قوستانايدا ەلدى-مەكەندەردىڭ، كوشە اتتارىن بۇگىنگى كۇننىڭ تالابىنا سايكەس، تاۋەلسىزدىگىمىزدىڭ تۇعىرىن بەكىتۋ باعىتىندا تۇبىرىمەن وزگەرتۋ ماسەلەسى قاشاندا قيىن جاعدايدا جۇرەدى. وزگە ۇلتتىڭ وكىلدەرى ءالى دە باسىم بولعاندىقتان با، ول بىردەن ساياسي سيپات الىپ، «ويبايعا» بەرگىسىز «اتتانعا» اينالىپ شىعا كەلەدى. دەگەنمەن، مۇنداي قاتتى قارسىلىققا قاراماستان وسىنداعى زيالى قاۋىم بار، وزگەلەرى بار، ايتەۋىر ءبىراز دۇنيە دۇرىستالىپ قالدى.

ماسەلەن، اتاقتى بولشەۆيك تاران اتىنداعى اۋدانعا اتاقتى كلاسسيك جازۋشىمىز بەيىمبەت ءمايليننىڭ ەسىمى بەرىلەتىن بولعاندىعىن ەستىگەندە توبەمىز كوككە ءبىر ەلى جەتپەي قالعاندىعىن نەسىنە جاسىرامىز. سونداي-اق وبلىس ورتالىعىنداعى سول قىزىل كوممۋنيستىڭ اتىنداعى ۇلكەن كوشە دە ەندى تاۋەلسىزدىك دەگەن قاسيەتتى اتقا يە بولدى.

دەگەنمەن، وسىناۋ وركەندى ءىستىڭ بىزدەگى كەيبىر وتكەندى اڭساۋشىلاردىڭ قارسىلىعىنا قاراماستان تابانداپ بولسا دا العا جىلجي بەرەرى اقيقات.

تەك ءبىر وكىنىشتىسى بۇل ىستە بىزدەگى بيلىك تۇتقاسىن ۇستاعان كەيبىر ازاماتتارىمىزدىڭ تىم سولقىلداقتىق كورسەتەتىندىگى. قاجەت كەزىندە ءوز ويىن اشىق ايتۋعا جاسقانىپ، سول ءبىر دەموگوگتاردىڭ جەتەگىندە كەتەتىندىگى قىنجىلتادى. ءدال وسىنداي وقيعا وبلىسىمىزداعى كەنشىلەر قالاسى اتانعان رۋدنىي شاھارىندا كورىنىس بەرىپ، ءبارىمىزدى دە جەرگە قاراتىپ كەتتى. بۇل جاعداي وسى قالانىڭ اكىمى باقىتجان عايازوۆتىڭ جەرگىلىكتى تۇرعىندارعا ەسەپ بەرۋ كەزدەسۋىندە ورىن الدى. سول باس قوسۋدا رومان تۇرلىبەكوۆ دەگەن بىرەۋ سالعاننان-اق اكىمنىڭ جاعاسىنان الا كەتتى.

«مەن وسىنداعى لەنين، وكتياردىڭ 50 جىلدىعى، دزەرجينسكي كوشەلەرىنىڭ اتى وزگەرەدى دەگەندى ەستىدىم. مۇنىڭ كەرەگى نە؟ بۇل ءبىزدىڭ تاريحىمىز ەمەس پە؟ بۇيتە بەرسەك ءتىپتى كەلەشەكتە رۋدنىيدىڭ اتى دا وزگەرەر»,-دەپ ورەكپەي كەلە وعان بۇعان كەتەتىن قارجىنى قالاداعى الەۋمەتتىك ماسەلەلەرگە جۇمساۋ كەرەك قوي دەپ تىكەلەي اقىل ايتۋعا كوشەدى.

ال اكىمىمىز وعان نە دەپ جاۋاپ قايتاردى دەيسىز عوي؟ قۇلاپ قالماڭىز، ورىندىقتان مىقتاپ تۇرىپ ۇستاپ تۇرىڭىز. اكىمىز، ءسىرا، بۇل ساۋالدى كوپتەن كۇتكەن بولۋى كەرەك، قىسقا دا نۇسقا جاۋاپ قاتىپ، بۇل ماسەلەنى بىردەن شەشىپ تاستادى.

«شىنىن ايتقاندا مەنىڭ ءوزىم دە مۇنداي وزگەرتۋگە شىن نيەتىممەن قارسىمىن. 2017 جىلعى دەيىن نەبارى 6 كوشەنى وزگەرتتىك. مەن جاقىندا بۇل ءۇردىستى ءبىرجولاتا توقتاتتىم»،-دەي كەلە الداعى 1,5-2 جىلدا رۋدنىيدا ەشبىر كوشەنىڭ اتىنىڭ وزگەرمەيتىندىگىنە ۋادە بەردى.

مىنەكەي، تاۋەلسىزدىك تۇعىرىن بەكەم ۇستايدى دەگەن اكىمىزدىڭ بۇگىنگى بەينەسى وسىنداي. وسى ورايدا ءبىزدىڭ كوكەيىمىزدە ءبىراز ساۋالداردىڭ تۋىنداپ قالعاندىعى راس. بىرىنشىدەن، بۇل اكىمگە كوشە اتتارىن ەندى وزگەرتپەيمىن دەپ توقتام جاساۋعا كىم قۇقىق بەردى. ەكىنشىدەن، الگىندەي كەرىتارپا ادامداردىڭ «بۇل ءبىزدىڭ تاريح قوي»دەگەن ابدەن تاپتاۋرىن بولعان، بۇگىندە ونىڭ ەشبىر ءمانى قالماعان قاعيداسىماعىنا بەرەر جاۋاپ تا دايىن ەمەس پە؟ وندايلارعا «ونداي تاريح ەسكىرگەن، قازىر جاڭا تاريح جاسالىپ جاتىر. سوندىقتان مۇنداي وزگەرىستەر بۇگىنگى زامان تالابىنان تۋىندايدى» دەپ جاۋاپ قايتارۋعا ابدەن بولار ەدى عوي.

بۇل اكىمنىڭ وسىلايشا باتىل جاۋاپ قايتارماي، نە سەبەپتى قورقا سوعاتىندىعىنا تۇسىنبەدىك. قانشا دەگەمەن ونى بۇل رۋدنىي حالقى سايلاعان جوق قوي. ول جوعارىدان تاعايىندالعان، ەندەشە ەشكىمگە دە جالتاقتاماي تاۋەلسىزدىگىمىزگە قاتىستى ماسەلەلەردى ەركىن شەشۋگە كىم كەدەرگى؟ تەك ءوزىنىڭ تابانسىزدىعى بولماسا.

جايبەرگەن بولاتوۆ

قوستاناي

Abai.kz