قازاق ادەبيەتى انتولوگيالارىن بۇۇ-نىڭ 6 تىلىنە اۋدارۋ جوباسى

«رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسيا حاتشىسى، قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ا.ع.بالاەۆا قازىرگى قازاق ادەبيەتى انتولوگيالارىن بۇۇ-نىڭ 6 تىلىنە اۋدارىپ جاتقان اۋدارماشى، رەداكتورلارمەن كەزدەستى. كەزدەسۋدە ۇلىبريتانيا، يسپانيا، فرانتسيا، رەسەي جانە قىتاي مەملەكەتتەرىنەن كەلگەن اۋدارماشى-ادەبيەتشىلەرمەن قازاق ادەبيەتى جيناقتارىن اۋدارۋ بارىسى تالقىلاندى.

ايدا عالىمقىزى قازاق ادەبيەتىنىڭ ۇزدىك ۇلگىلەرىن بۇۇ-نىڭ 6 تىلىنە اۋدارۋ باستاماسى بۇرىن-سوڭدى بولماعان ەرەكشە جوبا ەكەندىگىنە  توقتالىپ، «ءبىزدىڭ باستى مىندەتىمىز – اۋدارمانىڭ كوركەمدىك ساپاسى  قامتاماسىز ەتۋ. بىز ول ءۇشىن قاجەت دۇنيەنىڭ بارلىعىن ىستەپ جاتىرمىز. سوندىقتان، اۋدارماشىلار مەن ءبىزدىڭ اۆتورلاردىڭ وسىنداي كەزدەسۋى وسى مىندەتتى ورىنداۋىمىزعا سەپتىگىن تيگىزەدى دەگەن ۇمىتتەمىن»، - دەدى. سونىمەن بىرگە، قر پرەزيدەنتى ن.ءا.نازارباەۆتىڭ «رۋحاني جاڭعىرۋ»، «ۇلى دالانىڭ جەتى قىرى» ماقالالارىندا ايتىلعان مادەنيەت پەن ادەبيەتتى دامىتۋعا باعىتتالعان شارالارىمەن تانىستىرىپ، ونى ىسكە اسىرۋعا اتسالىسۋعا شاقىردى.

قازىرگى تاڭدا انتولوگيانىڭ اعىلشىن، فرانتسۋز، يسپان جانە ورىس تىلدەرىندەگى جولما-جول اۋدارما اياقتالدى. قىتاي مەن اراب تىلدەرىندەگى جولما-جول اۋدارما پروتسەسى ءجۇرىپ جاتىر. اۋدارماشىلار مەن قازاقستاندىق اۆتورلاردىڭ مۇنداي كەزدەسۋى اۋدارمانى تۇپنۇسقا ماتىنگە مەيلىنشە جاقىنداتىپ، ونىڭ كوركەمدىك ساپاسىن قامتاماسىز ەتپەك.

Abai.kz