ەلباسى نۇرسۇلتان نازارباەۆ “5 الەۋمەتتىك باستاماسىندا”  ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ كەرەكتىگىن اتاپ كورسەتكەن بولاتىن. وسىعان سايكەس، جۋىردا تۇركىستان وبلىسى، بايدىبەك اۋدانىنىڭ ورتالىعى شايان اۋىلىندا «نۇرلى جەر» باعدارلاماسى بويىنشا 55 گەكتار جەر تەلىمىنە ينجەنەرلىك-كوممۋنيكاتسيالىق ينفراقۇرىلىمنىڭ قۇرىلىسى اياقتالعان ەدى.

اتالعان جەر تەلىمدەرى شايان اۋىلدىق وكرۋگىندە كەزەكتە تۇرعان 326 تۇرعىنعا بەرىلەدى. بۇل جەر تەلىمدەرىندە اۆتوجول، اياق جول توسەلىپ، سۋاعارلار مەن ەلەكتر باعانالارى جانە اۋىز سۋ جۇيەسى ورناتىلعان. ياعني، تۇرعىندارعا جاعداي جاسالعان. شايان اۋىلدىق وكرۋگىنىڭ اكىمىنىڭ ورىنباسارى ساكەن مىرزابەكوۆتىڭ ايتۋىنشا، ينفراقۇرىلىم رەسپۋبليكالىق بيۋدجەت ەسەبىنەن تارتىلعان. ءۇي سالام دەيتىن تۇرعىندار ءۇشىن كوممۋنالدىق ماسەلەلەر تولىق شەشىلگەن.

بايدىبەك اۋدانىنىندا جۇرتشىلىقتى تۇرعىن ۇيمەن قامتاماسىز ەتۋ بويىنشا بىرقاتار جۇمىستار جۇرگىزىلىپ جاتىر. جۋىردا استانا قالاسىنىڭ 20 جىلدىعى مەرەيتويى قارساڭىندا 1 پاتەرلى 20 تۇرعىن ءۇيدىڭ كىلتى سالتاناتتى تۇردە تابىس ەتىلىپ، 20 وتباسى قونىس تويىن تويلادى. اتاپ ايتقاندا، ۇيلەر جەتىم بالالار مەن اتا-اناسىنىڭ قامقورلىعىنسىز قالعان بالالارعا، الەۋمەتتىك جاعىنان قورعالاتىن تابىسى از ازاماتتارعا، مەملەكەتتىك قىزمەتشىلەر، وزگە دە بيۋدجەتتىك ۇيىمداردىڭ قىزمەتكەرلەرى مەن اسكەري قىزمەتشىلەرگە جانە اپاتتى جاعدايداعى ۇيلەر ساناتى بويىنشا تۇرعىن ءۇي كەزەگىندە تۇرعان ازاماتتارعا بەرىلدى. ۇيلەردىڭ اۋلاسى قورشالعان، اۋىز سۋ تارتىلعان. باسپانالى بولعان تۇرعىنداردىڭ ءبىرى، كوپبالالى اكە، بىلىكتى حيرۋرگ جامالبەك بەيسەنوۆ 10 جىل كەزەككە تۇرعان. ول ءۇيدىڭ ساپالى ءارى قولايلى سالىنعانىن ايتىپ، ريزاشىلىعىن ءبىلدىردى.

قازىرگى تاڭدا بايدىبەك اۋدانى شايان اۋىلىنىڭ باتىس بولىگىندە ورنالاسقان جاڭا ۇيلەر ءوز الدىنا ءبىر شاعىناۋدان بولىپ قۇرىلىپ وتىر.
ودان بولەك، بايدىبەك اۋدانىنداعى 3 ەلدى مەكەندە جەكە مەردىگەرلەردىڭ ەسەبىنەن 2 قاباتتى 10 پاتەرلى قىزمەتتىك تۇرعىن ءۇيدىڭ جانە اۋدان ورتالىعى شايان اۋىلىنان 2 قاباتتى 16 پاتەرلى 5 تۇرعىن ءۇيدىڭ قۇرىلىسىنا جوبالىق-سمەتالىق قۇجاتتامالارى ازىرلەنىپ جاتىر.

Abai.kz