پرەزيدەنت پارمەنىمەن وتستاۆكاعا كەتكەن ۇكىمەتتىڭ ەندىگى ەكس-باسشىسى باقىتجان ءابدىرۇلى ساعىنتاەۆ ارنايى مالىمدەمە جاساپ، ەلباسىنا العىسىن جەتكىزدى. بۇل تۋرالى پرەمەر-ءمينيستردىڭ رەسمي سايتى حابارلادى. 

باقىتجان ءابدىرۇلى ساعىنتاەۆتىڭ مالىمدەمەسىن قاز قالپىندا جاريالاعاندى ءجون كوردىك.

بۇگىن ۇكىمەت وتستاۆكاعا كەتتى.

تاۋەلسىز قازاقستان مەملەكەتىنىڭ نەگىزىن قالاپ، بۇگىنگى بيىكتەرگە جەتكىزگەن ەلباسى حالقىنىڭ ءوسىپ-وركەندەۋىن ارقاشان ەڭ باستى قاعيدا رەتىندە ۇستانىپ، ءاربىر شەشىمىن مەملەكەت پەن حالىقتىڭ مۇددەسى تۇرعىسىنان قابىلداپ كەلەدى.

مەملەكەت قۇرۋ وڭاي جۇمىس ەمەس. جاس مەملەكەتتى ءتۇرلى قايشىلىقتار مەن قاقتىعىستاردان امان الىپ ءوتىپ، تاريحي ولشەممەن العاندا تىم قىسقا مەرزىمدە وسىنداي ابىرويلى ەل ەتۋ شىن مانىندە شەكسىز قۇرمەتكە لايىق.

ەلباسى — ەلىمىزدىڭ سان مىڭ جىلدىق تاريحىنداعى ەڭ جاۋاپتى كەزەڭدە حالقىمىزدىڭ باعىنا بەرگەن ۇلى دا جاسامپاز تۇلعاسى. سول سەبەپتى، حالقىمىز باياندى بۇگىنى مەن جارقىن بولاشاعىن تەك قانا ەلباسىنىڭ ەسىمىمەن بايلانىستىرادى.

وتكەن ەكى جارىم جىل بويى ۇكىمەت تىزگىنىن تاپسىرىپ، جوعارى سەنىم بىلدىرگەنى ءۇشىن ەلباسى نۇرسۇلتان ءابىشۇلى نازارباەۆقا شىنايى العىسىمدى بىلدىرەمىن.

قر ۇكىمەتىنىڭ بۇرىنعى باسشىسى باقىتجان ساعىنتاەۆ

Abai.kz