ادىلەت مينيسترلىگى الەۋمەتتىك جاعىنان از قامتىلعان تۇرعىندارعا ادۆوكاتتىق قىزمەتتى تەگىن ۇسىنۋ جاعىن قاراستىرىپ جاتىر، - دەپ حابارلايدى اباي-اقپارات.

Probono جۇيەسى بويىنشا ادۆوكاتتار تەگىن زاڭگەرلىك كومەك كورسەتۋى ءتيىس. مۇنداي جۇيە الەمنىڭ كوپتەگەن ەلىندە بار.

بۇل تۋرالى ەلىمىزدىڭ ادىلەت ءمينيسترىنىڭ ورىنباسارى جانات ەشماعامبەتوۆ ايتتى. پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتى وتىرىسىندا «ادۆوكاتتىق قىزمەت جانە زاڭ كومەگى تۋرالى» زاڭ جوباسىنىڭ تانىستىرىلىمى ءوتتى.

مينيسترلىك وكىلدەرىنىڭ ايتۋىنشا، ەلىمىزدە ادۆوكاتتار جەتىسپەيدى. قازىر 4 مىڭ 700 گە جۋىق قورعاۋشى بار. ادام باسىنا شاققاندا 4 مىڭ تۇرعىنعا ءبىر ادۆوكاتتان كەلەدى. زاڭ جوباسىندا ادۆوكاتتار القاسىنا تولەنەتىن قابىلداۋ جارناسىن جەڭىلدەتۋ ماسەلەسى دە قارالىپ جاتىر. ماسەلەن، ۇمىتكەرلەر ادۆوكاتتار القاسىندا اقى تولەپ تاعىلىمدامادان وتۋگە، سونداي-اق باستاپقى جارنانى تولەۋگە مىندەتتى. بۇعان شامامەن 1 ملن تەڭگەگە جۋىق قارجى كەتەدى.

«بۇل سالانىڭ دامۋىنا ءوز كەدەرگىسىن كەلتىرىپ وتىر»، – دەيدى جانات ەشماعامبەتوۆ. ايتا كەتەيىك، سوڭعى ءۇش جىلدا ادۆوكاتتار سانى تەك 300 مامانعا عانا كوبەيگەن.

جانات ەشماعامبەتوۆ، قر ادىلەت ءمينيسترىنىڭ ورىنباسارى: 

– قابىلداۋ جارناسىنىڭ ءوزى بۇل – مۇلىكتىك كەدەرگى. ادۆوكات بولۋ ءۇشىن بىرنەشە كەزەڭ بار. الدىمەن تاجىريبەدەن وتەدى. ودان سوڭ سەرتيفيكات الىپ، اتتەستاتسيادان ءوتۋى ءتيىس. مۇنىڭ بارىندە ماماننىڭ كاسىبي بىلىكتىلىگى تەكسەرىلەدى. ال قابىلداۋ جارناسى ەشقانداي ءبىلىمدى تەكسەرمەيدى. تەك كەدەرگى. تاجىريبەدەن وتۋگە ءبىر جىلدا شامامەن 200-250 مىڭ تەڭگە كەتەدى. وعان 700-800 مىڭ تەڭگە جارنانى قوسىڭىز. بۇل دەگەنىڭىز جاس مامان ءۇشىن وڭاي قاراجات ەمەس قوي.

Abai.kz