ەلباسى نۇرسۇلتان نازارباەۆ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا اۋىلشارۋشالىعى سالاسىنا ايرىقشا نازار اۋدارعانى بەلگىلى. سونداي-اق، وسى سالانى جان-جاقتى دامىتۋ ءۇشىن ناقتى تاپسىرمالار دا بەرىلگەن بولاتىن.

وسىعان سايكەس، تۇركىستان وبلىسىنداعى اگروونەركاسىپتىك كەشەندەر تسيفرلىق فورماتقا كوشە باستادى. ماسەلەن، سارىاعاش اۋدانىندا اۆتوماتتاندىرىلعان جۇيە ەنگىزىلگەن جىلىجاي جۇمىس ىستەيدى. قىزاناق وسىرۋمەن اينالىساتىن شارۋاشىلىق جاڭا تەحنولوگيانى ەنگىزۋ ارقىلى ءونىم كولەمىن ەكى ەسەگە دەيىن ارتتىرىپتى.

اۋماعى 7 گەكتار بولاتىن القاپتا جىلىنا ەكى رەت ءونىم جينالادى. العاشقى كوشەت اقپان ايىندا وتىرعىزىلىپ، ونىڭ ءونىمى مامىر-ماۋسىم ايلارىندا جينالادى. ەكىنشى رەت تامىزدا قايتا ەگىلىپ، قازان مەن قاراشا ايلارىندا جيىن-تەرىم جۇمىستارى باستالادى. قىزاناق جيناۋدىڭ دا جۇرتشىلىق بىلە بەرمەيتىن وزىندىك ەرەجەلەرى مەن تالاپتارى بار.

قازىر مۇندا 40-قا جۋىق قىز-كەلىنشەك تەرىم جۇمىسىنا قاتىسۋدا. ولاردىڭ الدى كۇنىنە 50-دەن 100 قوراپقا دەيىن ءونىم جينايدى. قازىر بۇل جىلىجايدا قىزاناق تەرۋ جۇمىستارى قارقىندى جۇرگىزىلىپ جاتىر. وسىنداعى مامانداردىڭ ايتۋىنشا، ءاربىر تۇپتەن 7-8, ءتىپتى 10 كگ دەيىن ءونىم الۋعا بولادى. جينالعان دايىن ءونىم قوراپتارعا سالىنىپ، قويماعا جەتكىزىلەدى. جاڭا تەحنولوگياعا يەك ارتقان ديقاندار ونىڭ يگىلىگىن دە كورە باستاپتى. قازىر 1 گەكتاردان 100 توننا ءونىم جيناۋدا. دەمەك، 7 گەكتاردان 700 توننا قىزاناق تەرىلەدى. سوندا جىلىنا 1400 توننا ءونىم الىنادى. دايىن ءونىمنىڭ 70 پايىزى ەلىمىزدىڭ وزگە وبلىستارىنا جونەلتىلسە، قالعان 30 پايىزى رەسەيگە ەكسپورتتالادى. قازىر جىلىجاي ىشىندەگى اۋا بىرقالىپتى تەمپەراتۋرانى ۇستاپ تۇرادى. ەگەر شامادان تىس ىسي باستاسا، اۆتوماتتى جۇيە بىردەن ىسكە قوسىلىپ، جىلىجاي تەرەزەلەرى اشىلادى.

جالپى، وبلىستاعى جىلىجايلاردىڭ 55 پايىزى وسى سارىاعاش اۋدانىنا تيەسىلى. ال رەسپۋبليكاداعى جىلىجايلاردىڭ 80 پايىزى تۇركىستان وبلىسىنىڭ اۋماعىندا ورنالاسقانىن ەسكەرسەك، جاڭا تەحنولوگيالاردى ەنگىزۋ ارقىلى ءونىم كولەمىن ارتتىرۋعا تولىق مۇمكىندىك بار.

Abai.kz