بيىلعى جىلدىڭ قازان ايىندا مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا قازاقستان حالقىنىڭ ءال-اۋقاتىن بارىنشا كوتەرۋ جايى دا ايتىلعان ەدى

جەتىساي اۋدانىنداعى ءبىراز اۋىلدارعا تابيعي وتىن تۇتىنۋ ارمان بولاتىن. بۇرىن. بۇگىندە وسى يگىلىككە جەتىسايلىقتار قول جەتكىزە باستادى.

دوستىق اۋىلىندا گاز قوسۋ ءراسىمى ءوڭىر باسشىسى جانسەيىت تۇيمەباەۆتىڭ كەلۋىنە قارسى ورايلاستىرىلعان بولاتىن. العاشقى الاۋدى جاققان ءوڭىر باسشىسى ءوز قۇتتىقتاۋىن جەتكىزدى. اۋىل اقساقالدارى ەل يگىلىگى ءۇشىن اتقارىلىپ جاتقان وسىنداي ەڭبەكتىڭ ءراتتى بولۋىن تىلەپ، اق باتالارىن جاۋدىردى.

كومىر جاعۋدان قۇتىلعان اۋىلداردىڭ قاتارىندا اتامەكەن اۋىل وكرۋگىنە قاراستى قوعالى، تىڭدالا جانە ش. دىلدابەكوۆ اۋىل وكرۋگىندەگى بايدالا، زەردەلى، دوستىق اۋىلدارى بار.

جانسەيىت تۇيمەباەۆ، تۇركىستان وبلىسىنىڭ اكىمى: «قۇرمەتتى جەتىسايلىقتار، بۇگىن كوپتەن كۇتكەن ۇلكەن قۋانىشتىڭ كۋاسى بولعالى وتىرمىز. ياعني، بۇگىن تۇركىستان وبلىسىنا قاراستى جەتىساي اۋدانىندا 5 ەلدىمەكەننىڭ تۇرعىندارى تابيعي گازعا قول جەتكىزىپ وتىر. قازىرگى تاڭدا جەتىساي اۋدانىندا 104 ەلدىمەكەننىڭ 46-سى، ياعني 22 096 ابونەنت تابيعي گازبەن قامتىلسا، بۇل اۋدانداعى ەلدىمەكەندەردىڭ جالپى سانىنىڭ 44,2 پايىزىن قۇراپ وتىر. ال ابونەنت سانى بويىنشا 74,4 پايىزعا جەتتى. جەتىساي ءوڭىرى ءۇشىن جاقسى كورسەتكىش. تۇركىستاننىڭ وزىندە گازبەن قامتىلۋ 14 پايىزدى عانا قۇرايدى. الداعى ۋاقىتتا تۇركىستان وبلىسىنىڭ بارلىق اۋماعى تابيعي گازبەن قامتىلاتىن بولادى».

اۋىل تۇرعىندارى كوگىلدىر وتىن كەلگەنىنە قۋانۋلى. وتىن مەن كومىر ساتىپ الىپ، الىستان اربالايتىن اۋىلدىقتار ەندى بۇل بەينەتتەن قۇتىلدىق دەپ وتىر.

گاز تاراتۋ نىسانىنىڭ قۇرىلىسى وتكەن جىلدىڭ قىركۇيەك ايىندا باستالعان بولاتىن. ارادا وتكەن از عانا ۋاقىت ىشىندە ەل يگىلىگىنە بەرىلىپ وتىر. اتالمىش نىسان قۇرىلىسىنىڭ جالپى سمەتالىق قۇنى 102,6 ملن. تەڭگەنى قۇرايدى.

جەتىساي ءوڭىرىن گازداندىرۋ جۇمىستارى قارقىندى تۇردە جۇرگىزىلۋدە. بيىل اۋدانداعى ەلدىمەكەندەردى گاز جۇرگىزۋ ماقساتىندا وبلىستىق بيۋدجەتتەن 615,4 ملن تەڭگە قارالعان بولاتىن. اتالعان قارجى 5 نىساننىڭ قۇرىلىسى ءۇشىن بولىنگەن. ونىڭ ىشىندە 1 نىساننىڭ قۇرىلىس-مونتاج جۇمىستارى بيىلعى جىلدىڭ شىلدە ايىندا اياقتالسا، 3 ەلدىمەكەننىڭ قۇرىلىسى جىل سوڭىنا دەيىن ەل يگىلىگىنە تاپسىرىلماق. وسىلايشا تابيعي گاز تۇتىناتىن اۋىلداردىڭ قاتارى ارتا تۇسپەك.

ا.بەيىمبەت

Abai.kz