جۋىردا الماتى وبلىسىنىڭ اكىمى اماندىق  باتالوۆ وبلىس جۇرتشىلىعىنىڭ الدىندا جىلدىق ەسەپ بەرۋ جيىنىن وتكىزدى.

اكىمنىڭ ەسەپتىك جيىنى وبلىس ورتالىعى تالدىقورعان قالاسىنداعى ب. ريموۆا اتىنداعى دراما تەاترىندا ءوتتى. جيىنعا قر پرەزيدەنت اكىمشىلىگىنىڭ مەملەكەتتىك ينسپەكتورى جايساڭ احمەتوۆ، دەنساۋلىق ساقتاۋ ۆيتسە-ءمينيسترى ءلاززات اقتاەۆا، «بايتەرەك» ۇبح باسقارما توراعاسى ايدار اريفحانوۆ قاتىستى.

جيىندا زالداعى قاتىسۋشىلاردان اۋىزشا جانە جازباشا قويىلعان، سونىمەن قاتار وبلىس اكىمدىگىنىڭ zhetysu.gov.kz سايتىنا جولدانعان جالپى سانى 60-قا جۋىق سۇراق ءتۇستى. ساۋالداردىڭ مازمۇنى نەگىزىنەن قالانى گازاندىرۋ جانە كوگىلدىر وتىنعا قوسۋدا الەۋمەتتىك ءالجۋاز توپتارعا جەڭىلدىك قاراستىرۋ، اۋىز سۋمەن قامتۋ، اۋلالاردى اباتتاندىرۋ، ورتالىقتاندىرىلعان جىلۋ جۇيەسىنە قوسۋ، تۇرعىن ءۇي الۋ، جول جوندەۋ سياقتى ماڭىزدى ماسەلەلەرگە قاتىستى بولدى.

تالدىقورعان قالاسىنىڭ تۇرعىنى تەمىرلان وزەنباەۆ تالدىقورعانداعى جىلىتۋ قازاندىقتارىن تابيعي گازعا قاشان قوسىلاتىنى تۋرالى سۇرادى. گازعا قوسىلسا بىرىنشىدەن تولەمى ارزان بولار ەدى، ەكىنشىدەن ەكولوگيالىق ماسەلەگە ىڭعايلى بولار ەدى دەدى.

«وتە دۇرىس كوتەرىلىپ وتىرعان ماسەلە. قانشا جەردەن فيلتر قويساق تا، قاتتى وتىن پايدالانۋدان شىققان ءتۇتىن ەكولوگياعا كەرى اسەرىن تيگىزەدى، شىعارىندىلارى دا كوپ بولادى. ءبىر قازاندىقتى گازعا قوسۋعا 900 ملن. تەڭگەنىڭ شاماسىندا قارجى قاجەت ەكەن، بىراق ودان شىعاتىن جىلۋ قۋاتى 22-دەن 50 گكال-عا جەتەتىن بولادى. سوندىقتان الداعى ۋاقىتتا قالاداعى 5 قازاندىقتى تۇگەلدەي گازعا قوسامىز»، - دەدى وبلىس باسشىسى.

تەكەلىلىك ميرا بوچارنيكوۆا تەكەلى قالاسىندا اۋىر مەتالدار قالدىعى جاتقان ورىننىڭ ەكولوگيالىق زيانى تۋرالى ماسەلە كوتەرىلدى. وبلىس اكىمى بۇل پروبلەمانى شەشۋگە بيىلعى جىلى رەسپۋبليكادان قارجى ءبولىنىپ، باستالاتىنىن ايتتى.

ماسەلەن، پانفيلوۆ اۋدانىنىڭ تۇرعىنى ەرلان وسپانوۆ پەنجىم اۋىلىنداعى اۋرۋحانا 200 جىلدان بەرى جەكەمەنشىكتەگى عيماراتتى جالعا الىپ وتىرعانىن ايتىپ، سول مەكەمەگە لايىقتاپ عيمارات سالىپ بەرۋدى سۇرادى. سول سياقتى قاراساي اۋدانىنىڭ تۇرعىندارى وزدەرى تۇرىپ جاتقان كوپ قاباتتى ۇيلەردىڭ ورتالىقتاندىرىلعان جىلۋ جۇيەسىنە قوسىلماعانى، سول ءۇشىن قازاندىق سالىپ بەرۋدى ءوتىندى. وبلىس اكىمى اتالعان ماسەلەلەر بويىنشا ءوز ورىنباسارلارىن تۇرعىزدى، ولاردىڭ ايتۋىنشا ەكى ماسەلە دە بيىلعى جىلدىڭ جوسپارىنا ەنگىزىلگەن، قۇجاتتارى دايىندالۋدا.

