بۇگىن ورتالىق كوممۋنيكاتسيالار قىزمەتىندە وتكەن بريفينگتە «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ حالىقتىڭ وزەكتى الەۋمەتتىك ماسەلەلەرىن شەشۋگە باعىتتالعان «حالىققا كومەك» پارتيالىق جوباسىنىڭ جۇمىسى باستالعانىن ايتتى.

بۇل جوبا ەلباسىنىڭ تىكەلەي باستاماسىمەن قولعا الىنىپ وتىر. اتاپ ايتقاندا، مەملەكەت باسشىسى «Nur Otan» پارتياسىنىڭ كەزەكتى XVIII سەزىندە حالىقتىڭ باسىنداعى جانە قوعامداعى وزەكتى ماسەلەلەرگە قاتىستى جەدەل ارەكەت ەتۋ كەرەكتىگىن ايتىپ، «حالىققا كومەك» جوباسىن جۇزەگە اسىرۋدى تاپسىرعان بولاتىن.

جاڭا باستامانى پارتيا مەملەكەتتىك ورگاندارمەن، ۇكىمەتتىك ەمەس ۇيىمدارمەن جانە بيزنەس قاۋىمداستىقپەن بىرلەسىپ ىسكە اسىرماق. جوبا نەگىزىندە پارتيانىڭ ەلىمىزدەگى بارلىق قوعامدىق قابىلداۋ بولمەلەرىنىڭ جۇمىسى جاڭعىرىپ، ولار بىرىڭعاي الەۋمەتتىك تەرەزە جۇيەسىندە قىزمەت كورسەتە باستادى.

جوبا اياسىندا قوعامداعى وزەكتى ماسەلەلەردى جەدەل ءارى ءتيىمدى شەشۋ ءۇشىن بۇقارالىق اقپارات قۇرالدارى مەن الەۋمەتتىك جەلىلەرگە جاريالانعان جازبالارعا تالداۋ جاسالىپ، الدىن الۋ مونيتورينگى جۇرگىزىلەدى. سونىڭ ناتيجەسىندە قوعامدىق قابىلداۋ بولمەلەرى «جەدەل ءارى ءبىر جەردە» قاعيداسى بويىنشا جۇمىس ىستەيدى.

– قازىرگى تاڭدا «Nur Otan» پارتياسى حالىقتىڭ مۇددەسىن قورعايتىن جانە ەلباسى تاپسىرمالارىنىڭ ورىندالۋىنا باقىلاۋ جۇرگىزەتىن باستى ينستيتۋت بولىپ تابىلادى. «حالىققا كومەك» جوباسىن جەمىستى جۇزەگە اسىرۋ ءۇشىن قوعامدىق قابىلداۋ بولمەلەرىمەن بىرگە باستاۋىش پارتيا ۇيىمدارىنىڭ دا الەۋەتىن پايدالانامىز. ويتكەنى ءبىزدىڭ باستى مىندەتىمىز – حالىقتىڭ ماسەلەسىن ءتيىمدى شەشۋگە ىقپال ەتۋ, – دەدى ماۋلەن اشىمباەۆ.

Abai.kz