مۇحتارباي وتەلباەۆ:
«بۇگىندە قازاق ءتىلى، اعىلشىن ءتىلى، تەحنولوگيا دەگەندى كوپ ايتامىز. راس، الەمدە تەحنولوگيا قارىشتاپ ءوسىپ كەتتى. مىسالى، كۇنى-ءتۇنى بايلانىستاعى مىنا قالتا تەلەفونىمىزدى دا قازاق ءتىلىنىڭ مۇددەسىنە قىزمەت ەتكىزە ءبىلۋىمىز كەرەك. قاءزىر ۇيالى تەلەفونمەن ءبىرىنشى ادام ءوز انا تىلىندە (اراب – ارابشا، نەمىس – نەمىسشە، اعىلشىن – اعىلشىنشا...) سويلەيدى، ال ناتيجەسىندە ءاربىر تىڭداۋشى (نەمەسە قابىل الۋشى، اڭگىمەلەسۋشى) ءوزىنىڭ تىلىندە ەركىن قابىلداي بەرەدى. بۇل - ۇيالى تەلەفون ءبىر تىلدەن ەكىنشى تىلگە وپ-وڭاي اۋدارا الادى دەگەن ءسوز.

جاقىن بولاشاقتا بارلىق حالىقتىڭ ادامىمەن سولاردىڭ «تىلىندە» سويلەسە بەرەتىن بولامىز. ياعني، سمارتفونداعى (تەلەفون ت.ب.) سوزدىك جانىمىزدى قينامايدى. الەمدە وسىنداي تەحنولوگيالىق توڭكەرىس ءجۇرىپ جاتقاندا، ءبىزدىڭ بالاباقشادان باستاپ «اعىلشىن ءتىلى!» دەپ جانىعۋىمىز مۇلدەم تەرىس بولىپ شىعادى.

«الدىمىزداعى 15-20 جىلدا «ءتىلماش تەلەفوندار» ەڭ جاقسى اۋدارماشىدان الدەقايدا ساپالى اۋدارا الاتىن بولادى» دەسەم، كۇماندانباڭىزدار. ەستەرىڭىزگە «شاحمات وينايتىن پروگراممانى» تۇسىرەيىن. قازىر كومپيۋتەردەن الەم چەمپيوندارى دا جەڭىلىپ ءجۇر. ال كەزىندە «كومپيۋتەر ەشقاشان چەمپيون ادامدى شاحماتتان جەڭە المايدى» دەيتىن ەدى اقىلگويلەر.

ءبىز قازاق ءتىلىن دامىتۋعا، قازاق ءتىلىن تەرەڭ بىلۋگە تىرىسۋدى قولداپ - قولپاشتاۋعا ءتيىسپىز. مىنا زاماندا ءبىر ءتىلدى تەرەڭ بىلە ءتۇسۋ – اسا قاجەت بازالىق دۇنيە.

شەتەلدە وقىپ كەلگەن جاپ-جاس ءبىلىم سالاسى باسشىلارى كوزىن جۇمىپ العانداي بىلمەي، ەل باسشىلىعىن «ءۇش ءتىل ءبىزدى ۇشپاققا شىعارادى» دەپ الداۋسىراتۋ – قاي جاعىنان دا قيسىنسىز، ءونىمىسىز، بولاشاعى جوق بىردەڭە (دۇرىس ەمەس نارسەنى «يدەيا» دەۋ دە كۇپىرلىك). ايتەۋىر قازاققا تەك قۇداي كومەكتەسىپ جاتادى. الگىدەي انا تىلىنە ەش زيان تيگىزبەيتىن، قايتا ونىڭ قولتىعىنان دەمەيتىن تەحنولوگيانىڭ قازاقستانعا جەتەتىن كۇنى دە الىس ەمەس.

جوعارى لاۋازىمدى مەملەكەتتىك قىزمەتكەرلەر وسى ماسەلەگە شۇعىل كوڭىل بولگەنى دۇرىس بولار ەدى».

بيجومارت قاپالبەكتىڭ facebook پاراقشاسىنان

Abai.kz