بۇگىنگى تاڭدا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ نەگىزگى باسىمدىقتارىنىڭ ءبىرى بيزنەستى قورعاۋ بولىپ تابىلادى.

بيىلعى جىلى ەلىمىز بويىنشا اگەنتتىكتىڭ باستاماسىمەن ينۆەستورلار مەن كاسىپكەرلەردىڭ قۇقىقتارىن قورعاۋ باعىتىندا «Protecting Business and Investments» جوبالىق ءوفيسى جۇمىس ىستەي باستادى.

اتالمىش جوبانى ىسكە اسىرۋ شەڭبەرىندە اگەنتتىك كاسىپكەرلەردىڭ الدىندا تۇرعان بارلىق پروتسەستەرگە بەلسەندى قولداۋ كورسەتەدى. سىبايلاس جەمقورلىق سحەمالارىنان ءۇزىلدى كەسىلدى باس تارتۋعا دايىن كاسىپكەرلەر ءوز بيزنەسىن كەز-كەلگەن قىسىمنان قورعاۋ مۇمكىندىگىنە يە بولماق.

قازىردىڭ وزىندە وتاندىق جانە شەتەلدىك ينۆەستورلاردىڭ جالپى سوماسى 6,7 ترلن تەڭگەدەن اساتىن 249 جوباسى بويىنشا سىبايلاس جەمقورلىققا قارسى ءىس-قيمىل جۇرگىزىلگەن. سونداي-اق، مەملەكەتتىك قىزمەت سالاسىنداعى ماسەلەلەردى جەدەل شەشۋ ماقساتىندا "تسيفرلى اگەنت" ءموبيلدى قوسىمشاسى ىسكە قوسىلدى. قولدانبا ونلاين-سيگنال نەگىزىندە قىزمەت كورسەتۋشىگە ماسەلەلەردى دەر كەزىندە شەشۋگە مۇمكىندىك بەرەدى.

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعا ورىنباسارى ايگۇل شايموۆانىڭ بيزنەس سۋبەكتىلەرمەن كەزدەسۋى بارىسىندا تارازداعى كاسىپكەرلەردىڭ نەگىزگى ماسەلەلەرى كەڭىنەن تالقىلاندى.

جيىن بارىسىندا اگەنتتىك توراعاسىنىڭ ورىنباسارى ايگۇل شايموۆا كاسىپكەرلىك سۋبەكتىلەرى ەلىمىزدىڭ قارىشتاپ دامۋى ءۇشىن ءوزارا جاۋاپكەرشىلىكتى تۇپكىلىكتى مويىنداۋ كەرەك ەكەنىن اتاپ ءوتتى.

- مەملەكەت سىزدەر ءۇشىن قولايلى جاعداي جاساۋعا مىندەتتى. بۇل باعىتتا ۇلكەن شارۋالار اتقارىلدى. سىزدەر ءوز كەزەكتەرىڭىزدە ادال بيزنەس جۇرگىزۋ ءۇشىن جاۋاپتى بولۋلارىڭىز ءتيىس. بۇل ساۋالعا كەلگەندە مەملەكەت پەن بيزنەس سەنىمدى سەرىكتەسكە اينالۋى قاجەت. وسى سەبەپتى بارشاڭىزدى اتالعان جوباعا اتسالىسۋعا شاقىرامىز،- دەدى ايگۇل شايموۆا.

اگەنتتىك وكىلى اتقارۋشى بيلىك ورگاندارىمەن بىرلەسىپ جۇمىس ىستەۋ بارىسىندا ساۋالدار تۋىنداسا، ءاربىر كاسىپكەر وزىنە تىكەلەي ءوتىنىش بەرە الاتىنىن اتاپ ءوتتى. سونداي-اق، كەز كەلگەن ءوتىنىش ءجىتى باقىلاۋعا الىناتىنىن، ال قوسىمشا تەكسەرۋدى تالاپ ەتپەيتىن ماسەلەلەر دەر كەزىندە شەشىمىن تاباتىنىن ايتتى.

Abai.kz