پارلامەنت سەناتىنىڭ توراعاسى قاسىم-جومارت توقاەۆ چەحيا رەسپۋبليكاسىنىڭ قازاقستانداعى ەلشىسى ەليشكا جيگوۆانى جانە جاپونيانىڭ ءبىزدىڭ ەلىمىزدەگى ەلشىسى يتيرو كاۆاباتانى ديپلوماتيالىق قىزمەتتەرىنىڭ اياقتالۋىنا بايلانىستى قابىلدادى.

سەنات توراعاسى قازاقستان مەن سول مەملەكەتتەردىڭ اراسىنداعى ساياسي، ەكونوميكالىق جانە مادەني-گۋمانيتارلىق سالالارداعى جان-جاقتى ىنتىماقتاستىقتى نىعايتۋداعى ناتيجەلى ءارى اۋقىمدى ەڭبەكتەرى ءۇشىن ەلشىلەرگە العىس ءبىلدىردى.

ق.توقاەۆ چەحياعا قاتىستى ءبىزدىڭ مەملەكەتتەرىمىزدىڭ اراسىنداعى ەڭ جوعارى دەڭگەيدەگى قارىم-قاتىناستار، ونىڭ ىشىندە زاڭ شىعارۋ ورگاندارىنىڭ ۇنقاتىسۋى قارقىندى سيپاتقا يە بولعانىن اتاپ ءوتتى. چەحيا پارلامەنتى قوس پالاتالارىنىڭ باسشىلارى استاناعا بىرنەشە رەت ساپارلاپ كەلگەن بولاتىن.

قازاقستان مەن جاپونيا اراسىنداعى ىنتىماقتاستىق تۋرالى ايتا كەلىپ، سەنات توراعاسى پرەزيدەنت ن.نازارباەۆتىڭ 2016 جىلعى قاراشا ايىندا جاپونياعا جاساعان ساپارىنىڭ ەرەكشە ماڭىزىنا توقتالدى. ق.توقاەۆ جاپونيا پارلامەنتىمەن قاتىناستاردى ودان ءارى نىعايتۋعا ىقىلاستى ەكەنىن ايتىپ، ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋدىڭ زور كەلەشەگىن اتاپ ءوتتى.

ق.توقاەۆ ەلشىلەرگە العىس حاتتارىن تابىستادى.

Abai.kz