قىتايداعى قانداستارىمىز قىسىمعا ۇشىراپ جاتقان كەزدە قول ۇشىن بەرسەك دەپ اتقا قونعاندار از ەمەس. الايدا ول جاقتاعى اعايىندارعا كومەكتەسكىسى كەلەتىندەر كوپ بولعانىمەن، باستارى بىرىكپەيدى. توپ-توپقا ءبولىنىپ الىپ ءبىر-ءبىرىن قارالاعاندا قىتايدان وتكەن جاۋ وسىلاردىڭ وزىندەي كورىنەدى. بۇنىڭ سەبەبى نە، بۇل قوعامدىق ۇيىمداردىڭ باسى نەگە بىرىكپەيدى؟

مەنى تاڭعالدىراتىنى قوعامدىق بىرلەستىكتەر اراسىنداعى داۋ-دامايدا ۇنەمى «جەبەۋدى» كىنالاعاندى جاقسى كورەدى. مەن وسىعان دەيىن دە ايتىپ ءجۇرمىن. «جەبەۋ» مەن «اتاجۇرتتىڭ» اراسىندا ەشقانداي مۇددە قاقتىعىسى جوق. ءبىز ەشقاشان «اتاجۇرت» جايلى تەرىس پىكىر تاراتقان ەمەسپىز. سەنبەسەڭىزدەر ءبىزدىڭ بىرلەستىكتىڭ سايتىنا كىرىپ كورىڭىزدەر. جاقىندا عانا جاريالانعان مۇحتار شاحانوۆتىڭ مالىمدەمەسىن كوشىرىپ باستىق. ال وعان دەيىن «اتاجۇرتقا» قارسى بىردە-ءبىر ماقالا جاريالاعان ەمەسپىز. «جەبەۋدىڭ» سايتىندا عانا ەمەس، ءوز جەكە پاراقشامدا دا ول جىگىتتەردى كىنالايتىن جازبا جاريالاعان ەمەسپىن.

قىدىرالى ومارۇلى العاش «اتاجۇرتتى» قۇرىپ، قازاق كوشىنىڭ باعىتىن سولتۇستىككە بۇرۋدى قولعا العاندا، وعان حابارلاسىپ قولداۋ بىلدىرگەنمىن. بىرگە جۇمىس ىستەۋدى دە ۇسىندىق. الايدا كەيىن بىرلەستىكتىڭ قۇرامى وزگەرۋىنە وراي، ولاردىڭ باعىتى دا وزگەرە باستادى. بۇرىنعىداي بەيبىت جۇمىس ىستەۋدى ەمەس، داۋ-دامايدىڭ ورتاسىنا ءتۇسىپ كەتتى.

مەنىڭشە «جەبەۋدىڭ» اتىنا ايتىلاتىن سانسىز جالا مەن شابۋىلداردىڭ باستاۋ كوزى الەۋمەتتىك جەلىلەردەگى دالەلسىز جەكە پىكىرلەردەن تۋىندايدى. ماسەلەن، WhatsApp جەلىسىندە قىتايدان كەلگەن اعايىنداردىڭ ءتۇرلى توبى بار. ولار رۋ-رۋ بويىنشا نەمەسە ايماق-اۋدان اتاۋلارى بويىنشا قۇرىلعان. ال ول توپتاردا نەشەتۇرلى ادام وتىر. وسى توپتاردا بەلگىسىز بىرەۋلەردىڭ تاراتقان نەگىزسىز پىكىرلەرى كوپشىلىكتىڭ كوزىن الداپ وتىر. سول ءۇشىن اعايىندار WhatsApp-تا تاراعان وسەك-اياڭمەن شەكتەلمەي، وزدەرى ىزدەنىپ وقىپ، ءىستىڭ اق-قاراسىن پارىقتاۋى كەرەك.

ءبىزدىڭ اتىمىزعا ناشار پىكىر ايتاتىن كوپ ساندى ادامدار الەۋمەتتىك جەلىدە ءوز اتتارىمەن وتىرعان جوق. ءتىپتى كوبى ءوز اتى-جوندەرىن دە دۇرىس جازا المايدى. ءسويتىپ، وتىرىپ قوعامدىق ماسەلەنى تالقىلاپ، پىكىرلەر ايتادى. ولار وزدەرى عانا ەمەس كوشىلىكتى دە شاتاستىرىپ وتىر. وسىلاي ءبىزدىڭ اتىمىز ورىندى-ورىنسىز ايتىلا بەرگەن سوڭ «جەبەۋ» دە قىزىل داۋدىڭ ورتاسىندا ءجۇر دەپ ويلايدى. انىعىندا ءبىز ولاردىڭ اتىنا بۇرىن ەشقاناي سىن ايتقان ەمەسپىز. ءتىپتى «اتاجۇرتتاعى» جاقسى جۇمىس ىستەگەن بىرقاتار قىز-جىگىتتىڭ ەڭبەگىن باعالايمىز.

