پوليتسيا كۇشتەپ اكەتكەندەر اراسىندا ازاتتىقتىڭ ورىس قىزمەتى ءتىلشىسى اندرەي كيسەلەۆ تە بار. كيسەلەۆ پوليتسيا ەشبىر سەبەبىن ايتپاستان، ازاماتتاردى اۆتوبۋسقا تيەپ جاتقانىن ۆيدەوعا ءتۇسىرىپ تۇرعاندا ۇستالعان. ءجۋرناليستى بولىمشەگە اپارىپ، ءبىرازدان سوڭ بوساتقان.

بۇعان دەيىن جيىن باستالماي تۇرىپ پوليتسيا 16 ادامدى ۇستاعانى حابارلانعان. ولاردىڭ اراسىندا كامەلەتكە تولماعاندار دا بار. پوليتسيا ولاردى اۋداندىق پوليتسيا بولىمشەسىنە اپارعان.

"بەلىي سچەتچيك" ۇيىمىنىڭ بەلسەندىلەرى بيلىك رۇقسات ەتكەن ميتينگىگە 15 مىڭنان اسا ادام كەلگەنىن حابارلادى. بىرنەشە مىڭ ادام تەكسەرۋدەن وتەتىن ورىندا كەزەك كۇتىپ تۇرعان. ولاردىڭ كەيبىرى ميتينگ اياقتالعانشا ارناۋلى ورىنعا ءوتىپ ۇلگەرمەگەن.

بىراق رەسەي بيلىگى 6 مىڭنان استام ادامنىڭ كەلگەنىن حابارلادى.

ميتينگىنى ۇيىمداستىرۋشىلار تاراتقان مالىمدەمەدە: "رەسەي بۇل يران ەمەس، سولتۇستىك كورەيا ەمەس، ءبىز - وركەنيەتتى الەمنىڭ ءبىر بولشەگىمىز. بىراق پۋتين بيلىگى باتىسقا ىلەسە الماي قالا بەرۋىمىز ءۇشىن قولدان كەلگەننىڭ ءبارىن ىستەپ جاتىر. تسەنزۋرا شىرماۋى بارعان سايىن جايىلىپ بارادى. ءبىز رەسەيدى حالىقارالىق جەلىدەن وقشاۋلاۋ تۋرالى زاڭنىڭ قابىلدانۋىنا قارسىمىز جانە ەركىن ينتەرنەتتى تالاپ ەتەمىز" دەپ جازىلعان.

2019 جىلى 12 اقپاندا رەسەي مەملەكەتتىك دۋماسى رەسەيلىك ينتەرنەت سەگمەنتىن وقشاۋلاۋ تۋرالى زاڭ جوباسىن ءبىرىنشى وقىلىمدا ماقۇلداعان. اۆتونومدى ينتەرنەت 20 ميلليارد ءرۋبلدى تالاپ ەتەدى دەپ ايتىلادى.

زاڭ جوباسى اۆتورلارىنىڭ ايتۋىنشا، جوبا بۇكىلالەمدىك ينتەرنەت اجىراپ قالعان جاعدايدا رەسەي ينتەرنەتىنىڭ تۇراقتى جۇمىس ىستەۋىن قامتاماسىز ەتۋى ءتيىس. ال زاڭ جوباسىنا قارسى ازاماتتار كوپ قارجىنى تالاپ ەتەتىن زاڭ جوباسى ەرتە مە، كەش پە وزگە ماقساتتا قولدانىلۋى مۇمكىن دەپ الاڭدايدى.

Abai.kz