قر پارلامەنتى سەناتىنىڭ توراعاسى ق.توقاەۆقا

قر پارلامەنتى ءماجىلىسىنىڭ توراعاسى ن.نىعماتۋلينگە

 قر  پرەمەر-ءمينيسترى ب.ساعىنتاەۆقا

«نۇر وتان» پارتياسىنىڭ ءبىرىنشى ورىنباسارى م.اشىمباەۆقا

اشىق حات!

اشىنعان انالاردىڭ نازى!

ەلىمىزدىڭ  كوپتەگەن ءوڭىرى مەن قالالارىندا  الەۋمەتتىك جاعدايلارى تومەن بولۋى سەبەپتى، بالالارعا تولەنەتىن جاردەماقىنىڭ ماردىمسىزدىعىنان، ءۇيسىز جۇرۋدەن، زاڭسىزدىقتاردان، ادىلەتسىزدىكتەردەن  ابدەن اشىنعان كوپ بالالى انالار، انالار مەن بالالارعا جاعداي جاساۋ، ولارعا قارالاتىن مەملەكەتتەن  الەۋمەتتىك  جاردەماقىنى كوبەيتۋ جانە جەڭىلدەتىلگەن باسپانامەن قامتاماسىز ەتۋ، ت.ب. تۋرالى  ۇسىنىس-تالاپتارىن جەرگىلىكتى جەرلەردىڭ  اكىم-باسشىلارى ارقىلى  ۇكىمەتكە اشىق جەتكىزگەن بولاتىن.

وسى جاعدايلاردان كەيىن ىلە-شالا  ۇكىمەتتىڭ كەڭەيتىلگەن وتىرىسى وتكىزىلىپ، ناتيجەسىندە  ۇكىمەتتىڭ جانىنان «كوپ بالالى وتباسىلارعا قولداۋ شارالارىن كۇشەيتۋ جونىندەگى»  جۇمىس توبى  جانە  كوپ بالالى وتباسىلاردىڭ نەگە مۇقتاج ەكەنىن انىقتاپ، ولاردان ۇسىنىستار جيناۋ ءۇشىن  جەرگىلىكتى جەرلەردە  جەدەل شتابتار قۇرىلدى.

قازاقستاننىڭ بولاشاق ۇرپاعىن تاربيەلەپ وتىرعان انالارمەن، كوپ بالالى، جالعىز  باستى انالارمەن جانە مۇگەدەك بالا باعىپ وتىرعان، تۇرمىسى تومەن  انالارمەن كەزدەسكەندە، الەۋمەتتىك جەلى، ۇيالى تەلەفون ارقىلى  سويلەسكەندە تومەندەگى قيىن ماسەلەرىن اشىنا ايتىپ، ۇكىمەتكە  ۇسىنىس-تالاپتارىن جەتكىزۋلەرىن سۇرادى.

1. كوپتەگەن انالار مەملەكەتتەن بالالارعا تولىنەتىن جاردەماقىلاردى، اتاۋلى الەۋمەتتىك كومەكتەردى المايتىنىن جەتكىزىپ، سەبەپتەرىن بىلايشا ءتۇسىندىردى. انالار جەرگىلىكتى اۋدان، اۋىل اكىمدەرى مەن وسى سالاعا جاۋاپتى مەكەمە باسشىلارى مەن قىزمەتكەرلەرى  مەملەكەتتەن بالالارعا بولىنەتىن الەۋمەتتىك كومەك پەن جاردەماقىنى تولەۋدە وتباسىنىڭ كىرىستەرىن، ياعني  اتا-اناسىنىڭ جانە ۇيلەرىندە ەڭبەك ەتەتىن 18 جاستان اسقان ۇل-قىزدارىنىڭ جالاقىلارىن، زەينەت جاسىنداعى ۇلكەن ادامداردىڭ زەينەتاقىلارىن،  مۇمكىندىگى شەكتەۋلى ادامدارعا بەرىلەتىن جاردەماقىنى، ستۋدەنت ۇل-قىزدارىنىڭ شاكىرتاقىلارىن (ستيپەنديا) قوسىپ، سوعان بايلانىستى كوپتەگەن وتباسىلار مەملەكەتتەن بالاعا تولەنەتىن اتاۋلى كومەكتى، جاردەماقىنى  الا الماي جۇرگەندەرىن اشىنا جازۋدا، ايتۋدا.