قوعامدىق بىرلەستىكتەردىڭ تارتىسى رۋلىق جىكشىلدىكتىڭ جەمىسى ەمەس پە؟

بۇل دا كوپ كوكەيىندە جۇرگەن سۇراق. بىراق «جەبەۋ» ەشقانداي رۋلىق ۇيىم ەمەس. بۇل ۇيىمدا 30-دان اسا ازامات بار. ءار رۋدان، ءار ايماقتان كەلگەندەر. ونىڭ ۇستىنە ءبارى قىتايدا ۇلكەن قالالاردا، ءىرى وقۋ ورىندارىندا ءبىلىم العان ازاماتتار. قازاقستان العاش تاۋەلسىزدىك العاندا، قىتايداعى قىزمەتى مەن ءۇيىن تاستاپ ەلگە كەلگەندەر. «جەبەۋ» وسىنداي ۇلتجاندى ازاماتتاردىڭ ۇيتقى بولۋىمەن 2009 جىلى قۇرىلعان. ماقساتى – ەلگە قىزمەت ەتۋ.

سىزدەردى قىتايدىڭ تىڭشىسى دەگەن پىكىرلەر كوپ ايتىلىپ جاتىر

بۇنداي جالالى سوزدەر بىزگە شابۋىل جاساۋشىلاردىڭ باستى قارۋى. نەگىزى كىم تىڭشى، كىم ساتقىن ەكەنىن كولدەنەڭ كوك اتتى ەمەس، زاڭ ورگاندارى ايتۋ كەرەك. ءبىز زاڭدى جۇمىس ىستەپ وتىرعان كاسىپكەرلەرمىز. مەملەكەتكە ميلليونداپ سالىق تولەيمىز. ءارى ەلدىڭ قاۋىپسىزدىك ورگاندارىنا سەنىم ارتامىز. ءىستىڭ اق-قاراسىن انىقتايتىن سولار.

الەۋمەتتىك جەلىدە بەلسەندى تۇردە ءبىزدى قارالايتىن نۇرحان سولتانباي دەگەن ازامات بار. مەن ونى الماتىعا شاقىردىم. كۇمانىڭ بولسا كەل، بىرگە پروكۋراتۋراعا بارايىق. سەن ارىزىڭدى بەر، مەن سۇراقتارعا جاۋاپ بەرەيىن دەگەن ەدىم كەلمەدى. بەتپە-بەت كەلمەي، زاڭعا جۇگىنبەي، الەۋمەتتىك جەلى ارقىلى جەل سوزگە جەلىك بەرگەندەردىڭ ءسوزى وسى.

ولاردىڭ بىزگە تاعار باستى ايىبى – قىتاي كونسۋلىمەن جاقىن جۇمىس ىستەيتىنىمىز. الماتىداعى قىتاي كونسۋلى ەلىمىزدەگى ءتورت وبلىس پەن ەكى قالاداعى قىتاي ازاماتتارىنىڭ ماسەلەسىمەن اينالىسادى. ۆيزا دا وسى جەردە راسىمدەلەدى. ال سوڭعى جىلدارى قىتايدان كەلگەن قازاقتاردىڭ ۆيزا الۋى قيىنداپ كەتتى. اۋىرىپ-سىرقايتىندار مەن ءولىم-ءجىتىم جاعدايلارى بولادى. وسىنداي شۇعىل جاعدايدا كونسۋلدىڭ قىزمەتى كەرەك بولادى. وعان قوسا پاسپورتىنىڭ مەرزىمى وتكەن قانداستارىمىز دا كونسۋلعا جۇگىنەدى. وسىنداي ماسەلەلەردى شەشۋ ءۇشىن ءبىز قىتاي كونسۋلىنا حات جازىپ، كەزدەسۋ وتكىزىپ بىرگە جۇمىس ىستەپ ءجۇرمىز. ولارعا اقىل-كەڭەس بەرەمىز، تالاپتارىمىزدى قويامىز.

