جاڭا فورماتتا اتاۋلى الەۋمەتتىك كومەك الۋشىلاردىڭ سانى 504  مىڭ ادامدى قۇرادى. بۇل تۋرالى قر ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا ءمالىم ەتتى، دەپ حابارلايدى اباي-اقپارات.

«2018 جىلى مەملەكەتتىك بيۋدجەتتە جاڭا فورماتتاعى اتاۋلى الەۋمەتتىك كومەكتى ەنگىزۋ ءۇشىن  28,9 ميلليارد تەڭگە، ونىڭ ىشىندە نىسانالى ترانسفەرتتەر ەسەبىنەن رەسپۋبليكالىق بيۋدجەتتەن 18,4 ميلليارد تەڭگە جانە جەرگىلىكتى بيۋدجەتتەن 10,6  ميلليارد تەڭگە ءبولۋ كوزدەلگەن. 2018 جىلعى 9 ايعا اتاۋلى الەۋمەتتىك كومەك تولەمدەرىنىڭ سوماسى 19,5  ميلليارد تەڭگەنى نەمەسە 67,4 پايىزدى قۇرادى»، - دەدى مينيستر پارلامەنت ماجىلىسىندەگى ۇكىمەت ساعاتىندا.

رەسپۋبليكالىق بيۋدجەتتەن بولىنگەن نىسانالى ترانسفەرتتەردىڭ ەداۋىر يگەرىلۋى مىنا ايماقتاردا بايقالدى: تۇركىستان وبلىسىندا (100%), شىعىس قازاقستان وبلىسىندا (99,5%), سولتۇستىك قازاقستان وبلىسىندا (99,1%), پاۆلودار وبلىسىندا (91%), سونداي-اق شىمكەنت قالاسىندا (99,9%).

ال الماتى قالاسىندا (16,9%), استانا قالاسىندا (34,4%), سونداي-اق ماڭعىستاۋ وبلىسىندا (46,8%) بولىنگەن ترانسفەرتتەر تومەن دەڭگەيدە يگەرىلگەن.

«9 ايدىڭ قورىتىندىسى بويىنشا جاڭا فورماتتا اتاۋلى الەۋمەتتىك كومەك الۋشىلاردىڭ سانى 504  مىڭ ادامدى نەمەسە 97,3 مىڭ  وتباسىن قۇرايدى. ونىڭ ىشىندە 72,4 مىڭ ادام نەمەسە اتاۋلى الەۋمەتتىك كومەك الۋشىلاردىڭ 14,4 پايىزى شارتسىز اقشالاي كومەك، ال 431,6 مىڭ ادام، ياعني 85,6 پايىزى شارتتى اقشالاي كومەك الادى»، - دەدى ۆەدومستۆو باسشىسى.

وڭىرلەر بولىنىسىندە اتاۋلى الەۋمەتتىك كومەك الۋشىلاردىڭ كوبى تۇركىستان وبلىسىندا - 34,8 پايىز، جامبىل وبلىسىندا - 11,7  پايىز، الماتى وبلىسىندا - 10,7, قىزىلوردا وبلىسىندا - 7, سونداي-اق شىمكەنت قالاسىندا - 9,7 پايىز.

سونىمەن قاتار، مينيستر اتاۋلى الەۋمەتتىك كومەك قۇرىلىمىندا بالالى وتباسىلار باسىم ەكەنىن ايتتى.

«اتاۋلى الەۋمەتتىك كومەك الۋشىلاردىڭ قۇرىلىمىندا  بالالى وتباسىلار باسىم. ولار شامامەن 41 پايىزىن قۇرايدى. الەۋمەتتىك-دەموگرافيالىق كورسەتكىشتەر بويىنشا كۇنكورىسى تومەن كوپ بالالى وتباسىلاردىڭ 75,7 پايىزى وڭتۇستىك وڭىرلەردە تۇرادى. اتاپ ايتقاندا, شىمكەنت قالاسىندا, تۇركىستان وبلىسىندا, قىزىلوردا وبلىسىندا, جامبىل وبلىسىندا جانە الماتى وبلىسىندا ورنالاسقان»، - دەدى مينيستر.

