وتكەن اپتادا قر پرەزيدەنتى ق.توقاەۆ اكىمدەرگە حالىقپەن ەتەنە جاقىن بولۋ ءۇشىن الەۋمەتتىك جەلىگە تىركەلۋدى تاپسىردى. سول-اق ەكەن facebook جەلىسىندە اكىمدەر كەزەك-كەزەك پاراقشالارىن اشىپ، حالىققا دوستىق ۇسىنا باستادى.

ولاردىڭ ىشىندە بىزگە بەلگىلىسى ماڭعىستاۋ وبلىسىنىڭ اكىمى ەرالى توعجانوۆ، الماتى وبلىسىنىڭ اكىمى اماندىق باتالوۆ، وسكەمەن قالاسىنىڭ اكىمى جاقسىلىق ومار، سولتۇستىك قازاقستان وبلىسىنىڭ اكىمى قۇمار اقساقالوۆ، استانا قالاسىنىڭ اكىمى باقىت سۇلتانوۆ سىندى شەندىلەر بار. ال، وسىعان دەيىن تۆيتتەر جەلىسىن بەلسەندى پايدالانىپ كەلگەن پرەزيدەنت مىرزا  ەندى Instagram جەلىسىن دە پايدالانباق. اشىلعانىنا 17 ساعات قانا بولعان پرەزيدەنت پاراقشاسىنا قازىردىڭ وزىندە 160 مىڭنان استام ادام جازىلعان. ەگەر جەلى پايدالانۋشىلارى وسى قارقىنىن توقتاتپاسا، توقاەۆ مىرزا از ۋاقىتتا ميلليوننان استام وقىرماندارى بار انشىلەردى باسىپ وزۋى مۇمكىن. ءتىپتى، كوبىن باسىپ وزدى دا... بىراق، ينستاگرامنىڭ اۋراسى ساياسي تاقىرىپتارعا قانشالىقتى ىڭعايلى؟

سونىمەن، اكىمدەرگە قايتا ويىسساق. باستاپقىدا بارلىق شەندىنىڭ پاراقشاسىنا ءتان ورتاق دۇنيە - جازىلعان پوستتارىندا بولدى. ياعني، بارلىق اكىم پاراقشاسىندا “قازىرگى تاڭدا الەۋمەتتىك جەلىلەردىڭ الەۋەتى كۇن ساناپ ارتىپ كەلەدى. سوندىقتان «Facebook» جەلىسىندە پاراقشا اشتىم. بۇل پاراقشا جاڭالىقتارمەن بولىسۋگە، سىزدەرمەن كونسترۋكتيۆتى ديالوگ قۇرۋعا مۇمكىندىك بەرەتىن تىڭ ءتاسىلدىڭ ءبىرى بولادى دەپ ويلايمىن” دەگەن پوست جازىلعان. دۇرىس اق!

الايدا، بىزگە قىزىعى – وسى پاراقشالاردى اكىمدەردىڭ ءوزى جۇرگىزە مە؟ ولاردى سىناعان جەلى قولدانۋشىلارىنا ترولدارىنىڭ قارىم-قاتىناسى قالاي بولادى؟ اكىمدەردىڭ  دوستىعىندا بيلىكتى اشىق سىناپ، ءتىپتى، ميتينگ ۇيىمداستىرۋعا دەيىن بارىپ جۇرگەن قوعام بەلسەندىلەرى بولا ما؟ بولعان كۇننىڭ وزىندە ولارعا دەگەن قىسىم ەكى ەسە كۇشەيىپ كەتپەي مە؟

قالاي دەسەك تە، الەۋمەتتىك جەلى ۇلكەن كۇش. مۇنى قازىر بيلىك وكىلدەرى دە مويىنداعان سىڭايلى. ول قازىر حات-حابار الماسۋ ءۇشىن عانا ەمەس، قوعامدا بولىپ جاتقان ءتۇرلى ساياسي-الەۋمەتتىك ماسەلەلەردى تالقىلايتىن پىكىرلەر الاڭىنا اينالعان. جانە، سول ماسەلەلەردى ناقتى شەشۋگە دە ىقپالى زور. ماسەلەن، الەۋمەتتىك جەلىنىڭ اسەرىنەن قوعامدىق رەزونانس تۋدىرعان جۋىردا بولعان وقيعالارعا توقتالساق.

- 4 اقپان كۇنى استانادا جالدامالى پاتەردە بولعان ءورت سالدارىنان 5 بالا قازا تاپتى. وسى وقيعا الەۋمەتتىك جەلىنىڭ بىرنەشە كۇن باس تاقىرىبىنا اينالدى. ولار ءوزارا قارالى كۇن جاريالاپ، قولدارىنان كەلگەنشە الەۋمەتتىك كومەك تە كورسەتتى. جانە، وسى سالاعا تىكەلەي جاۋاپتى مادينا ابىلقاسىموۆانىڭ قىزمەتتەن كەتۋىن تالاپ ەتتى. كوپ وتپەي ەكس-پرەزيدەنت ن.نازارباەۆ  تۇتاس ۇكىمەتتى وتستاۆكاعا جىبەردى. ارينە، بۇل جاي عانا ساياسي شەشىممەن قاتار كەلگەن سايكەستىك دەۋگە دە بولار، دەگەنمەن، بۇل ماسەلەدە الەۋمەتتىك جەلىنىڭ دە ىقپالى بولعانىن مويىنداۋعا ءتيىسپىز.

- وسى وقيعادان كەيىن قوعامنىڭ كۇنتارتىبىنە كوپبالالى انالار ماسەلەسى اشىق قويىلا باستادى. ءار جەردە انالار باس كوتەرگەن ۇلكەن جيىندار ءوتتى. ناتيجەسىندە، كوپبالالى انالارعا بەرىلەتىن جاردەماقى كولەمى ءسال ۇلعايىپ، ءتىپتى كەيبىر قالالاردا كوپبالالى انالار قوعامدىق كولىكتە تەگىن جۇرۋگە، بالالارى تەگىن تاماقتانۋ مەن بالاباقشاعا اقىسىز بارۋعا  مۇمكىندىك الدى.

- الەۋمەتتىك جەلىنىڭ ىقپالى بولعان تاعى ءبىر وقيعا قاراعاندى قالاسىندا بولعان جاعداي ەدى. ەستەرىڭىزدە بولسا، قالا ورتالىعىنداعى كافەدە بولعان توبەلەستە ارميان جىگىتى قازاق جىگىتىن ولتىرگەن بولاتىن. وقيعادان كەيىن وبلىس اكىمى ەرلان قوشانوۆ بۇل ماسەلەنى تىكەلەي ءوز  باقىلاۋىنا الدى. ول قايتىس بولعان جىگىتتىڭ اكەسىمەن كەلىسە وتىرىپ ۇلتارازدىق تاتۋلىقتى ساقتاپ قالدى. ال، ارميان باسشىسى نيكول پاشينيان دا بۇل ماسەلەدەگى ۇلتارالىق تاتۋلىقتى ساقتاۋعا مۇددەلى ەكەنىن جەتكىزدى.

ودان بولەك، الەۋمەتتىك جەلى - قازاقشا سويلەي المايتىن دەپۋتاتتاردى، قىزمەت ەتيكاسىن بىلمەيتىن ەكس-مينيسترلەردى دە سىننىڭ استىنا الىپ جاتادى. دەمەك، ەركىن ويدىڭ، اشىق پىكىردىڭ الاڭى. سوندىقتان، جاڭادان تىركەلگەن اكىمدەر دە بىرجاقتى بولماي، جەلىدە بارىنشا اشىق پىكىرلەرگە دايىن بولسا دەيمىز.

ءتۇيىن.

قوش! قازىر قوعامنىڭ ساياسي ساۋاتى ارتىپ كەلەدى. بۇل - جاقسى قۇبىلىس. وعان دا الەۋمەتتىك جەلىنىڭ ىقپالى زور دەسەك قاتەلەسپەيمىز. سوندىقتان، توقاەۆ باستاعان بيلىك وكىلدەرى الەۋمەتتىك جەلىدە ايتىلعان قوعام بەلسەندىلەرىنىڭ پىكىرلەرىن قولداپ، كەيبىر سىندارىنان ناتيجە شىعارسا، سايكەسىنشە، ءوز ۇسىنىس-تالاپتارىن دا قويا بىلسە، قوعام ءۇشىن كوپ پايدالى شەشىمدەر قابىلدار ەدى. سوندىقتان دا، قر پرەزيدەنتىن ءبىز Instagram-نان عانا ەمەس، Facebook-تەن كورگىمىز كەلەدى. Facebook الەۋمەتتىك جەلىسى قازىر دەموكراتيالىق ويدىڭ اشىق الاڭى، ويتكەنى...

نۇربيكە بەكسۇلتانقىزى

Abai.kz