اتقارعان باستى جۇمىستارىڭىز

ءبىز ەڭ الدىمەن 2017 جىلى زەينەتاقىنى توقتاتپاۋ ماسەلەسىمەن اينالىستىق. قازاقستانعا كوشىپ كەلگەن نەشە ون مىڭ زەينەتكەردىڭ ۇزاق جىلدىق ەڭبەك جەمىسىنەن ايىرىلىپ قالماۋىنا ۇلەس قوستىق. قىتاي كونسۋلىنا، استاناداعى قىتاي ەلشىلىگىنە ازاماتتاردىڭ ارىزىن وتكىزدىك. قىتايدا قامالعان سەگىز قازاقستان ازاماتىنىڭ ماسەلەسى بويىنشا ءتيىستى ورىندارعا حات جازدىق. ءبىز اتقارعان ىستەرىمىزدى جارنامالاعان جوقپىز. ەگەر ساۋاتى بار كىسىلەر بولسا كورىپ-ءبىلىپ وتىر. تاعى ءبىر ايتا كەتەرلىگى، ءبىز جازعان ارىزدارمىز بەن حاتتارمىزعا ەشقاشان اقشا المايمىز. ال كەيبىر بىرلەستىكتەر ءار ارىزعا 3 مىڭنان 7 مىڭ كولەمىندە اقشا الادى.

ءبىزدىڭ ۇستانىم قىتايداعى قازاقتار ماسەلەسىن حالىقارالىق داۋعا اينالدىرماي، ەكى ەل ورتاسىنداعى قارىم-قاتىناس ارقىلى شەشۋ. قىتايداعى قازاقتاردى تەك قازاقستان بيلىگى عانا قۇتقارا الادى. ال سىرتقى كۇشتەردىڭ ءبىر پايداسى بولسا، 20 جىل بويى ۇرانداتىپ جۇرگەن تيبەت پەن ۇيعىرلاردىڭ ماسەلەسى شەشىلەر ەدى عوي. ءبىز ىستەگەن جۇمىستار «جەبەۋدىڭ» سايتىندا انىق جازىلعان.

ءبىز وتكەن جىلى تامىز ايىندا قىتايعا 17 ادامنان تۇراتىن دەلەگاتسيا باردىق. ءبىزدى قىتايدىڭ ءۇش مينيسترلىگىنىڭ وكىلدەرى قابىلدادى. بۇل ولاردىڭ قازاقستانعا دەگەن زور قۇرمەتى. سول كەزدە قىتاي ءىىم-ءنىڭ ورىنباسارى ءبىزدىڭ ارىزىمىزدى تىڭداپ، قازاقستان مەن قىتايدىڭ اراسىندا شەشىلمەيتىن ماسەلە جوق ەكەنىن ايتىپ، سولتۇستىك شينجاڭداعى ىستەر جونىنە كەلەدى دەپ ۋادە بەرگەن.

ورالماندار اراسىنداعى داۋ-داماي ادەيى ۇيىمداستىرىلىپ وتىر ما؟

بۇل ءسوزدى كوپتەن بەرى ايتىپ ءجۇرمىن. ەلىمىز تاۋەلسىزدىك العالى شەتەلدەن ميلليوننان اسا قانداسىمىز كوشىپ كەلدى. ەلدەگى قازاقتىڭ ۇلەس سالماعى ارتتى. بۇعان قوسا ەلگە كەلگەن ورالمانداردىڭ بىرلىگى ارتىپ، ىرگەلى ەل بولا باستاعانى كورىندى. ماسەلەن، 2013 جىلى اسقار جاكۋلين دەگەن كاسىپكەر ازامات شىعىس قازاقستان وبلىسى تارباعاتاي اۋدانى قىزىل كەسىك اۋىلىندا اتاسى جاكۋلاعا ارناپ اس بەردى. استى ۇيىمداستىرۋشىلاردىڭ ءبىرى بولدىم. سول اۋىلعا الماتىدان جانە وزگە قالالالاردان تايىلى-تاياعىمىزبەن باردىق. ءبىر اۋىلدى تويعا بارعاندار باسىپ كەتتى. «ءبىز دە ەل بولىپپىز عوي، كىم ەكەنىمىزدى ءبىلدىرىپپىز. الۋعا ەمەس، بەرۋگە كەلگەنبىز. رەسپۋبليكا كولەمىندە ات شاپتىردىق، بايگەگە كولىك تىكتىك» دەپ وزىمىزشە دۇرىلدەپ قۋاندىق. وسىدان كەيىن 2014 جىلى شىعىس قازاقستانداعى قالبا تاۋدا ەر جانىبەك باتىردىڭ 300 جىلدىعى ءوتتى. 2016 جىلى پارلامەنت ءماجىلىسىنىڭ سايلاۋى باستالدى. وسى كەزدەردە «ورالماننان دەپۋتات كەرەك» دەپ بەلسەندىلەر وزدەرىن، ءبىر-ءبىرىن ۇسىنا باستادى. وسىنىڭ ءبارى بىرەۋلەرگە ۇناماعان بولۋ كەرەك. شەتەلدەن كەلگەن قازاقتاردىڭ اراسىنا جىك سالۋشىلار پايدا بولدى.

