حالىققا قىزمەت كورسەتۋ ورتالىعىنىڭ اشىلۋى - ەلىمىزدەگى ساياسي ينتەگراتسيانىڭ نىشانى. مەملەكەتتىڭ دامۋ ساتىسى جوعارىلاعان سايىن حالىقتىڭ سۇرانىسى دا ارتا تۇسپەك. دەمەك، حالىقتىڭ قۇجات ماسەلەسىن رەتتەۋدە ورتالىقتاردىڭ اشىلۋى - زاڭدى قۇبىلىس. ورتالىق ءوز جۇمىسىن كونستيتۋتسيالىق نورمالار مەن نارىقتىق قوعام تالاپتارىنا ساي، ازاماتتارعا قولايلى نەگىزدە جۇرگىزىپ كەلەدى.

بۇل نىساننىڭ الەۋمەت ءۇشىن ماڭىزى زور.  سەبەبى،  بۇرىن ءبىر انىقتاما الۋ ءۇشىن بىتپەيتىن كەزەك پەن ءتۇرلى كابينەتتەر، ەڭ قۇندىسى التىن ۋاقىتىن سارپ ەتەتىن حالىق  بۇگىندە «حالىققا قىزمەت كورسەتۋ ورتالىعى» دەپ اتالاتىن وسى مەكەمە ارقىلى بارلىق  قۇجاتتارىن  بىر دەمدە رەتتەۋ ماسەلەسى جولعا قويىلعان. كوپشىلىك «ءبىر تەرەزە» دەپ اتاعان بۇل مەكەمەنىڭ عيماراتى جاڭا تيپتىك جوبامەن جابدىقتالىپ، كەلگەن ءاربىر تۇتىنۋشى  ۇشىن تولىق جاعداي جاسالىنىپ، جۇمىس جۇيەسى جاقسى ۇيىمداستىرىلعان. تاعى ءبىر ايتا كەتەرلىگى، مۇنداعى قىزمەتكەرلەر ءوز ىستەرىنىڭ بىلىكتى ماماندارى، قاي ىستە دە الدىڭعى لەكتەن كورىنىپ، اۋدانداعى قوعامدىق جۇمىستاردا دا بەلسەندىلىك تانىتىپ جۇرگەن جاستار.

حالىقپەن تىكەلەي جۇمىس جاساپ، قۇجاتتاردى دەر كەزىندە دايىن ەتىپ، ساپالى قىزمەت كورسەتە ءبىلۋ قاي كەزدە بولسىن ەڭ ماڭىزدى ماسەلە. حالىققا قىزمەت كورسەتۋ ورتالىقتارىن (حقكو) قۇرۋ جانە ولارعا مەملەكەتتىك ورگانداردىڭ قىزمەتتەرىن حقكو ارقىلى جۇزەگە اسىرۋعا بولاتىن – بەلگىلى ءبىر قىزمەتتى الۋ ءۇشىن جۇگىنگەن ازاماتتارعا «ءبىر تەرەزە» ارقىلى قاجەتتى انىقتامالار مەن قۇجاتتاردى الۋعا مۇمكىندىك بەردى.

كۇن وتكەن سايىن ساپالى سەرۆيسكە دەگەن قاجەتتىلىك ارتىپ كەلەدى، ءاردايىم تابىستى بولۋ ءۇشىن كەز كەلگەن ۇيىمنىڭ جۇمىسىندا كليەنتكە باعدارلانۋشىلىق ءبىرىنشى كەزەككە شىعادى. قىزمەت ساپاسىن باقىلاۋ ماقساتىندا، «ازاماتتارعا ارنالعان ۇكىمەت» بىرقاتار مەحانيزمدەردى ازىرلەدى.

زاماناۋي جانە ارەكەتتى قۇرالداردىڭ ءبىرى احۋالدىق تالداۋ ورتالىعى بولىپ تابىلادى. زاماناۋي ورتالىق ونلاين رەجيمىندە بەينە-مونيتورينگ جۇرگىزۋ، مەملەكەتتىك كورپوراتسيانىڭ جۇمىسكەرلەرىنە كەڭەس بەرۋ كومەگىن كورسەتۋ جانە سىبايلاس جەمقورلىق بەلگىلەرىن جويۋ ءۇشىن قاجەتتى جابدىقتارمەن جابدىقتالعان. «ازاماتتارعا ارنالعان ۇكىمەتتىڭ» احۋالدىق ورتالىعىنىڭ جيىرما جۇمىسكەرى ەلىمىز بويىنشا مەملەكەتتىك قىزمەتتەردى كورسەتۋ ساپاسىن باقىلاي وتىرىپ، ءاردايىم حالىققا قىزمەت كورسەتۋ ورتالىقتارىنا بەينەباقىلاۋ جۇرگىزىپ وتىرادى. بۇگىنگى تاڭدا احۋالدىق ورتالىققا مەملەكەتتىك كورپوراتسيانىڭ بارلىق حالىققا قىزمەت كورسەتۋ ورتالىقتارى قوسىلعان. سونىمەن قاتار احۋالدىق ورتالىق شالعايداعى اۋىلدىق ايماقتارعا قىزمەت كورسەتەتىن موبيلدىك حقكو-لاردىڭ جۇمىسىن باقىلاپ، ناقتى ۋاقىت رەجيمىندە ولاردىڭ گەولوكاتسياسى مەن ءجۇرىس باعدارىن انىقتايدى.

