بيىل ناۋرىزدا پارلامەنت پالاتالارىنىڭ بىرلەسكەن وتىرىسىندا ەلباسى نۇرسۇلتان نازارباەۆ قازاقستان حالقىنا «پرەزيدەنتتىڭ بەس الەۋمەتتىك باستاماسى» اتتى جاڭا الەۋمەتتىك باستامالاردى تانىستىردى. باستامادا ءوزىن-ءوزى ەڭبەكپەن قامتىعان جانە جۇمىسسىز تۇرعىنداردىڭ اراسىندا جاپپاي كاسىپكەرلىكتى دامىتۋ ءۇشىن اتقارىلىپ جاتقان جۇمىستارىنا قولداۋ ءبىلدىرىپ، جەڭىلدەتىلگەن شاعىن نەسيە بەرۋ جايلى ايتىلعان بولاتىن.

شارۋاعا ەپتى كۇنگەي كەلىنشەكتەرى شاعىن بيزنەستى دوڭگەلەتىپ وتىر. ءبىرى كونديتەرلىك ءونىم ءپىسىرىپ، وتباسىلىق كىرىستى اتتىرسا، ەندى ءبىرى قولنونەر بۇيىمدارىن جاساۋمەن اينالىسادى. ءبىزدىڭ كەيىپكەردىڭ دە سۇيىكتى ىسىنەن ەسەلەپ تابىس تاۋىپ، ءتىپتى وزگەلەردى دە جۇمىسپەن قامتىپ وتىرعان جايى بار. وتىرارلىق زەينەتكەر مەملەكەتتىك قولداۋدىڭ ارقاسىندا تىگىن تسەحىن اشتى.تىگىنشىلەردىڭ قولىنان شىققان كورپە-توسەكتەر قازاقى ويۋ-ورنەكتەرمەن ايشىقتى.

زەينەت جاسىنا جەتسە دە، ەڭبەككە قۇلشىنىسى زور ءۇرلاش تۇرعانباي «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 — 2021 جىلدارعا ارنالعان باعدارلاماسى» اياسىندا 7 ملن. تەڭگەنىڭ جەڭىلدەتىلگەن نەسيەسىن العان. قاراجاتقا تىگىن ماشينالارىن الىپ، قازىر 5 ادامدى تۇراقتى جۇمىسپەن قامتىپ وتىر. بۇدان بولەك، كاسىپكەر مەملەكەتتىك تاپسىرىس بويىنشا دا تىگىن تىگەدى. ال، ونداي كەزدە اۋىلدىڭ  قىز-كەلىنشەكتەرىن جالدايدى.

ءۇرلاش تۇرعانباي - جەكە كاسىپكەر

قىزىلورداعا مۇنايشىلاردىڭ ارنايى كيىمدەرىن تىگەمىز. جاقىندا جاڭاقورعانعا تاعى 150 كيىم تىگىپ جىبەرەمىز. مۇنداي تاپسىرىستار كەزىندە ءۇيدى-ۇيدە وتىرىپ تىگىس تىگەتىن اۋىلدىڭ ايەلدەرى كومەكتەسەدى». ايتا كەتەيىك، وتىرار اۋدانىندا باعدارلاما اياسىندا قارجىلىق ۇيىمدار 45 ازاماتقا شاعىن نەسيە بەرگەن. ولاردىڭ دەنى اۋىل شارۋاشىلىعىن دامىتۋعا اتسالىسسا، قىز-كەلىنشەكتەر جەڭىل ونەركاسىپتى ۇرشىقشا يىرۋدە.

امانگەلدى مۇحيت - وتىرار اۋداندىق جۇمىسپەن قامتۋ ورتالىعىنىڭ ديرەكتورى

شاعىن نەسيەمەن 10 ايدا 45 ازامات 197 ملن. تەڭگەمەن قامتىلىپ وتىر. ولاردىڭ ءبىرى قىزمەت كورسەتۋ سالاسىندا، ەندى ءبىرى مال شارۋاشىلىعىن جانداندىرىپ كەلەدى.

باعدارلاما اياسىندا كاسىپكەرلىكتى تۇلەتۋ تەك وتىرار اۋدانىندا عانا ەمەس، تۇتاس تۇركىستان وبلىسىندا دا قارقىن العان. 2 مىڭعا جۋىق كۇنگەيلىك تۇرعىن مەملەكەت قولداۋىنا يەك ارتىپ، كاسىپكە بەت بۇرىپ وتىر.

مۇحيت وتارشيەۆ - تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى

«باستاۋ بيزنەس» جوباسى ارقىلى 1730 ازامات وقۋلارىن اياقتاپ، سەرتيفيكاتتارىن الدى. ونىڭ 215 — ىنە 1,1 ملرد. تەڭگەنىڭ نەسيەسى بەرىلدى. «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 — 2021 جىلدارعا ارنالعان باعدارلاماسىنىڭ» 2-باعىتىندا جاپپاي كاسىپكەرلىكتى دامىتۋ قارالعان. بۇگىنگە دەيىن 2,6 ملرد. تەڭگە كولەمىندە 500 ادام نەسيەمەن قامتاماسىز ەتىلدى»

مەملەكەتتەن قوماقتى قولداۋ كورگەن كاسىپكەر تاپسىرىس كولەمىنىڭ كۇن سايىن ارتىپ وتىرعانىن ايتادى. «الداعى ۋاقىتتا شەبەرحانانى كەڭەيتىپ، جۇمىس ورنىن ارتتىرۋعا دا مۇمكىندىك بار» دەيدى ول.

گ. قالمىرزاقىزى      

Abai.kz