الماتىعا ساعىنىپ جەتەسىڭ. ۋاقىت تىعىز. جانتالاسىپ ءجۇرىپ ۇلگەرۋگە تىرىساسىڭ. نەمەرەلەرىمدى «مەگاعا» كىرگىزىپ جىبەرىپ، ەندى دوستارىما اسىقتىم. قوس سەرىكتى كورىپ كەتپەسەم بولماس... اسىرەسە، سەرىك جانبولاتتى! مەن استاناعا كەتكەلى جالعىزسىراپ قالعانىن قاباعىنان سەزىپ ءجۇرمىن. جول جيەگىنە شىعىپ، قول كوتەرگەنىم سول ەدى، توبەسىندە «تاكسي» دەگەن جازۋى بار «جيگۋلي» شيقىلداتىپ توقتاي قالدى. الپىستى القىمداپ قالعان، قىرما ساقال قازاق.

-اسسالاۋمعالەيكۋم! شالياپين-ماتە زالكا!
-نە دەيسىڭ؟
باراتىن جەرىمدى بۇل جولى قاتتىراق ايتتىم. ەستىدى. اقشاسىن دا ەكى-ءۇش رەت ايقايلاپ ايتۋعا تۋرا كەلدى. ايتەۋىر، تۇسىنىستىك. ءمىنىپ الدىم. تۇنگى الماتىمەن ىزعىتىپ كەلەمىز. تاكسيستىڭ قۇلاعى شىنىمەن دۇرىس ەستىمەيدى ەكەن. ارت جاقتا وتىرىپ وزىمە تەلەفون شالعاندارعا جاۋاپ بەرگەندە بايقادىم، مەنىڭ داۋىسىم ەستىلگەن سايىن تاكسيسىم باسىن شۇلعىپ، ماعان بىردەڭەلەردى ايتىپ جاتتى. ءسىرا، وزىنە سويلەپ وتىر دەسە كەرەك!
ىزعىتىپ باراتىن جەرگە دە جەتىپ قالدىق. ساڭىراۋ اعامدى جەڭىنەن تارتىپ جاتىپ ازەر توقتاتتىم. دۇرىس توقتامادى-اۋ دەيمىن، ارت جاق ازان-قازان بولىپ، سيگنالدار بەزىلدەپ جاتتى. تاكسيشى بىلق ەتكەن جوق. ەستىمەسە قايتەدى...

-اعا،مىنە اقشاڭىز!-دەدىم تۇسۋگە ىڭعايلانىپ جاتىپ،-كەلىسكەندەي،قايتارىمسىز!
-ءاي، توقتا!-دەدى ساڭىراۋ اعامىز،-مەنىڭ كوزىم دە كورمەيدى. مىناۋىڭدى دۇرىستاپ كورىپ الايىن...
ماشينەسىنىڭ ىشكى شامىن جاعىپ، اسىقپاي اقشانى اۋدارىپ،توڭكەرىپ قارادى.
-ءبارىبىر كورىنبەيدى،-دەدى ءبىر كەزدە،-ءيمانجۇزدى ەكەنسىڭ،الداماسسىڭ،بارا بەر!
شوشىپ كەتتىم. ءوزى سوقىر، ءارى ساڭىراۋ...قالاي ءجۇر؟
...سەرىك جانبولات كۇتىپ تۇر ەكەن. بولعان جايدى اسىعىپ ايتىپ جاتىرمىن. مىرس ەتتى.
-ءاي، سەن دە!.. الماتىنىڭ ناعىز تاكسيشىسىن مەن كەشە كوردىم،-دەيدى،- تاكسي توقتاتقانمىن. رولدە وتىرعان جىگىتتىڭ سول قولى گيپس! ساۋ وڭ قولىمەن ماشينەسىن ايداپ كەلەدى. ول بالەسى مەحانيكا ەكەن! جىلدامدىق اۋىستىرعاندا ءرولدى جىبەرە سالادى. جانىمدى شۇبەرەككە ءتۇيىپ ازەر وتىرعانمىن. ءبىر كەزدە الگىنىڭ ۇيالى تەلەفونى شىر ەتە قالدى. سابازىڭ ەندى ساۋ قولىمەن تەلەفوندى ۇستاپ، ار جاعىنا جاۋاپ بەرىپ، ماشينەنى شىنتاعىمەن ايداۋعا كوشتى! الماتىنىڭ قاق ورتاسىندا! جۇرەگىم تاس توبەمە شىقتى. جالما-جان توقتاتىپ، اقشاسىن بەرىپ ،ءتۇسىپ قالدىم...

كۇلەمىز-اۋ! نەگىزى كۇلەتىن نارسە ەمەس! ەكىنىڭ ءبىرى تاكسيشى! ەكىنىڭ ءبىرى تاكسيشىلمىز... الىپ قالالاردا مىڭداعان تاكسي مەن تاكسيشىلەر...ولار كىمدەر؟ كىم قاداعالاپ جاتىر؟ ەرتەڭ ءبىر سۇمدىق جاعداي بولعاندا عانا ەسىمىزگە تۇسەتىن شىعار؟...

ارمان سقابىلۇلىنىڭ facebook پاراقشاسىنان

Abai.kz