بيىل قاڭتاردا قحر قۇرىلعانىنىڭ 70 جىلدىق تويىنا قاتىسىپ قايتتىڭىز با؟

بىزگە شابۋىلداۋشىلار اقپاراتتى ادەيى بۇرمالاپ وتىر. قىتايدىڭ مەملەكەتتىك مەرەكەسى قاڭتاردا ەمەس قازان ايىندا وتەدى. ال مەن قاتىسىپ قايتقان جينالىس ناۋرىز ايىندا وتەتىن پارلامەت جينالىسىنا دايىندىق. مەن بۇل جينالىستا نۇرلان ابىلماجىنمەن كەزدەسىپ، بىلتىر استانادا بەرگەن ۋادەسىنىڭ ورىندالۋىن قۋزادىم. ءبىرىنشى كوتەرگەن ماسەلەم، ەكى ەلدە ءبولىنىپ قالعان قانداستاردىڭ ۆيزا الا الماۋى بولدى. ەلەكتروندى ۆيزا مەن تۋريستىك ۆيزا ورالمان باۋىرلارعا قول جەتىمسىز بولىپ وتىر. وسىنى نازاردا ۇستاۋدى ۇسىندىم. سودان كەيىن قىتايدا قىزمەت اتقارعان توعىز كىسىنىڭ زەينەتاقىسى توقتاتىلعان. ول كىسىلەردىڭ وزدەرى جازعان ارىزدان اپارىپ تاپسىردىم. اتاپ ايتاندا، گۇلجانار قينايات، توقان ماكەي سىندى كەزىندە شينجاڭ تەلەارناسىندا ىستەگەن ازاماتتار مەن اسىلحان بەگەن دەگەن اقساقالدىڭ وزدەرى قول قويعان حاتتارىن جەتكىزدىم.

الەۋمەتتىك جەلىدە داۋلاسقانشا ماسەلەنى سوتتا شەشكەن وڭ بولار ما ەدى؟

بىرىنشىدەن، مەن ءۇشىن ءار قازاق - قادىرلى. ەكىنشىدەن، جاسىم ۇلعايعان اداممىن، تالاي وتكەلەكتەن وتتىك. سول ءۇشىن ومىرلىك تاجىريبەسى از جاستاردىڭ بىلمەستىكپەن بىزگە جاساعان شابۋىلدارىنا كەشىرىمدىلىكپەن قاراپ كەلدىك. ولاردىڭ ۇستانعان جولى دۇرىس بولماسا دا، مۇرات-ماقساتتارى قازاققا پايداسىن تيگىزۋ بولاتىن. وسى جاستار ءۇشىن بۇعان دەيىن سوتقا ارىز جازۋ جايلى ويلامادىق. ال قازىر «اتاجۇرتتا» جاستار قالعان جوق. كوبى ءوزىم سەكىلدى قىرىقتان اسىپ، ەلۋدى ەڭسەرگەندەر. سول ءۇشىن ەندىگى اڭگىمە بولەك. سوت بولادى. ونى اتتانداپ ايتۋدىڭ قاجەتى جوق. ءۇش ءتۇرلى ارىز الماتى قالاسى، الماتى وبلىسى قۇقىق قورعاۋ ورگاندارىنا ءتۇستى. بىراق ءبىز «اتاجۇرت جاستارىن» سوتقا بەرگەلى وتىرعان جوقپىز. تەك بەلگىلى ءبىر ادامداردى عانا.

