كەشەدەن بەرى الەۋمەتتىك جەلىلەرگە اكىمدەر "جاۋعان" كۇن بولدى. فەيسبۋكتى اشىپ قالسام قازداي تىزىلگەن اكىمدەر جۇرتقا دوستىق ۇسىنىپ وتىر. بۇعان كۇنى كەشە پرەزيدەنت ق.توقاەۆتىڭ اكىمدەر الەۋمەتتىك جەلىلەردە بەلسەندى بولۋى قاجەتتىگى تۋرالى تاپسىرماسى ۇلكەن اسەر ەتكەنى انىق. كەيدە حالىق ءبىر بولەك، اكىمدەر ءبىر بولەك ءومىر سۇرەتىن سياقتى كورىنۋشى ەدى. ەندى پرەزيدەنت تاپسىرماسىنىڭ ارقاسىندا اكىمدەر حالىقپەن دوس بولىپ، 24 ساعات بويى حالىقتىڭ جاعدايىنان حاباردار بولىپ وتىراتىن بولادى.

ارينە، پاراقشالارىن وزدەرى جۇرگىزىپ، وزدەرى جاۋاپ بەرىپ وتىرسا. ولاي بولماعاندا بۇل تاعى ءبىر كوزالداۋعا اينالادى. بۇل ورايدا اكىمدەردى، جالپى مەملەكەتتىك قىزمەتكەرلەردى الەۋمەتتىك جەلىدە دۇرىس جۇمىس ىستەي ءبىلۋ مادەنيەتى مەن تەحنولوگياسىنا ۇيرەتۋ كەرەك. بۇنى اۋەلى ءباسپاسوز حاتشىلارىنان باستاۋ قاجەت. وسى تۇستا مەنى تاڭقالدىرعان جانە قانتقان ءبىر جاعدايدى ايتايىن. قۋانىشتىسى سول، پرەزيدەنت اكىمدەر مەن قۇزىرلى ورگان باسشىلارىنا الەۋمەتتىك جەلىدە بەلسەندى بولۋعا تاپسىرما بەرگەن ساتتە پرەزيدەنت جانىنداعى باسقارۋ اكادەمياسى ەلىمىزدىڭ بارلىق مينيسترلىكتەرى مەن قۇزىرلى ورگاندارىنىڭ، اكىمشىلىكتەردىڭ ءباسپاسوز حاتشىلارىمەن وسى ماسەلە بويىنشا وقىتۋ، دايىنداۋ جۇمىسىن باستاپ تا جىبەردى. ەلىمىزدەگى مينيستلەر مەن قۇزىرلى ورگانداردىڭ، اكىمشىلىكتەردىڭ ءباسپاسوز قىزمەتى جەتەكشىلەرىن جيناپ، 3 كۇندىك سەممينار وتكىزدى.

اكادەمياعا جينالعان ءباسپاسوز قىزمەتى جەتەكشىلەرىنە ەڭ تانىمال پيار- مەنەدجەرلەر مەن حالىقارالىق دارەجەدەگى ترەنەرلەر ءدارىس وقۋدا. تۇسىنگەنىمىز اليك شپەكباەۆ باسقاراتىن مەملەكەتتىك قىزمەت ىستەرى جونىندەگى اگەنتتىگى ۇلكەن جۇمىستار اتقارىپ جاتىر ەكەن. بۇل تۋرالى بىزگە اكادەميا رەكتورى فاتيما جاقىپوۆا اڭگىمەلەپ بەردى. ءباسپاسوز حاتشىلارى دا باق- پەن جانە الەۋمەتتىك جەلىمەن جۇمىس جاساۋداعى كەدەرگىلەر مەن كەمشىلىكتەر تۋرالى اشىق ايتىپ، ۇسىنىستار بەردى. ونىڭ ىشىندە مەملەكەتتىك قىزمەتكەرلەرگە سمارتفوندى قايتارۋ، مەملەكەتتىك تىلدەگى سەممينارلاردى كوبەيتۋ ماسەلەلەرى دە بار.

...سونىمەن، اكىمدەر دوستىق ۇسىندى، ولار الەۋمەتتىك جەلىلەردە حالىقپەن اياعىنا دەيىن ەمەن- جارقىن مۇڭداسا الاتىن، ەشتەڭەنى جاسىرمايتىن، اقجۇرەك ادال دوس بولا الا ما، جوق حالىقتىڭ سۇراعى كوبەيگەندە اكاۋنتىن تارس جاۋىپ، تۇرا قاشا ما، ونى ۋاقىت كورسەتەدى. الايدا اكىمدەر بۇل شارۋانىڭ پرەزيدەنت ق.توقاەۆتىڭ باقىلاۋىندا ەكەنىن ەستەن شىعارمايدى دەپ سەنەمىن.

ادىلبەك قابانىڭ facebook پاراقشاسىنان

Abai.kz