەمدەگى زاماناۋي قازاقستاندىق مادەنيەت» اتتى جوبا اياسىندا جۇزەگە اسىرىلعان ءۇشىنشى پرەسس-تۋر، سونداي-اق ءتۋريزمدى دامىتۋعا جانە جالپى قازاقستاننىڭ سەرپىندى تۇردە دامىپ وتىرعان مەملەكەت رەتىندەگى ءيميدجىن قالىپتاستىرۋعا باعىتتالعان.

Abai.kz