بۇگىن قر يندۋستريا جانە ينفراقۇرىلىمدىق دامۋ مينيسترلىگىءنىڭ قاۋلىسىمەن استانا تەمىرجول ۆوكزالى نۇر-سۇلتان دەپ وزگەرتىلدى. پرەمەر مينيستر اسقار مامين قول قويعان بۇل قۇجاتتا “قاۋلى العاشقى رەسمي جاريالانعان كۇنىنەن باستاپ قولدانىسقا ەنگىزىلەدى” دەپ كورسەتىلگەن.

ال، جۋىردا قازاقستاننىڭ ۋاقىتشا سايلانعان پرەزيدەنتى قاسىم-جومارت توقاەۆ استانا قالاسىنىڭ اتاۋىن جانە وبلىس ورتالىقتارىنداعى نەگىزگى كوشەلەردى Nur-Sultan دەپ اتاۋ تۋرالى باستاما كوتەرگەن بولاتىن. ناتيجەسىندە، ەلوردانىڭ اتاۋى ءبىر ساتتە Nur-Sultan بولىپ وزگەرتىلدى. ال، بىرقاتار قالالاردا اباي، تولە بي، ساتباەۆ سىندى تۇلعالاردىڭ اتى الىنىپ، ورنىنا ەكس-پرەزيدەنتتىڭ ەسىمى بەرىلەتىن بولعان-دى. ارتىنشا حالىق نارازىلىعى سەبەبىمەن بۇل كوشەلەردىڭ اتى وزگەرمەيتىن بولدى.

ەستەرىڭىزدە بولسا، وسىدان بەس جىل بۇرىن “Astana Croup”-تىڭ سول كەزدەگى يەسى نۇرلان سماعۇلوۆ پرەزيدەنتكە جاڭادان سالىنىپ جاتقان EXPO نىسانىن نۇر-پلازا دەپ اتاۋ تۋرالى ۇسىنىس ايتقان ەدى. “وسى سەندەر جاعىنۋدى قايدان ۇيرەنەسىڭدەر؟” دەگەن پرەزيدەنت ساۋالىنا سماعۇلوۆ ء“ومىر ۇيرەتتى” دەپ جاۋاپ بەرگەن بولاتىن.

ءيا، ءومىردىڭ ۇيرەتەر ساباعى كوپ. الايدا، شەندىلەر ومىردەن جاعىنۋدى عانا ۇيرەنەتىن سەكىلدى.

قوش، سونىمەن، ايبارىمىز بوپ تۇرعان استانا دا ەكس-پرەزيدەنتتىڭ ەسىمىمەن اتالدى. شىن مانىندە، ءبىزدىڭ ەلدە ن.نازارباەۆتىڭ اتىنداعى نىساندار جەتكىلىكتى. ءبىر عانا ەلوردانىڭ وزىندە - نۇر-استانا مەشىتى، نۇرسۇلتان نازارباەۆ زياتكەرلىك مەكتەبى، نۇروتان پارتياسىنىڭ باس عيماراتى، نۇر-الەم پاۆيلونى، نۇرلى جول ۆوكزالى، ەندى مىنە بۇل ءتىزىمدى نۇر-سۇلتان تەمىر جول ۆوكزالى تولىقتىردى. ال، بىلتىر عانا الماتىدا فۋرمانوۆتىڭ اتىمەن اتالعان ەڭ داڭعىل كوشە نۇرسۇلتان نازارباەۆ كوشەسى دەپ اتالعان بولاتىن. ال، بىزگە بەيمالىم قالالار مەن وبلىس ورتالىقتارىنداعى نۇرلى اتاۋلار قانشاما؟

جالپى، وسى ارەكەتتەرگە قاتىستى سان ساۋالدار تۋىندايدى. بىرىنشىدەن، بۇل نىسانداردى جانە قالا اتاۋىن وزگەرتۋگە قاراجات قايدان الىنادى؟ وسىنداي ارەكەتتەر كەيىنگى ۇرپاققا نە بەرەدى؟ ەگەر مۇنىڭ بارلىعى ەلدىڭ قارجىسىنا جاسالسا، ودان حالىق قانداي پايدا كورەدى؟ پرەزيدەنت ن.نازارباەۆ وسىنداي ارەكەتتەرگە مۇددەلى مە؟ جانە، شەندىلەردىڭ وسى “ەڭبەكتەرىنىڭ” وتەۋى نە بولادى؟ ونى كىم باعالايدى؟

جۋىردا وزبەك پرەزيدەنتى شاۆكات ميرزيەەۆ بۇحارا وبلىسىنا جاساعان جۇمىس ساپارىندا جەرگىلىكتى شەنەۋنىكتەرمەن كەزدەستى. سول كەزدەسۋىندە ماقتاۋدان تاۋ تۇرعىزاتىن شەندىلەرگە: “قول سوعىپ قولپاشتاۋ مەن ماداق ايتۋدى توقتاتۋ كەرەك. ونىڭ ورنىنا ءار ۇيمەن، ءار اداممەن ماقساتتى تۇردە جۇمىس ىستەۋ قاجەت. جۇمىس ءار كوشەگە، ءار ادامنىڭ جەكە ومىرىنە اسەر ەتۋى ءتيىس” دەپ ارنايى مالىمدەمە جاسادى.

مۇنداي سوزدەردى ن.نازارباەۆ تا بىرنەشە رەت ايتقان بولاتىن. بىراق، وزدەرى ايتقانداي ومىردەن جاعىنۋدى جاقسىلاپ ۇيرەنگەن ءبىزدىڭ شەندىلەر ازىرگە ناتيجە شىعارار ەمەس.

ءتۇيىن.

شەندىلەردىڭ وسىنداي باستامالارى كەيدە حالىقتىڭ كوڭىلىن باسقا جاققا بۇرىپ، ەلدى ءبىر دۇرلىكتىرۋ ءۇشىن جاسالاتىنداي كورىنەدى. الايدا، بيلىككە دەگەن تالابى كۇن سايىن كۇشەيىپ كەلە جاتقان حالىققا بۇل دا وتپەيتىن ءادىس. سوندىقتان، شەندىلەر ارنارسەگە الاڭداماي، ناقتى جۇمىس ىستەسە دەيمىز. جانە، ءار  تاريحي تۇلعانىڭ شىنايى باعاسىن كەيىنگى ۇرپاق پەن تاريح قانا بەرەتىنىن دە ەسكەرۋ قاجەت-اق.

نۇربيكە بەكسۇلتانقىزى

Abai.kz