- ءۇش كۇننەن بەرى شەكارادان ءوتۋ ءۇشىن كەزەكتە تۇرمىز. التى كۇن، ءتىپتى ون كۇننەن بەرى وسىندا جاتقان جىگىتتەر بار. "قاپلانبەكتە" (شەكارا بەكەتى – رەد.) دە تولى. قازىر مۇندا تۇرعان جۇك كولىكتەرىنىڭ سانى جۇزدەن اسادى، - دەيدى جۇرگىزۋشى.

تۇركىستان وبلىستىق مەملەكەتتىك كىرىس دەپارتامەنتىنىڭ وكىلى مارات كۇلەكەەۆ "قازىعۇرت" كەدەن بەكەتىندەگى كولىكتەردىڭ شەكارادان باياۋ ءوتىپ جاتقانىن راستادى. ونىڭ ايتۋىنشا، قازاقستاننان وزبەكستان جاعىنا قاراي كۇنىنە ءجۇز شاقتى كولىك ءوتىپ جاتىر. 150-دەي كولىك كەزەكتە تۇر. ول كولىك كەپتەلىسىن وزبەك جاعىنداعى جول جوندەۋ جۇمىستارىمەن بايلانىستىرادى.

- ءبىر اپتادان استى. وزبەكستان اۋماعىندا جول جوندەۋ جۇمىستارى ءجۇرىپ جاتىر، - دەيدى ول.

مارات كۇلەكەەۆ وبلىس اۋماعىنداعى قازاق-وزبەك شەكارا بەكەتتەرىندە قانشا جۇك كولىگى كەزەكتە تۇرعانىن ماماندار انىقتاپ جاتقانىن ايتتى.

بۇعان دەيىن قازاقستان مەن قىرعىزستان اراسىنداعى "اق-تىلەك اۆتوجول" وتكىزۋ بەكەتىندە كولىك كەپتەلىسى پايدا بولىپ، قىرعىز جاقتاعى تاۋار تيەگەن كولىكتەردىڭ قازاقستان جاعىنا قاراي وتە الماي تۇرعانى بەلگىلى بولعان. قازىرگى كەزدە بۇل ماسەلەنى ەكى ەل بيلىگى تالقىلاپ جاتىر.

Abai.kz