كەشە 9 ءساۋىر كۇنى مەملەكەت باسشىسى قاسىم-جومارت توقاەۆ كەزەكتەن تىس پرەزيدەنتتىك سايلاۋ وتەتىنىن مالىمدەدى. ءسويتىپ، 2020 جىلى ءوتۋى ءتيىس سايلاۋ بيىل 9 ماۋسىمعا بەلگىلەنىپ وتىر. مۇنى ەلىمىزدە ورىن الىپ جاتقان مەملەكەتتىك ماڭىزى بار ساياسي وقيعالاردىڭ جالعاسى دەپ ءبىلۋىمىز كەرەك. ناۋرىز ايىندا ەلىمىزدىڭ تۇڭعىش پرەزيدەنتى، قازاقستاننىڭ دامۋىنا وشپەس ۇلەس قوسقان ەلباسى نۇرسۇلان نازارباەۆ وكىلەتتىلىگىن توقتاتاتىنىن جاريالانعاننان باستاپ، ورىن العان ءاربىر ساياسي قادام ەلدىڭ ەرتەڭى ءۇشىن اسا ماڭىزدى بولىپ وتىر. 

قازاقستان رەسپۋبليكاسى – تاۋەلسىز ءھام دەموكراتيالىق مەملەكەت. بۇقارا ءوز پرەزيدەنتىن وسىعان دەيىن دە سايلاۋ ارقىلى تاڭداپ كەلدى.  دەسە دە، قازاقستان رەسپۋبليكاسىنىڭ تۇڭعىش پرەزيدەنتى ەلباسى نۇرسۇلتان ءابىشۇلى نازارباەۆپەن تەڭ كەلەر كانديدات بۇعان دەيىن بولعان ەمەس. قاي سايلاۋدا بولماسىن ەلباسى كەز-كەلگەن قارسىلاسىنان وق بويى وزىق تۇردى.

ەلباسى نۇرسۇلان نازارباەۆ وكىلەتتىلىگىن توقتاتقاننان كەيىن ءتۇرلى ساياسي توپتار الداعى سايلاۋعا دايىندىقتى باستاپ كەپ جىبەرگەنى بايقالدى. ولار، ارينە كەزەكتەن تىس سايلاۋ بولاتىنىن ءبىلدى. بىراق، ساياسي ساراپشىلار ءدال جازدىڭ ورتاسىندا، ياعني 9 ماۋسىمدا سايلاۋ وتەتىنىن بولجاي الماي قالدى. سەبەبى، ەلباسى قاتىسپايتىن سايلاۋدا كوپ داۋىس جيناۋعا اركىم-اق دامەلى. مۇنىڭ سىرتىندا 9 ءساۋىر كۇنگى مەملەكەت باسشىسى قاسىم-جومارت توقاەۆ كەزەكتەن تىس پرەزيدەنتتىك سايلاۋ وتكىزۋ تۋرالى مالىمدەمەسىندە الداعى پرەزيدەنت سايلاۋىنىڭ ءادىل، ءارى تازا وتكىزەتىنىنە ۋادە بەرۋى ەلدەگى ساياسي توپتاردىڭ بەلسەندىلىگىن ارتىرىپ وتىر.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پرەزيدەنت حالىقتىڭ تاڭداۋىمەن سايلاناتىنىن، قازاقستاننىڭ باسشىسى رەتىندە سايلاۋدىڭ اشىق، تازا، ءارى ءادىل وتۋىنە كەپىلدىك بەرەتىنىن ايتۋى جانە ء"ادىل سايلاۋ وتكىزۋ مەنىڭ بەرىك ۇستانىمىم" دەپ قاداپ ايتۋى بيلىكتىڭ دە الداعى سايلاۋعا تاس-ءتۇيىن دايىن ەكەنىن بىلدىرسە كەرەك.

