بيىل ءوتۋى ءتيىس حالىق ساناعى ءبىر جىلعا شەگەرىلدى دەپ حابارلايدى Sputnik سايتى. قازىر وسى ماسەلەگە بايلانىستى مەملەكەتتىك ورگاندار مەن اكىمدىكتەر ۇكىمەت قاۋلىسىن قاراستىرىپ جاتقان كورىنەدى. ەگەر، قاۋلى قابىلدانسا، حالىق ساناعى 2020 جىلى 5 اقپان مەن 5 ناۋرىز ارالىعىندا وتەدى.

تاۋەلسىزدىك العان جىلداردان بەرى قازاقستاندا حالىق ساناعى ەكى رەت وتكەن. العاش 1999 جىلى بولعان حالىق ساناعىندا قالا جانە اۋىل تۇرعىندارىنىڭ سانى 14 981 900 ادامدى قۇراعان. ال، وسى ساناقتى جۇرگىزۋ ءۇشىن مەملەكەت قازىناسىنان 1 ملرد تەڭگە كولەمىندە قارجى جۇمسالىپتى.

ەكىنشى ساناق 2009 جىلدىڭ اقپان-ناۋرىز ايلارىندا جۇرگىزىلدى. ول كەزدەگى ناتيجە بويىنشا قازاقستان رەسپۋبليكاسىنداعى حالىقتىڭ سانى 17 200 000 ادام بولعان. ون جىل بۇرىنعى ساناقتى جۇرگىزۋگە بيۋدجەتتەن 6 ملرد تەڭگە بولىنگەن.

ال، بيىل ءوتۋى ءتيىس ساناققا مەملەكەت قازىناسىنان 8,8 ميلليارد تەڭگە بولىنگەن بولاتىن. ۇلتتىق ەكونوميكا ءمينيسترى تيمۋر سۇلەيمەنوۆ بۇل ساناقتىڭ ەلەكتروندى فورماتتا وتەتىنىن دە مالىمدەگەن ەدى. الايدا، مينيسترلىككە قاراستى ستاتيستيكا كوميتەتى “ۇلتتىق ساناققا دايىندالۋ مەن جۇرگىزۋ جۇمىستارىنا بايلانىستى بىرقاتار ۇيىمداستىرۋشىلىق جانە نۇسقامالىق جاعدايلاردى ەسكەرە كەلە، قازاقستان حالقىنىڭ ساناعىن 2020 جىلدىڭ باسىندا وتكىزۋ شەشىمى قابىلداندى",-  دەپ مالىمدەدى.

ءازىمباي عالي، ساياساتتانۋشى-دەموگراف:

ساناقتىڭ نە ءۇشىن شەگەرىلگەنىن بىلمەيدى ەكەنمىن. بىراق، قاشان وتسە دە بۇل ساناقتا الدىڭعى قاتەلىكتەر قايتالانباۋى كەرەك.

بىرىنشىدەن، ساناققا بولىنگەن اقشا ۇرلانباسا. وسىنىڭ الدىنداعى ساناقتىڭ اقشاسى ۇرلانعانىن بىلەمىز. سونىڭ سالدارىنان ساناق ءساتتى بولىپ شىققان جوق.

ەكىنشىدەن، ساناقتىڭ ناتيجەسى ساياسي ماقساتتارمەن بۇرمالانباۋ كەرەك. سەبەبى، قازىر بىزگە ناقتى دەرەك قاجەت. جانە، ۇلتتىق يدەنتيفيكاتسيا، اسسيميلاتسيا ۇردىستەرى تولىق قامتىلسا دەگەن ويىم بار.

ارينە، حالىق سانى تۋرالى ستاتيستيكا كوميتەتىنىڭ ناقتى دەرەكتەرى بار عوي. بىراق، ەسىگىڭدى اشىپ، حال-جاعدايىڭدى سۇراپ، تەك قانا ساناقتىڭ ەمەس، سول وتباسىنىڭ الەۋمەتتىك جاعدايى تۋرالى دا تياناقتى ەسەپ الىنسا دۇرىس بولادى. ويتكەنى الدىڭعى ەسەپ وتىرىك بولعان. ون جىلدا نە وزگەرگەنى تۋرالى ناقتى دەرەكتەر الىنۋى كەرەك.

دوس كوشىم، ساياساتكەر:

ساناقتىڭ قاي كەزدە وتەتىنى اسا ماڭىزدى ەمەس. ماسەلە، قانداي ماقساتپەن شەگەرىلگەنىندە دەپ ويلايمىن. ول سونداي ءبىر ۇلكەن جۇمىس ەمەس. سوندىقتان بۇعان الدىن-الا دايىندالۋىمىز كەرەك دەگەندى ونشا تۇسىنبەيمىن.

ارينە كەيبىر ازاماتتار بۇل كەزەكتەن تىس سايلاۋعا بايلانىستى شەگەرىلدى دەپ ويلاۋى مۇمكىن. الايدا، كەزەكتەن تىس سايلاۋدىڭ بولمايتىنىن پرەزيدەنتتىڭ ءوزى ايتتى. سوندىقتان مۇنىڭ استارىندا باسقا دۇنيە جاتۋى مۇمكىن. جالپى، بۇل ماسەلەگە ناقتى بىردەڭە ايتۋ قيىن.

ءتۇيىن.

حالىق ساناعى قاي ۋاقىتتا، قالاي وتسە دە، قازاق حالقىنىڭ سانى ساياسي ماقساتتارمەن بۇرمالانباۋى ءتيىس. جانە، قازاقستانداعى وزگە ۇلت وكىلدەرىنىڭ  دە سانى ناقتى كورسەتىلۋى قاجەت. سونداي-اق، شەتتەگى قانداستاردىڭ دا وتانعا ورالۋىنا بارىنشا جاعداي جاسالسا دەيمىز. ەڭ باستىسى، ەلىمىزدەگى دەموگرافيالىق احۋالدىڭ جاقسارۋىنا ۇلەس قوسىپ وتىرعان كوپبالالى انالاردىڭ جاعدايىنا بەي-جاي قاراۋعا بولمايتىنىن تۇسىنۋگە ءتيىسپىز.

نۇربيكە بەكسۇلتانقىزى

Abai.kz