پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا «ەۋرازيالىق ەكونوميكالىق وداقتا تاۋارلاردى سايكەستەندىرۋ قۇرالدارىمەن تاڭبالاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى.

كەلىسىمگە 2018 جىلعى 2 اقپاندا ەۋرازيالىق ۇكىمەتارالىق كەڭەستىڭ وتىرىسىندا الماتى قالاسىندا قول قويىلعان بولاتىن.

كەلىسىمنىڭ نەگىزگى ماقساتى ەۋرازيالىق ەكونوميكالىق وداقتا تاۋارلاردىڭ زاڭدى اينالىمىن، تۇتىنۋشىلاردىڭ قۇقىقتارىن قورعاۋدى جانە ولاردى جاڭىلىستىراتىن ارەكەتتەردىڭ الدىن الۋدى قامتاماسىز ەتۋ ءۇشىن تاۋارلاردى سايكەستەندىرۋ قۇرالدارىمەن تاڭبالاۋ سالاسىندا كەلىسىلگەن، ۇيلەستىرىلگەن ساياسات جۇرگىزۋ بولىپ تابىلادى.

قۇجات تاڭبالاناتىن تاۋارلاردىڭ اينالىمىنا باقىلاۋدى جۇزەگە اسىرۋ جولىمەن كولەڭكەلى ەكونوميكانىڭ كولەمىن قىسقارتۋعا جانە بيۋدجەتكە سالىق تۇسىمدەرىن ۇلعايتۋعا باعىتتالعان.

كەلىسىم ەۋرازيالىق ەكونوميكالىق كوميسسيا كەڭەسىنىڭ شەشىمىمەن تىزبەسى بەكىتىلەتىن تاڭبالانۋعا جاتاتىن تاۋارلاردى ەۋرازيالىق ەكونوميكالىق وداق شەڭبەرىندە بىرىزدەندىرىلگەن سايكەستەندىرۋ قۇرالدارىمەن تاڭبالاۋ ءتارتىبىن ايقىندايدى.

سونىمەن قاتار، كەلىسىممەن سايكەستەندىرۋ قۇرالدارىنىڭ بىرىڭعاي ءتىزىلىمىن قالىپتاستىرۋ جانە جۇرگىزۋ، وداققا مۇشە مەملەكەتتەردىڭ ەۋرازيالىق ەكونوميكالىق كوميسسيانى تاۋارلاردى تاڭبالاۋدى ەنگىزۋ جونىندە نيەتتەرىنىڭ بار ەكەندىگى تۋرالى حاباردار ەتۋ، وداققا مۇشە مەملەكەتتەردىڭ ۋاكىلەتتى ورگاندارى اراسىنداعى اقپاراتتىق ءوزارا ءىس-قيمىل ءتارتىبى، سونداي-اق ولارعا تاڭبالانۋعا قويىلاتىن تالاپتار مەن تاڭبالاۋ شارتتارى قولدانىلمايتىن تاۋارلار رەگلامەنتتەلەدى.

كەلىسىم اياسىندا وداققا مۇشە مەملەكەتتەردىڭ ۇسىنىستارى، تاۋارلاردى تاڭبالاۋدى ەنگىزۋدىڭ ورىندىلىعىن تالداۋدىڭ، بيزنەس جۇرگىزۋ جاعدايىنا تاڭبالاۋ ەنگىزۋدىڭ اسەرى، تاڭبالاۋدىڭ تەحنولوگيالىق مۇمكىندىكتەرى بولۋى تۋرالى اقپاراتتىڭ، سونداي-اق تاۋارلارعا قاتىستى ولاردىڭ اينالىمىنا باقىلاۋدىڭ وزگە جۇيەسىنىڭ جۇمىس ىستەيتىندىگى تۋرالى اقپاراتتىڭ نەگىزىندە كوميسسيا كەڭەسى تاۋارلاردى تاڭبالاۋدى ەنگىزۋ تۋرالى شەشىمدى قابىلدايدى.

وتىرىستا سونداي-اق، «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى قارالدى.

وسى حاتتاماعا ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى 2018 جىلعى 15 ناۋرىزدا ماسكەۋ قالاسىندا قول قويدى.

حاتتامانىڭ ماقساتى 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتىڭ 10-بابىنىڭ 2-تارماعىنا جوعارى كەڭەستىڭ قۇرامىنا مۇشە مەملەكەتتىڭ باسشىسى عانا ەمەس، سونىمەن بىرگە ءوز مەملەكەتىنىڭ زاڭناماسىنا سايكەس جوعارى كەڭەستىڭ قۇزىرەتىنە كىرەتىن ماسەلەلەر جونىندە شەشىمدەردى قابىلداۋ وكىلەتتىكتەرى بەرىلگەن مۇشە مەملەكەتتىڭ ۇكىمەت باسشىسىن قوسۋ مۇمكىندىگىن بەلگىلەۋ بولىگىندە وزگەرىس ەنگىزۋ بولىپ تابىلادى.

ەاەو تۋرالى شارتقا وزگەرىس ەنگىزۋ قاجەتتىگى ارمەنيا رەسپۋبليكاسىنداعى كونستيتۋتسيالىق وزگەرىستەرگە بايلانىستى، ولارعا سايكەس ارمەنيا رەسپۋبليكاسى 2018 جىلعى ساۋىردەن باستاپ ارمەنيا رەسپۋبليكاسى پرەزيدەنتىنىڭ سىرتقى ساياسات سالاسىنداعى نەگىزگى وكىلەتتىكتەرىن ارمەنيا رەسپۋبليكاسىنىڭ ۇكىمەتى مەن پرەمەر-مينيسترىنە بەرۋدى كوزدەيتىن پارلامەنتتىك باسقارۋ نىسانىنا تولىعىمەن كوشكەن بولاتىن.

قۇجاتتار پالاتانىڭ قاراۋىنا بەرىلدى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz