بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى اقسۋ قالاسىنداعى فەرروقورىتپا زاۋىتىندا وتكەن جۇمىسشىلار فورۋمىندا ايتتى. «لايىقتى ەڭبەك – مەملەكەت تۇراقتىلىعىنىڭ نەگىزى» اتتى بۇل فورۋم «نۇر وتان» پارتياسى مەن قازاقستان رەسپۋبليكاسى كاسىپوداقتار فەدەراتسياسىنىڭ بىرلەسىپ ۇيىمداستىرۋىمەن وتكىزىلدى.

وسى جىلدىڭ ءساۋىر ايىندا «نۇر وتان» پارتياسى مەن قازاقستان رەسپۋبليكاسى كاسىپوداقتار فەدەراتسياسى ءوزارا ىنتىماقتاستىق تۋرالى مەموراندۋمعا قول قويىپ، قازاقستاندىقتاردىڭ ەڭبەك قۇقىعىن قورعاۋ جانە ەلىمىزدىڭ الەۋمەتتىك جاڭعىرۋىن ودان ءارى نىعايتۋ جولىندا كۇش بىرىكتىرۋگە ۋاعدالاسقان بولاتىن. سونىڭ اياسىندا وتكەن فورۋمى ەڭبەك قاۋىپسىزدىگىن ساقتاۋعا جانە ونى قورعاۋعا، سونداي-اق ەلباسىنىڭ جاڭا جولداۋىندا ايتىلعان باسىمدىقتارعا سايكەس ەڭبەككە لايىقتى جاعداي جاساۋعا باعىتتالدى.

«نۇر وتان» پارتياسى توراعاسىنىڭ ءبىرىنشى ورىنباسارى جيىندا قازىرگى تاڭنىڭ ەڭ وزەكتى ماسەلەسى كوتەرىلىپ وتىرعانىن ايتىپ، ءار قازاقستاندىقتىڭ ەڭبەگى ەلدىڭ الەۋمەتتىك، ساياسي جانە ەكونوميكالىق تۇراقتىلىعىنىڭ نەگىزىن قالايتىنىن تىلگە تيەك ەتتى.

– ەلىمىزدە ەلباسىنىڭ تىكەلەي باستاماسىمەن ەڭبەك قاۋىپسىزدىگىن ساقتاۋ، ەڭبەكتى قورعاۋ جانە ونى لايىقتى باعالاۋ جونىندە اۋقىمدى جۇمىستار اتقارىلىپ كەلەدى. وسى ماقساتتاعى بۇگىنگى فورۋم ەلباسىمىزدىڭ قازاقستاننىڭ ءۇشىنشى جاڭعىرۋى باستاماسىن جۇزەگە اسىرۋدا ۇلكەن ماڭىزعا يە. سەبەبى، كەز كەلگەن ءىستىڭ ادام كۇشىمەن، ادام ەڭبەگىمەن ىسكە اساتىنى بەلگىلى. سوندىقتان ەڭبەكتىڭ قورعالۋى قولعا العان ءىستىڭ ناتيجەلى بولۋىن قامتاماسىز ەتەتىن ءتيىمدى تەتىك، – دەدى ماۋلەن اشىمباەۆ.

ءوز كەزەگىندە، كاسىپوداقتار فەدەراتسياسىنىڭ توراعاسى باقىتجان ءابدىرايىم فەدەراتسيانىڭ 2018 جىلدى ەڭبەك قاۋىپسىزدىگى جانە قورعاۋ جىلى دەپ جاريالاعانىنا نازار اۋدارىپ، سول باعىتتا اتقارىلعان جۇمىستارعا توقتالدى.

سونىمەن قاتار ساپار بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى پارتيانىڭ وبلىستىق اكتيۆىمەن كەزدەسىپ، ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى مەن جاقىندا جاريالانعان «ۇلى دالانىڭ جەتى قىرى» ماقالاسىندا ايتىلعان باسىمدىقتاردى جۇزەگە اسىرۋ بارىسىن تالقىلادى. ماۋلەن اشىمباەۆ ءوز سوزىندە مەملەكەت باسشىسىنىڭ اتالعان قۇجاتتاردا ايقىنداپ بەرگەن باسىمدىقتارى جۇيەلى سيپاتقا يە ەكەنىن ايتىپ، ولاردى ناتيجەلى ورىنداۋ ءۇشىن پارتيانىڭ الدىندا تۇرعان باستى مىندەتتەرگە توقتالدى.

سونداي-اق پارتيا توراعاسىنىڭ ءبىرىنشى ورىنباسارى ماۋلەن اشىمباەۆ وبلىس اكىمى بولات باقاۋوۆپەن بىرگە س.تورايعىروۆ اتىنداعى وبلىستىق كىتاپحاناعا بارىپ، وسى باعىتتاعى پارتيالىق جوبانىڭ جۇزەگە اسىرىلۋ بارىسىمەن تانىستى.

Abai.kz