«ورتالىق ماماندارى ناقتى ۋاقىت رەجيمىندە تاڭعى ساعات 8-دەن كەشكى ساعات 8-گە دەيىن فرونت-ءوفيستىڭ بارلىق ءىس-شارالارىنا باقىلاۋ جۇرگىزەدى جانە قاجەت بولعان جاعدايدا، فيليالدىڭ ءتيىمدى جۇمىسىن قامتاماسىز ەتۋ ءۇشىن جەدەل تۇردە قىزمەتكەرلەرمەن حابارلاسا الادى. مىسالى، ەگەر ازاماتقا قىزمەت ساپاسىز كورسەتىلگەن بولسا، حقكو-دا تۇرىپ-اق 1414 ءنومىرى بويىنشا قوڭىراۋ شالۋىنا بولادى، احۋالدىق ورتالىقتىڭ ماماندارى قوڭىراۋ شالۋشىنى كامەرا ارقىلى انىقتايدى جانە ونى كوزبەن ەگجەي-تەگجەيلى باقىلاي وتىرىپ، جەدەل تۇردە شاعىمنىڭ ءمان-جايىن انىقتاپ قانا قويماي، قىزمەتتىڭ سوڭعى ناتيجەگە دەيىن جەتۋىن قاداعالاپ، سەبەپتەرىن جويۋ ءۇشىن شارالار قابىلدايدى. سوڭعى قايتا قۇرىلىمداۋ بارىسىندا ورتالىقتىڭ ماڭىزدىلىعىن ەسكەرە وتىرىپ، ءبىز احۋالدىق ورتالىق جۇمىسكەرلەرىنىڭ سانىن 20 ادامعا دەيىن ارتتىردىق، ال قازىر جەر كاداسترى بولىمدەرىن جانە جىلجىمايتىن مۇلىكتى تەحنيكالىق تەكسەرۋ جانە الەۋمەتتىك تولەمدەردى ۆەدومستۆو ارالىق ەسەپتەۋ ورتالىقتارىن بەينەباقىلاۋعا قوسا وتىرىپ، احۋالدىق ورتالىقتى جاڭعىرتۋدى جوسپارلاپ وتىرمىز»، - دەپ ءتۇسىندىردى مەملەكەتتىك كورپوراتسيانىڭ باسقارما توراعاسىنىڭ ورىنباسارى اسەمگۇل بالتاشەۆا.

ەگەر ادام مەملەكەتتىك كورسەتىلەتىن قىزمەتتى العان كەزدە وعان دۇرىس كەڭەس بەرىلمەدى نەمەسە كەزەك كۇتۋ ۋاقىتى قاجەتتى ۋاقىتتان اسىپ كەتتى، نەمەسە مەملەكەتتىك كورپوراتسيانىڭ جۇمىسكەرى دورەكىلىك كورسەتتى دەپ ساناسا، ول 1414 بىرىڭعاي بايلانىس ورتالىعىنا حابارلاسا الادى.

«نەگىزسىز باس تارتۋلار، قىزمەتكەرلەردىڭ دورەكىلىك كورسەتۋى نەمەسە قىزمەتتىڭ ۇزاق ۋاقىت كورسەتىلۋى بويىنشا بارلىق ماسەلەلەردى احۋالدىق ورتالىق ارقىلى تەز شەشۋگە بولادى. ءبىز ماسەلەنى تەز ارادا شەشۋ ءۇشىن شارالار قابىلدايمىز جانە بىزگە كەلۋشىلەر الداعى ۋاقىتتا قىزمەتتى جىلدام جانە ساپالى تۇردە الاتىن بولادى. «كەرى بايلانىس» ءۇشىن ءبىز ءاردايىم دايىنبىز جانە كورسەتىلەتىن قىزمەتتەردى الۋعا كەلگەن ادامدارعا قۋانا كومەك كورسەتەمىز ءارى ءوزىمىزدىڭ جۇمىسىمىزدىڭ ءالسىز جاقتارىن ءتۇسىنىپ، تۇزەتۋگە تىرىسامىز، - دەدى اسەمگۇل بالتاشەۆا.