ونىڭ سوزىنە قاراعاندا، اتاۋلى الەۋمەتتىك كومەك الۋشى وتباسىلاردىڭ قۇرىلىمىندا 25 پايىزىن تولىق ەمەس وتباسى قۇرادى. بۇدان باسقا، شارتسىز اقشالاي كومەك الۋشىلاردىڭ قۇرامىندا تولىق ەمەس وتباسىلاردىڭ ۇلەسى 87,4 پايىز.

«اتاۋلى الەۋمەتتىك كومەك الۋشىلاردىڭ اراسىنان  الەۋمەتتىك ستاتۋستار بولىنىسىندە بالالاردىڭ سانى كوبىرەك - 321,1 مىڭ بالا نەمەسە 63,7 پايىز»، - دەدى ءمادينا ابىلقاسىموۆا.

باسقا ساناتتارعا تومەندەگى ادامدار كىرەدى: بالالارعا، مۇگەدەكتەرگە، قارتتارعا كۇتىم كورسەتۋمەن اينالىساتىن ادامدار - 18,6 پايىز (توقسان ءۇش مىڭ جەتى ءجۇز ادام);  كومەككە جۇگىنگەن ساتتە جۇمىس ىستەپ جۇرگەن ادامدار - 8,4 پايىز ( قىرىق ەكى مىڭ ەكى ءجۇز ادام); ءوزىن-ءوزى جۇمىسپەن قامتىعاندار - 4,7 پايىز) ( جيىرما ءۇش مىڭ جەتى ءجۇز ادام); جۇمىسسىزدار - 1,8 پايىز.

سونداي-اق ستۋدەنتتەر - 2,1 پايىز (ون مىڭ ءتورت ءجۇز ادام);  مۇگەدەكتەر - 0,5 پايىز (ەكى مىڭ التى ءجۇز ادام); زەينەتكەرلەر - 0,3 پايىز ( ءبىر مىڭ ءتورت ءجۇز ادام).

بۇدان بۇرىن حابارلانعانداي، ماجىلىستەگى ۇكىمەت ساعاتىندا قر ەڭبەك جانە حالىقتى الەۋمەتتىك قورعاۋ ءمينيسترى اتاۋلى الەۋمەتتىك كومەكتىڭ جاڭا فورماتىن جەتىلدىرۋ بويىنشا ۇسىنىستار پىسىقتالىپ جاتقانىن ءمالىم ەتتى.سونىمەن قاتار ءمادينا ابىلقاسىموۆا كەدەيلىك دەڭگەيىن تومەندەتۋگە قاتىستى مالىمەتتەردى جاريالادى.

«الەۋمەتتىك كەپىلدىكتەردى ارتتىرۋ بويىنشا مەملەكەت جۇرگىزىپ وتىرعان الەۋمەتتىك ساياساتتىڭ ناتيجەسىندە ءومىر ءسۇرۋ دەڭگەيىنىڭ نەگىزگى كورسەتكىشتەرى جاقساردى. قازاقستاندا كەدەيلىك دەڭگەيى 1996 جىلعى 34,6 پايىزدان 2018 جىلعى 2-توقسان قورىتىندىسى بويىنشا 4,7 پايىزعا قىسقاردى. حالىقتىڭ جان باسىنا شاققانداعى نومينالدى اقشالاي تابىسى 2001 جىلدان باستاپ 2017 جىل ارالىعىندا 10,8 ەسەگە ءوسىپ، 83 مىڭ 53 تەڭگەنى قۇرادى»، - دەدى مينيستر پارلامەنت ماجىلىسىندەگى ۇكىمەت ساعاتىندا.

ونىڭ سوزىنە قاراعاندا، حالىقتىڭ تابىستار بويىنشا تەڭسىزدىگى قىسقارىپ كەلەدى. دجيني يندەكسىنىڭ ءمانى 2001 جىلدان 2017 جىل ارالىعىندا 0,287 دەيىن 1,3 ەسەگە قىسقاردى.«كەدەيلىك تەرەڭدىگى 2001 جىلدان 2017 جىلعا دەيىن 37 ەسەگە، ياعني تيىسىنشە 14,8 پايىزدان 0,4 دەيىن، كەدەيلىك وتكىرلىگى - 65 ەسەگە، 6,5 پايىزدان 0,1 پايىزعا دەيىن ازايدى»، - دەدى ءمادينا ابىلقاسىموۆا.

Abai.kz