قىتايداعى تۇزەتۋ لاگەرىنەن شىققاندار نە ءۇشىن «جەبەۋگە» ەمەس «اتاجۇرتقا» كەلىپ العىس ايتادى؟

مەنىڭ جەكە نومەرىمە، پوچتاما كەلگەن العىس حاتتار از ەمەس. مەن ولاردى جارنامالاپ جاتقان جوقپىن. ءبىزدىڭ ىقپالىمىزبەن بوستاندىققا شىققاندار بىزگە ارينە العىسىن ايتقان. ونى جاريالاۋ مىندەتتى ەمەس. ءتىپتى كەزىندە مەنىڭ اتىما اۋىر سىن ايتقانداردىڭ ءوزى كەيىنگى كەزدەرى جەكەمە جازىپ، كەشىرىم دە سۇراپ جاتىر.

بۇل جەردە تاعى ءبىر ايتا كەتەرلىگى، قىتايداعى ساياسي ۇيرەنۋدەن شىققاندار بىردەن قازاقستانعا كەلە المايدى. ولار الدىمەن ءۇش اي باقىلاۋدا بولادى. قازاقستانعا كەلگەن بەس ادامدى بىلەم. بوساپ شىققانداردىڭ ءوزى ءبىر تۋىسىن نە جاقىنىن كەپىلدىككە قويىپ وتىر. سوندىقتان "مەن قىتاي لاگەرىنەن شىقتىم" دەگەننىڭ ءبارى شىن ەمەس. ءبىر انىعى ەلباسىنىڭ، ءسىم-ءنىڭ ارالاسۋىمەن قىتايداعى قازاقتار ماسەلەسى وڭ شەشىمىن تاۋىپ جاتىر.

«جەبەۋ» بىرلەستىگى قازاقستاندا زاڭدى تىركەلگەن. ال قىتايدا شە؟

ءبىز 2009 جىلى قر ادىلەت مينيسترلىگى تاراپىنان تىركەۋدەن وتكەنبىز. ال قىتايدا تىركەلگەن دەگەن وتىرىك اڭگىمە. ولار دا اقىماق ەمەس، شەتەلدىڭ ۇيىمىن وزدەرىنە تىركەيتىندەي. مەن بىلسەم، ەۋروپادا 2400-دەن اسا قىتايدان كەتكەندەر قۇرعان قوعامدىق ۇيىمدار بار. بۇل ەۋروپادا قالىپتى جاعداي سانالادى. قىتاي تاراپى وسى ۇيىمدارمەن جاقسى قارىم-قاتىناستا. بۇل ادام شوشيتىن ءىس ەمەس. قايتا قىتاي بيلىگىمەن بايلانىسقا شىعۋعا مۇمكىندىك. قانداستارىمىزدىڭ ماسەلەسىن ول ەلدىڭ جاۋاپتى ورگاندارىنا ورنىمەن جەتكىزىپ وتىرمىز.

قىتاي قىسىمىنداعى قازاقتاردى كىم قۇتقارا الادى؟

بۇل ماسەلەنى ءبىر شەشسە قازاقستان پرەزيدەنتى مەن ءسىم عانا شەشە الادى. ال باسقالاردان ءۇمىت كۇتۋ بەكەر. ەلباسى قىتاي باسشىلارىمەن كەزدەسۋدە وسى ماسەلەنى كوتەرگەن. بىراق بۇل ءىس حاتتاماعا تۇسپەگەن. بۇدان تىس ءسىم-دە بىرنەشە مارتە قىتايعا بارىپ، جۇمىس ىستەدى. وسىنىڭ ارقاسىندا ول جاقتاعى قانداستىرمىزعا جاسالعان قىسىم باسەڭدەدى. ال بىرەۋلەر ورايدان پايدالانىپ، وسىنى ءوز اتتارىنا جازعىسى كەلەدى. شەتەلدى شۋلاتۋ ارقىلى شەشتىك دەپ. قايتالاپ ايتام، قىتايدىڭ ىشكى ءىسىن ايقاي-شۋمەن شەشۋ قيىن. مىسالعا تاعى دا ۇزاق جىلدار بويى حالىقارالىق سوتقا ارىزدانىپ جۇرگەن ۇيعىرلار مەن تيبەتتەردى ايتۋعا بولادى.

