وزبەكستانداعى اقپارات قۇرالدارىنىڭ حابارلاۋىنشا، بۇعان دەيىن وزبەكستاندا بۇعاتتاۋلى بولعان مەسسەندجەرلەر مەن ۆيدەوحوستينگ VPN-قوسىمشا جانە پروكسي-سەرۆەرلەرسىز (انونيمايزەرلەر) جۇمىس ىستەپ تۇر.
الەۋمەتتىك جەلىلەرگە ەركىن كىرۋگە بولاتىنىن بارلىق ينتەرنەت-پروۆايدەر تۇتىنۋشىلارى راستادى. سوعان قاراعاندا، الەۋمەتتىك جەلىلەردى كەزىندە بارلىق پروۆايدەرلەر ءبىر ۋاقىتتا بۇعاتتاعان بولۋى كەرەك. سوعان قاراماستان تۇرعىندار VPN جانە پروكسي-سايتتار قولدانۋدى ۇيرەنىپ، بۇعاتتالعان سايتتارعا كىرە الدى.
ايتا كەتەرلىك جايت، ەلدەگى ءىرى مەملەكەتتىك اقپارات اگەنتتىكتەرى مەن مينيسترلىكتەردە Facebook جانە YouTube ەشقانداي VPN مەن انونيمايزەرسىز اشىلىپ تۇرعان.
وزبەكستاندا Facebook جەلىسى وتكەن جىلى كۇزدە اشىلماي قالدى. ودان سوڭ YouTube اشىلۋدى قويدى.
20-22 قاڭتاردا پرەزيدەنت شاۆكات ميرزياەۆ گەرمانياعا ساپارمەن بارادى. بىرقاتار قولدانۋشىلار ەلدەگى مۇنداي وزگەرىستەردى وسى ساپارمەن بايلانىستىرىپ وتىر.
Abai.kz
