– بيىلعى جاستار  جىلى ءۇشىن مەن دە قۋانىشتىمىن. سەبەبى، بۇل ايتۋلى جىل تالاي قىز-جىگىتكە مۇمكىندىك بەرىپ، تىڭ باستاما-يدەيالارىنا داڭعىل جول اشادى دەپ سەنەمىن. كەشە جاستار جىلىن سالتاناتتى تۇردە اشقان ەلباسى ءوز سوزىندە ينجەنەرلىك-تەحنيكالىق سالا، اقپاراتتىق تەحنولوگيالاردى دامىتۋعا ۇلەس قوسۋ سىندى تاقىرىپتاردى قوزعادى. بۇل ءبىز وقىپ جاتقان ماماندىقتارعا تىكەلەي قاتىسى بار سوزدەر. مەن، ماسەلەن، كەلەشەكتە ەنەرگەتيك-مامان بولىپ شىعامىن.

قازىر اقپاراتتىق تەحنولوگيانىڭ ۇستەمدىك قۇرىپ تۇرعان زامانى. جالىنداپ جانسام دەگەن جاستاردىڭ زامانى! ءبىزدىڭ الماتى ەنەرگەتيكا جانە بايلانىس ۋنيۆەرسيتەتىندە ءبىلىم العىسى كەلەتىن، وسىناۋ ومىردەن ءوز ورنىن تاپقىسى كەلەتىن ستۋدەنت جاستار ءۇشىن بارلىق جاعداي جاسالعان. ءبىزدىڭ ۋنيۆەرسيتەت – ەنەرگەتيكا، اقپاراتتىق تەحنولوگيالار، اۆتوماتيكا، راديوەلەكترونيكا جانە تەلەكوممۋنيكاتسيا سالاسىندا تەك قازاقستاندا عانا ەمەس، بارلىق ورتا ازيا ەلدەرىندە ماماندار دايارلاۋ بويىنشا جەتەكشى تەحنيكالىق جوعارى وقۋ ورىندارىنىڭ ءبىرى بولىپ سانالادى. مەن ءوز وقۋ ورنىمدى ماقتان تۇتامىن. ءبىز جۇمىسسىز قالمايتىنىمىزعا سەنەمىز. سەبەبى، بىزگە سۇرانىس بار. ال قولىندا ديپلومى بار، بىراق «جۇمىس جوق» دەيتىن كەي جاستارعا قازىر «الما ءپىس، اۋزىما ءتۇس» دەيتىن زامان ەمەس، ءوزىڭ ىزدەن، ءوزىڭ جۇگىر، ءوز-ءوزىڭدى كورسەت، تىنبا دەر ەدىم. مەملەكەت بارلىق مۇمكىندىكتى جاساپ بەرىپ وتىر. ال سول مۇمكىندىكتىردى پايدالانىپ، ۇقساتا الماساق، كىمگە وكپەلەيمىز؟! بىزگە بۇگىندە تەك وقۋ، العا ۇمتىلۋ عانا تۇر. مەن ءبىر ءوزىن عانا ەمەس، اينالاسىن دا جىگەرلەندىرىپ جۇرەتىن اشىق-جارقىن، سەرگەك ويلى جاستاردى ارقاشان ۇلگى تۇتامىن. ءبىز – قازاقستاننىڭ ەرتەڭىمىز!

ناۋرىز مىرزاتوۆ

الماتى ەنەرگەتيكا جانە بايلانىس ۋنيۆەرسيتەتىنىڭ 3-كۋرس ستۋدەنتى

Abai.kz