بۇگىن ەلوردادا «استانا» حالىقارالىق قارجى ورتالىعى (احقو) ۇزدىكسىز كاسىبي دامۋ بيۋروسى قولداۋىمەن «NEXT GENERATION LEADERS FORUM» اتتى بولاشاق ىسكەر كوشباسشىلاردىڭ فورۋمى ءوتتى. وعان قازاقستاننىڭ 45 جوعارعى وقۋ ورنىنان 400-دەن استام ستۋدەنتتەر قاتىستى.

ءوز جوبالارىن سوناۋ سەمەيدەن اكەلىپ، كوپشىلىككە تانىستىرعانداردىڭ اراسىندا سەمەي مەديتسينا ۋنيۆەرسيتەتىنىڭ ستۋدەنتتەرى دە بولدى. ولار سولتۇستىك تۇرعىندارىنىڭ ۇيالى تەلەفوندارىنا ارنالعان ايرىقشا «Termo-case» (رەد. چەحول) ويلاپ تاپقان. جاس ستۋدەنتتەردىڭ ايتۋىنشا، اتالمىش جوبا تەرىسكەيدە، اسىرەسە، اۋا رايى سۋىق وڭىرلەردە تۇراتىن تۇرعىندارعا «Apple» سمارتفوندارىن قىسقى ۋاقىتتا كەڭىنەن پايدالانۋعا مۇمكىندىك بەرەدى ەكەن. «ءبىز مۇندا ءۇش بىردەي جوبامەن كەلىپ وتىرمىز. ءبىرىنشىسى «الاقاي»  termo-case دەپ اتالادى. بۇل قۇنداقتار اۋا تەمپەراتۋراسى تىم تومەن ايماقتاردا ۇيالى تەلەفوندارى ءوشىپ قالاتىن تۇرعىندارعا ارنالعان. Termo-case – سمارتفونعا جىلى تەمپەراتۋرانى ساقتاپ، سۋىق تەمپەراتۋرانىڭ ىشكە ەنبەۋىنە كومەكتەسەدى. ياعني، ۇيالى تەلەفون ايازدى كۇندەرى دە ۇزاق ۋاقىت بويى جۇمىس ىستەيتىن بولادى، ونىڭ قۋاتتاندارۋ باتارەياسى بۇرىنعىداي تەز وتىرمايتىن بولادى»،-دەيدى ۋنيۆەرسيتەتتىڭ جالپى مەديتسينا فاكۋلتەتىنىڭ ستۋدەنتى ليايليا قاسىموۆا.

بولاشاق اق حالاتتىلار اكەلگەن كەلەسى ءبىر جوبا – «Touch me» دەگەن اتقا يە. ول كوزى كورمەيتىن نەمەسە ناشار كورەتىن بالالارعا ارنالعان جوبا ەكەن. «بۇل جوبا كوزىندە اقاۋى بار بۇلدىرشىندەرگە ارنالعان. مىسالى اتا-اناسى وعان قانداي دا ءبىر جۇمباق ايتادى دەلىك. ول ونى قولىمەن ۇستاپ، قانداي زات ەكەنىن ءبىلۋى شارت. وسى ارقىلى ءبىز بالانىڭ قولدارىنىڭ سەزۋ قابىلەتىن ارتتىرماقپىز. سول سياقتى جاقىندا عانا تاعى ءبىر كىتاپ ويلاپ تاپتىق. ول دا بۇلدىرشىندەردىڭ قولىنىڭ موتوريكاسىن دامىتۋعا ارنالعان. بوبەكتەر وسىنداي كىتاپشالار ارقىلى سانداردى، ارىپتەردى تانيدى، باۋدى بايلاپ ۇيرەنەتىن بولادى»،-دەيدى فورۋمعا قاتىسۋشى ستۋدەنتتەر.

ال اتالمىش ۋنيۆەرسيتەتتىڭ «ستوماتولوگيا» فاكۋلتەتىنىڭ ستۋدەنتى سۇلتانوۆ نۇرسۇلتان بولسا ءتىستىڭ ءپىشىنىن قالىپقا كەلتىرۋگە ارنالعان سالمانى جاساپ شىعاراتىن قۇرىلعىنى ويلاپ تاپقان. ول بۇل قۇرىلعى شەتەلدىك قۇرىلعىلارعا قاراعاندا الدەقايدا ارزانعا تۇسەدى دەيدى.

«بۇل جوبانىڭ اتى – «Dentis Device» دەپ اتالادى. ول ارقىلى ادامدار ءتىستى تۇزەتۋ سالماسىن سالىپ، تىستەردىڭ ورنالاسۋ رەتىن جاقسارتا الادى. ءبىز ءتىستىڭ ءتۇزۋ بولۋىن قامتاماسىز ەتەتىن سالمانى جاساپ شىعاراتىن قۇرىلعىنى ويلاپ تاپتىق. بۇل قۇرىلعىعا سۇرانىس كوپ. نەگە دەيسىزدەر عوي؟ سەبەبى جىل سايىن «ءتىس دارىگەرى» ماماندىعىن بىتىرەتىن ستۋدەنتتەردىڭ سانى 1000-نان اسادى ەكەن.   الايدا ولاردىڭ تەك 10%-ى عانا وزدەرىنىڭ جەكەمەنشىك كلينيكالارىن اشۋعا مۇمكىندىك الادى جانە ولاردىڭ باسىم كوپشىلىگى مۇنداي قۇرىلعىنى شەتەلدەن، قىمبات باعاعا ساتىپ الادى ەكەن. ال ءبىزدىڭ قۇرىلعىلار شەتەلدىك قۇرىلعىلارعا قاراعاندا الدەقايدا ارزان جانە ونى پايدالانۋ جولى دا وتە جەڭىل. ازىرگە مۇنداي قۇرىلعىنىڭ باعاسىن شامامەن 60 مىڭ تەڭگە دەپ باعالاپ وتىرمىز. ءبىزدىڭ باستى ماقساتىمىز سالمانى جاسايتىن قۇرىلعىنى بارىنشا اۆتومانتتاندىرۋ. قازىردىڭ وزىندە تەمپەراتۋرا داتچيگىن ورناتىپ ۇلگەردىك. جوبانى جۇزەگە اسىرۋ بارىسىندا بىلىكتى ءتىس دارىگەرلەرىنىڭ كەڭەستەرىنە دە جۇگىندىك»، - دەيدى  ستۋدەنتتەر.

ايتا كەتەرلىگى،  احقو ۇزدىكسىز كاسىبي دامۋ بيۋروسىنىڭ قولداۋىمەن وتكەن NEXT GENERATION LEADERS FORUM» شاراسى ەلىمىزدە بيىل جاريالانعان جاستار جىلى اياسىندا «ENACTUS Qazaqstan» قورىنىڭ جىل سايىنعى ءىس-شارالار لەگىنىڭ العاشقىلارىنىڭ ءبىرى بولىپ تابىلادى. فورۋمنىڭ باستى ماقساتى – جاس كاسىپكەرلەر مەن بولاشاق ىسكەري كوشباسشىلارعا وزدەرىنىڭ جوبالارىن تانىستىرۋعا مۇمكىندىك بەرۋ، سونداي-اق، ءىرى حالىقارالىق كومپانيالار، جەكە بيزنەس، قارجىلىق ينستيتۋتتار ماماندارى جانە ساراپشىلارىمەن تاجىريبە الماسۋ بولىپ وتىر.