دەمەك قازاقتىڭ ماسەلەسى دە حالىقارالىق داۋ ارقىلى شەشىلمەيدى. وسىلاي دەپ وتىرىك ايتقاندار حالىقتىڭ كوز جاسىنان ۇيالۋ كەرەك. جىلاپ وتىرعان حالىقتىڭ اقشاسىن الىپ، ارىز جازعىزىپ حالىقتى الداۋعا بولمايدى. بۇل حالىقتىڭ كوز جاسىمەن بيزنەس جاساۋ بولىپ سانالادى. ەرتەڭ بارلىق ماسەلە اشىققا شىققاندا ەلدىڭ بەتىنە قالاي قاراۋعا بولادى.

سەرىكجانمەن اشىق سۇحباتقا شىعۋعا دايىنمىن

«تارام-تارام جول بار، ءبارى مەككەگە اپارادى» دەگەندەي ءبارىمىزدىڭ ماقساتىمىز ءبىر بولسا تۇسىنىسەيىك. اركىم ءوز جولىمەن جۇمىس ىستەسىن. ول قاتتى ايتسىن، مەن كەلىسسوز ارقىلى جۇمىس ىستەيىن. بىراق ءوزارا تارتىستى قويايىق. جالا جابۋدى توقتاتايىق. وتكەندە سەرىكجاندى بەتپە-بەت پىكىر الماسۋعا شىقىردىم. كەلمەدى. تاعى شاقىرام. وسى «Abai.kz» اقپاراتتىق پورتالدىندا كەزدەسۋگە دە دايىنمىن. قاتار وتىرىپ سويلەسەيىك. حالىق اراسىنداعى تەرىس پىكىر مەن داۋ-دامايدى شەشەيىك.

سوڭعى كەزدەرى قىزۋ تالقىعا تۇسكەن سايراگۇل مالىمدەمەسى جايلى

سايراگۇلگە بۇكىل ەل بولىپ قولداۋ ءبىلدىرىپ كەلدىك. ەڭ ماڭىزدىسى سايراگۇلدى حالقىنا ادال ابزال قۇسپان دەگەن كەرەمەت ازامات قورعاپ ءجۇر. سول ءۇشىن ءبىز ايقاي-شۋعا بارماي ابزالعا سەنۋىمىز كەرەك. ابزال وسى ءىستى سوڭىنا شىعارا الادى. سايراگۇلدى ەشقانداي شەتەل قۇتقارا المايدى. ونى قازاقستان زاڭدارى مەن قازاقستان حالقى قۇتقارادى. سايراگۇلدىڭ مالىمدەمەسى ەل اراسىندا ۇلكەن تۇسىنىسپەۋشىلىك تۋعىزدى. مەنشە بۇنىڭ ارتىندا جاسىرىن ادامدار تۇر. سايراگۇلدى ساياسي قۇرال رەتىندە پايدالانۋ دا بولىپ جاتىر.

الداعى جوسپارلار جايلى

ءبىز وسى ۋاقىتقا دەيىن زاڭ اياسىندا قانداستارىمىز ءۇشىن قىزمەت اتقارىپ كەلدى. جالعاستى وسى باعىتتا جۇمىس ىستەيمىز. ءوز ۇستانىمىمىزدا تۇرامىز. قىتاي كونسۋلىمەن جالعاستى جۇمىس ىستەيمىز. سونىڭ ارقاسىندا پاسپورتتارىنىڭ مەرزىمى وتكەن جيىرما قانداسىمىزدىڭ تولقۇجاتىن جاڭالاپ بەردىك. سولارمەن بىرلەسە قىتاي بيلىگىنە ءوتىنىش، تالاپتارىمىزدى جەتكىزىپ وتىرمىز. ەندىگى باستى جۇمىس «ورالمان كۋالىگىنىڭ» ۋاقىتى وتكەن نەشە ون مىڭداعان قانداستاردىڭ ماسەلەسىن شەشۋ. وسى ءىس جايلى وزدەرىڭىزبەن («Abai.kz») بىرلەسىپ مالىمدەمە جاساعان بولاتىنبىز. بۇل ماسەلە ناۋرىز ايىنىڭ اياعىنان مامىر ايىنىڭ باسىنا دەيىن شەشىمىن تابادى دەپ وتىرمىز. تاعى ءبىر ماڭىزدى جۇمىس، قازاق كوشىن سولتۇستىككە باستاۋ بولىپ وتىر. وعان قوسا قازاق جاستارىن ساۋداعا بەيىمدەۋ جاعىن دا قاراستىرىپ جاتىرمىز. جاستارىمىزدىڭ تۇرمىستىق جاعدايىن جاقسارتۋ ءۇشىن جۇمىس ىستەيمىز.

Abai.kz