2. مال- قۇس ۇستايتىن، ۇيىندە ازىن-اۋلاق جەكە كاسىبى، ساۋدا-ساتتىعى بار وتباسىلاردىڭ  كىرىستەرىن ساناپ،   تىپتى ۇيدەگى تاۋىقتىڭ جۇمىرتقاسىن، سيىردىڭ بەرەتىن ءسۇتىن قوسىپ، «جاعدايلارىڭىز وتە كەرەمەت» دەپ، مەملەكەتتەن بالالارعا تولەنەتىن الەۋمەتتىك كومەك پەن جاردەماقىنى بەرمەيدى ەكەن. الايدا مال-قۇستى ۇستاۋعا كەتەتىن، ساۋداعا كەتەتىن شىعىندارىن ەش ەسەپكە الماي، زاڭسىزدىقتارعا باراتىندارىن زار جىلاي ايتادى.

3. سونداي-اق، اتاۋلى كومەك پەن جاردەماقىنى الۋ ءۇشىن قۇجات جيناۋدا ۇلكەن كەدەرگىگە كەزدەسەتىندەرىن، انا-مىنا مەكەمەگە جۇمساپ سەرگەلدەڭگە سالىپ قوياتىندارىن، 3 اي سايىن سول قۇجاتتاردى قايتا سۇراتىندارىن اشىنا جەتكىزدى.

وسىعان وراي اتا-انالار مىنانداي ۇسىنىستار ايتادى.

 انالاردىڭ ۇسىنىس-تالاپتارى

1. انا مەن بالالارعا تولەنەتىن ارنايى  جاردەماقىلار  مەن باسقا دا الەۋمەتتىك كومەكتەر، وتباسىنا كىرەتىن كىرىستەرىنە، ياعني  اتا-اناسىنىڭ جانە ۇيىندە ەڭبەك ەتەتىن 18 جاستان اسقان ۇل-قىزدارىنىڭ جالاقىلارىنا، ۇيىندەگى زەينەت جاسىنداعى ۇلكەن ادامداردىڭ زەينەتاقىلارىنا،  مۇمكىندىگى شەكتەۋلى ادامدارعا بەرىلەتىن جاردەماقىلارىنا، ۇيىندە ستۋدەنت ۇل-قىزدارىنىڭ شاكىرتاقىلارىنا (ستيپەنديا) قاراماستان، مەملەكەتتەن بالاعا تولەنەتىن الەۋمەتتىك كومەكتەر،  جاردەماقىلار  ومىرگە كەلگەن ءار بالاعا  18  جاسقا تولعانشا 40 000 (قىرىق مىڭ) تەڭگە تولەۋ.

2. مال- قۇس ۇستايتىن، جەكە كاسىبى، ساۋدا-ساتتىعى بار وتباسىلاردىڭ  كىرىستەرىنە قاراماستان مەملەكەتتەن بالالارعا تولەنەتىن الەۋمەتتىك كومەك پەن جاردەماقىنى ومىرگە كەلگەن ءار بالاعا  18  جاسقا تولعانشا 40 000 (قىرىق مىڭ) تەڭگە تولەۋ.

3. باعانىڭ ءجيى وسۋىنە  (ينفلياتسياعا) جانە جىل سايىنعى ايلىق ەسەپتىك كورسەتكىشتىڭ ءوسىپ وتىرۋىنا بايلانىستى  مەملەكەتتەن انا مەن بالاعا بولىنەتىن الەۋمەتتىك كومەكتەر مەن جاردەماقىلار  مولشەرىن قايتا قاراپ،  وسىرۋ.

3. اتالعان الەۋمەتتىك كومەكتەر مەن جاردەماقىلاردى الۋدىڭ جولدارىن جەڭىلدەتۋدى قاراستىرۋ، ياعني  قۇجاتتاردى ازايتۋ، تاپسىراتىن قۇجاتتاردى جىلىنا ءبىر رەت جيناۋ جانە ءبىر مەكەمەگە عانا تاپسىرۋ كەرەك.

تالعات قاتاۋوۆ، بقو تاۋەلسىز كاسىپوداق ۇيىمىنىڭ توراعاسى، قوعام قايراتكەرى

Abai.kz