بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ بۇگىن وسكەمەن قالاسىندا وتكەن رەسپۋبليكالىق «Digital East – بولاشاققا قادام» ءىت-فورۋمىندا ايتتى. اتالعان ءىس-شاراعا قازاقستان رەسپۋبليكاسى پرەمەر-ءمينيسترىنىڭ ورىنباسارى اسقار جۇماعاليەۆ پەن وبلىس اكىمى دانيال احمەتوۆ تە قاتىستى.

جالپى سوڭعى كەزدەرى شىعىس قازاقستان وبلىسى تسيفرلاندىرۋ ءىسى بويىنشا ايتارلىقتاي ناتيجەلەرگە قول جەتكىزىپ وتىر. وڭىردە جاستاردىڭ ءىت-تەحنولوگياعا دەگەن قىزىعۋشىلىعى دا ۋاقىت وتكەن سايىن ارتىپ كەلەدى. سونداي-اق وبلىستاعى حالىققا قىزمەت كورسەتەتىن مەكەمەلەر مەن ءىرى ءوندىرىس وشاقتارى دا تسيفرلاندىرۋدى يگىلىگىن كورۋدە. وسىنداي يگى ىستەردىڭ قورىتىندىسى رەتىندە «Digital East – بولاشاققا قادام» ءىت-فورۋمى ۇيىمداستىرىلىپ، الداعى مىندەتتەر ناقتىلاندى.

فورۋمعا ارنايى قاتىسقان «نۇر وتان» پارتياسى توراعاسىنىڭ ءبىرىنشى ورىنباسارى مۇنداي باستامالاردىڭ ەل دامۋىندا ماڭىزى زور ەكەنىن ايتتى.

– تسيفرلاندىرۋ دەگەنىمىز – بۇگىنگى زاماننىڭ باستى تالابى. سوندىقتان قازىردىڭ وزىندە ەلىمىزدە مەملەكەتتىك قىزمەتتىڭ باسىم بولىگى تسيفرلى فورماتقا اۋىستىرىلىپ، جاڭا ۇردىستەرگە ساي كورسەتىلۋدە. ءتىپتى ءىرى زاۋىتتار مەن ءوندىرىس ورىندارىندا دا اۋىر جۇمىستار تسيفرلى تەحنولوگيانىڭ جەمىسىن كورىپ وتىر. مۇنىڭ بارلىعى ەلباسىنىڭ «تسيفرلى قازاقستان» باعدارلاماسىن جۇزەگە اسىرۋدىڭ ناقتى ناتيجەسى ەكەنى ءسوزسىز. مەملەكەت باسشىسى جاڭا جولداۋىندا دا بۇل سالاعا ەرەكشە ءمان بەرىپ، يننوۆاتسيالىق جانە سەرۆيستىك سەكتورلاردى دامىتۋدىڭ ءتيىمدى تەتىكتەرىن انىقتاپ بەردى. سونىڭ ناتيجەسىندە بۇگىندە ەلىمىز بويىنشا كوپتەگەن يگى ىستەر جۇزەگە اسىرىلىپ، وسى سالادا بىلىكتى، كاسىبي ماماندار دايارلاۋ ءىسى قولعا الىندى. بۇگىنگى ءىت-فورۋمدى دا سونداي تىڭ باستامالاردىڭ يگى ناتيجەسى دەپ قاراستىرۋىمىزعا ابدەن بولادى، – دەدى ماۋلەن اشىمباەۆ.

سونىمەن قاتار فورۋم بارىسىندا «ۇزدىك ءىت-شەشىمدەر مەن ستارتاپ جوبالار» بايقاۋىنىڭ جەڭىمپازدارى ماراپاتتالدى. ەكى كەزەڭنەن تۇرعان بۇل بايقاۋعا 1500 ۇمىتكەر قاتىستى. جوبانىڭ باستى ماقساتى – ءتيىمدى ءىت-شەشىمدەر مەن ستارتاپ باستامالاردى ىرىكتەپ، ولاردىڭ جۇزەگە اسىرىلۋىنا قارجىلاي قولداۋ كورسەتۋ.

تسيفرلاندىرۋ ءىسى بويىنشا وبلىستا مەديتسينا سالاسىندا دا ايتارلىقتاي ناتيجەلەرگە قول جەتكىزىلگەنىن ەرەكشە اتاپ وتكەن ءجون. ول ءۇشىن وبلىستىق مامانداندىرىلعان مەديتسينالىق ورتالىقتىڭ جۇمىسىن ايتسا دا جەتكىلىكتى.

اتالعان نىسانعا ارنايى بارعان ماۋلەن اشىمباەۆ روبوتتاندىرىلعان حيرۋرگيالىق ورتالىقتىڭ جۇمىسىمەن تانىستى. مۇندا يتاليادان اكەلىنگەن Senhance Transenterix روبوتىنىڭ كومەگىمەن كۇردەلى ەندوسكوپيالىق وتالار جاسالادى. روبوتتاندىرىلعان حيرۋرگيا وتانىڭ دالدىگىن ارتتىرىپ، جاراقاتتىڭ جەڭىل جانە وپەراتسيادان كەيىنگى ەم-دومنىڭ ساپالى بولۋىن قامتاماسىز ەتەدى.

ساپار سوڭىندا «نۇر وتان» پارتياسى توراعاسىنىڭ ءبىرىنشى ورىنباسارى پارتيانىڭ وبلىستىق اكتيۆىمەن كەزدەسىپ، ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى مەن جاقىندا جاريالانعان «ۇلى دالانىڭ جەتى قىرى» ماقالاسىندا ايتىلعان باسىمدىقتاردى جۇزەگە اسىرۋ بارىسىن تالقىلادى. ماۋلەن اشىمباەۆ ءوز سوزىندە مەملەكەت باسشىسىنىڭ اتالعان قۇجاتتاردا ايقىنداپ بەرگەن باسىمدىقتارى جۇيەلى سيپاتقا يە ەكەنىن ايتىپ، ولاردى ناتيجەلى ورىنداۋ ءۇشىن پارتيانىڭ الدىندا تۇرعان باستى مىندەتتەرگە توقتالدى.

Abai.kz