«مىسالى، جاقىندا كورسەتىلگەن قىزمەت ءۇشىن بەرىلگەن تومەن باعاعا رەنجىگەن تالدىقورعان حقكو ينسپەكتورى كليەنتكە دورەكىلىك تانىتىپ، وعان ودان ءارى قىزمەت بەرۋدەن باس تارتقان. بايلانىس ورتالىعىنا شاعىم ءتۇسىپ، احۋالدىق ورتالىقتىڭ قىزمەتكەرلەرى دەرەۋ جاعدايدىڭ ءمان-جايىن ءتۇسىنىپ، ايەل ازاماتقا تولىق كولەمدە قىزمەت كورسەتىلۋىن قاداعالادى. ارينە، كىنالى قىزمەتكەر تارتىپتىك جازاعا تارتىلدى»، - دەپ قوستى اسەمگۇل سەرىكقىزى.

1414 بىرىڭعاي بايلانىس ورتالىعى – بۇل قىزمەت ساپاسىنا شاعىمدانۋدىڭ جالعىز جولى ەمەس. Www.facebook.com/gos.corporation جانە www.instagram.com/gos_corp الەۋمەتتىك جەلىلەرىندە «ازاماتتارعا ارنالعان ۇكىمەت» رەسمي اككاۋنتتارى ارقىلى قىزمەت كورسەتۋ ساپاسى ماسەلەلەرى بويىنشا تۇسكەن ءاربىر شاعىمعا قاتىستى ءار فاكتىگە شۇعىل تۇردە تەكسەرىس جۇرگىزىلەدى جانە شاعىمدانعان پايدالانۋشىلارعا ورىن العان جاعداي بويىنشا ەگجەي-تەگجەيلى جاۋاپ ۇسىنىلادى. شاعىمدار مەن وتىنىشتەر «ازاماتتارعا ارنالعان ۇكىمەتكە» مەملەكەتتىك كورپوراتسيانىڭ ينتەرنەت-رەسۋرسىندا باسقارما توراعاسىنىڭ بلوگى ارقىلى دا تۇسەدى، ونداعى ءبىر دە ءبىر قۇجات قاراۋسىز قالدىرىلمايدى.

سونىمەن قاتار حقكو-لارعا اپتا سايىن ەشبىر ەسكەرتۋسىز قاراپايىم قىزمەت الۋشىلار كەيپىندە «جاسىرىن ساتىپ الۋشىلار» كەلىپ تۇرادى. اسەمگۇل بالتاشەۆانىڭ ايتۋىنشا، مۇنداي تەكسەرىستەر مەملەكەتتىك قىزمەتتەردى كورسەتۋ بارىسىنداعى «وسال جەرلەردى» انىقتاۋعا كومەكتەسەدى، ول كەلەشەكتە حقكو ينسپەكتورلارىن وقىتۋعا مۇمكىندى بەرەدى.

«جاسىرىن ساتىپ الۋشىلار» حقكو-لارعا كەلگەن كەزدە بارلىق كەمشىلىكتەردى تىركەپ، ول بويىنشا ەگجەي-تەگجەيلى ەسەپ دايىندايدى، ونىڭ نەگىزىندە ءبىز فرونت-وفيستەردىڭ باسشىلارىنا ۇسىنىمدار بەرەمىز. مىسالى، كەڭەس بەرۋ كەزىندە ماماندار قانداي دا ءبىر قىزمەتتى كورسەتۋ بويىنشا اقپارات بەرە الماسا، مەنتورلار جۇمىسكەرلەرگە جۇمىس ورىندارىندا وقىتۋ ساباقتارىن جۇرگىزەدى»، - دەيدى بالتاشەۆا.

كورپوراتسيانىڭ ءباسپاسوز قىزمەتى ءمالىم ەتكەندەي، مەنتورلىق ينستيتۋت حالىققا قىزمەت كورسەتۋ ورتالىقتارىندا 2011 جىلدان باستاپ جۇمىس ىستەپ كەلەدى. مەنتورلارعا حقكو جۇمىسكەرلەرىنىڭ ىشىنەن ۇزدىكتەرى تاڭدالادى. ادەتتە، مەملەكەتتىك قىزمەت كورسەتۋ جۇيەسىندەگى ولاردىڭ ەڭبەك جولدارى قاراپايىم وتىنىشتەردى بەرۋدەن باستالادى، ودان كەيىن جۇمىس تاجىريبەسى مەن ءوتىلى ارتا كەلە، وسى قىزمەتكەرلەر ءوز ارىپتەستەرىن وقىتا الاتىن بولادى. بۇگىنگى كۇنى حقكو دەپارتامەنتتەرىندە 44 مەنتور جۇمىس ىستەيدى جانە جاقىن ارادا ولاردىڭ سانى ايتارلىقتاي ۇلعاياتىن بولادى.

Abai.kz