تالدىقورعان قالاسىنىڭ ماڭىنداعى مەرەكەلىك ساياجايىنىڭ تۇرعىنى باقىتگۇل راحىمباەۆا ساياجايدىڭ ەلەكترمەن قامتىلۋ ماسەلەسىنىڭ شەشىلگەنىنە راحمەت ايتىپ، ونداعى تۇرعىنداردى اۋىز سۋ پروبلەماسى قيناپ وتىرعانىن جەتكىزدى. سونىمەن قاتار ۇرلىقتىڭ كوبەيگەنىن جانە ۇرى ۇستالعان كۇندە بوساتىلىپ جىبەرىلەتىنىن دە اتاپ ءوتتى. بۇل ماسەلە بويىنشا قالا اكىمى اۋىز سۋ جۇرگىزۋدىڭ جوبالىق-سمەتالىق قۇجاتتارى دايىن ەكەنىن، تەك رەسپۋبليكالىق بيۋدجەتتەن قارجى بولىنۋىنە بايلانىستى جاسالاتىنىن ايتتى.

وبلىس باسشىسى اۋىز سۋ جۇيەسىنىڭ قۇرىلىسىن باستاۋعا بيۋدجەتتەن 100 ملن. تەڭگە قاراستىراتىنىن جانە قالا اكىمدىگىنە قۇرىلىس جۇمىستارىن بيىل باستاۋدى تاپسىردى. ساياجايدا ۇرلىق جاساعانى دالەلدەنگەن ازاماتتاردىڭ جازاعا تارتىلۋىن جەكە ءوزى باقىلاۋعا الاتىنىن ايتىپ، پوليتسيا باسشىلىعىنا ولار تۋرالى بارلىق مالىمەتتى الدىنا الىپ كەلۋدى تاپسىردى.

تۇرعىن ءۇي الۋ، الەۋمەتتىك كومەك قاجەتتىلىگى جايلى ايتقان كوپ بالالى انالارعا جاردەمدەسۋ شارالارىن قاراستىرۋ، قامقورلىق جاساۋعا كاسىپكەرلەردى تارتۋ تۋرالى تاپسىرمالار بەرىلدى.

رايىمبەك اۋدانىنىڭ تۇرعىنى، جاس مامان مەدەت بايجۇما وبلىس باسشىلىعىنىڭ جۇمىسىنا اۋدان تۇرعىندارىنىڭ اتىنان ريزاشىلىعىن جەتكىزىپ، ءاربىر اۋدانداعى جاستار ورتالىقتارىنا بولىنەتىن 10 گەكتار جەردى يگەرىپ، اۋىل شارۋاشىلىعىنا ۇلەس قوسۋ جاستار ءۇشىن ۇلكەن قۋانىش ەكەنىن ايتتى.

تالدىقورعان قالاسىنداعى ع. ورمانوۆ كوشەسى، 48 ءۇيدىڭ اۋلاسىن اباتتاندىرۋ تۋرالى ساۋالعا بايلانىستى قالا اكىمى د. شالتاباەۆقا بيىلعى جوسپارلانىپ وتىرعان اۋلالاردىڭ قاتارىنا اتالعان ءۇيدى قوسىمشا كىرگىزۋ تۋرالى تاپسىرما بەرىلدى.

سونىمەن قاتار ساۋالداردا ءسوز قوزعالعان بالقاش كولىنىڭ جاعالاۋىن دامىتۋ، قالاداعى كوركەم گيمناستيكاعا ارنالعان زالداردى كەڭەيتىپ، جاتتىقتىرۋشى شتاتتارىن قوسۋ، شارىن شاتقالىن تۋريستىك نىسان رەتىندە دامىتۋ جانە باسقا دا ماسەلەلەرگە قولداۋ جاسالاتىنى ايتىلدى.

جيىن سوڭىندا وبلىس اكىمى اماندىق باتالوۆ ەسەپتى كەزدەۋگە قاتىسقان، وزەكتى ماسەلەلەر تۋرالى ساۋالدار قويعان تۇرعىندارعا العىس ءبىلدىرىپ، بۇگىنگى كۇنى پروبلەمالاردى شەشۋگە مەملەكەت باسشىسى تاراپىنان بارلىق جاعدايلار جاسالىپ وتىرعانىن ايتتى. ەڭ باستىسى، ءار ماسەلەگە تەرەڭ ءۇڭىلىپ، جاۋاپكەرشىلىكپەن جانە ادامگەرشىلىك تۇرعىدان قاراۋ كەرەكتىگىن جەتكىزدى. سونداي-اق كوتەرىلگەن ماسەلەلەردىڭ بارلىعى دا نازارعا الىنىپ، ولاردىڭ كەزەڭ-كەزەڭىمەن شەشۋ قاستىرىلاتىن بولادى.

Abai.kz