قازىرگى كەزدە 12 مەملەكەت رەسمي مالىمدەمە جاسادى: يسپانيا، گەرمانيا، ۇلىبريتانيا، فرانتسيا، اۆستريا، شۆەتسيا، نيدەرلاند، فينليانديا، دانيا، پورتۋگاليا، لاتۆيا جانە ليتۆا. اتالعان ەلدەردىڭ ءبارى گۋايدونى مەرزىمىنەن بۇرىن دەموكراتيالىق جولمەن قايتا سايلاۋ وتكەنشە، ۋاقىتشا پرەزيدەنت رەتىندە تانيتىنىن جەتكىزگەن.
مەرزىمىنەن بۇرىن پرەزيدەنتتىك سايلاۋ وتكىزۋ ءۇشىن، بىرقاتار ەۋروپا ەلدەرىنىڭ نيكولاس مادۋروعا بەرگەن 8 كۇندىك ۋاقىتى اياقتالعان. مادۋرو ازىرگە تەك پارلامەنتتىك سايلاۋ وتكىزۋگە عانا كەلىسىپ وتىر.
بىراق ءالى ەۋروپا وداعى ەلدەرى بىردەي گۋايدونى پرەزيدەنت رەتىندە مويىندامادى. دۇيسەنبى كۇنى ەو تاراتقان مالىمدەمەدە "ۇلتتىق اسسامبلەيا (پارلامەنت) مەن ونىڭ باسشىسىنا قولداۋ بىلدىرەدى" دەگەن. سونىمەن بىرگە گۋايدونى پرەزيدەنت رەتىندە تانۋ ءۇشىن ءار مەملەكەت جەكە مالىمدەمە جاريالايتىن بولادى. قازىرگى كەزدە يتاليا پارلامەنت جەتەكشىسىن پرەزيدەنت رەتىندە تانۋعا قارسى.
قۇراما شتاتتار مەن لاتىن امەريكانىڭ بىرقاتار ەلدەرى وسىعان دەيىن گۋايدونى مويىنداعان.
بىراق ۆەنەسۋەلانى باسقارۋ مەن كۇش قۇرىلىمدارىن تىزگىندەۋ ءالى مادۋرونىڭ قولىندا قالىپ وتىر. ونى رەسەي، كۋبا، تۇركيا جانە قىتاي ەلدەرى زاڭدى پرەزيدەنت رەتىندە مويىندايدى. مادۋرو دۇيسەنبى كۇنى اقش جەتكىزەتىن گۋمانيتارلىق كومەكتەن باس تارتۋعا شاقىردى. ول سونىمەن بىرگە اسكەري باسىپ كىرۋگە قارسى قول جيناپ جاتقانىن مالىمدەدى. وعان ۆاشينگتوندى كىنالايدى. مادۋرونىڭ سوزىنشە، ريم پاپاسى فرانتسيسكوعا حات جىبەرىپ، وپپوزيتسيامەن ديالوگ ورناتۋعا كومەكتەسۋىن سۇراعان.
پارلامەنت جەتەكشىسى حۋان گۋايدو بىلتىرعى پرەزيدەنت سايلاۋى زاڭسىز ءوتتى دەپ، ءوزىن ەل باسشىسى رەتىندە جاريالاعان. ۆەنەسۋەلادا قاتتى ەكونوميكالىق داعدارىس جالعاسىپ جاتىر. ازىق-تۇلىك جەتىسپەيدى.
Abai.kz