راس، ماۋسىم ايىندا وتەتىن كەزەكتەن تىس پرەزيدەنتتىك سايلاۋ قازاقستان حالقىن ەلەڭ ەتكىزگەن ەلەۋلى وقيعا بولدى. بۇل سايلاۋدا الداعى بەس جىلدا قازاقستان حالقىن باستايتىن كوشباسشىنىڭ كىم ەكەنى ايقىندالادى. بۇل سايلاۋدا بيلىك ءترانزيتىنىڭ قالاي وتەتىنىن قوعام بولىپ باقىلايتىن بولامىز. بۇل سايلاۋدان كەيىن قازاقستان رەسپۋبليكاسىن جارقىن بولاشاققا باستايتىن كەزەكتى كوشباسشىسىنىڭ تاريحي شەشىمدەرىن ءوز كوزىمىزبەن كورەتىن بولامىز.  سوندىقتان دا بۇل وقيعاعا بۇكىل قازاقستاندىقتار ءجىتى نازار اۋدارىپ وتىر. ونىڭ سىرتىندا بۇرىنعىداي ەمەس، ساياساتتىڭ قىزۋى دا قاتتى كوتەرىلەتىنى انىق. ەكى مىڭىنشى جىلداردىڭ باسىنداعىداي ءتۇرلى ساياسي كوزقاراستار پايدا بولىپ، ءتۇرلى پىكىرتالاستار بولاتىنى بايقالادى.

بۇل ورايدا ەلدەگى ەڭ ماڭىزدى ساياسي وقيعانى ەڭ باستى ساياسي ۇيىم «Nur Otan» پارتياسىسىز ەلەستەتۋ مۇمكىن ەمەس. ەلباسىنىڭ ءوزى جەتەكشىلىك ەتەتىن بۇل پارتيا ءاربىر ساياسي وقيعالاردىڭ باسى-قاسىندا جۇرەدى. ونىڭ ۇستىنە «Nur Otan» پارتياسى جالپى حالىقتىق پارتيا. مۇشەلەرىنىڭ سانى الدەقاشان ميلليوننان اسىپ كەتكەن بۇل الىپ ۇيىمنىڭ ەل حالقىنىڭ ەرتەڭى ءۇشىن قولعا الىپ جاتقان جوبالارىن ايتىپ تاۋىسۋدىڭ ءوزى قيىن. سويتسە دە، بۇل سايلاۋ «Nur Otan» پارتياسىنىڭ زامانعا ساي جەتىلە ءتۇسۋى كەرەكتىگىن دە اڭعارتىپ وتىر.

ەلدىڭ بارىنە جاقسى تانىس «Nur Otan» پارتياسى جايلى ەجىكتەپ ءبارىن ءتۇسىندىرىپ، قايتا جازىپ وتىرۋىمىزدىڭ باستى سەبەبى، بىرىنشىدەن، ەل ءۇشىن ەڭبەك ەتىپ جۇرگەن ازاماتتاردىڭ يگى ءىسىن تاعى ءبىر مارتە ەسكە الا كەتۋ كەرەك. ەكىنشىدەن، «Nur Otan» پارتياسى ءوز اتىنان كىمدى پرەزيدەنتتىك كانديداتقا ۇسىنادى؟ بۇل سۇراق بۇكىل قازاق ساياساتىنىڭ تارازىسىنا اينالىپ وتىر. ۇشىنشىدەن، «Nur Otan»-نىڭ ۇسىنعان ادامى پرەزيدەنت بولۋ مۇمكىندىگى اناعۇرلىم جوعارى.

ەندى نەگىزگى تاقىرىپقا ورالايىق. باستا ايتقانىمىزداي، ماۋسىم ايىنىڭ توعىزىنشى جۇلدىزىندا كەزەكتەن تىس پرەزيدەنتتىك سايلاۋ وتەدى. بۇل ناقتى شەشىم. بۇل سايلاۋعا «Nur Otan» پارتياسى تاس-ءتۇيىن دايىن وتىر. بۇل تۋرالى پارتيانىڭ ورتالىق اپپاراتىندا وتكەن جيىنىندا توراعاسىنىڭ ءبىرىنشى ورىنباسارى ماۋلەن اشىمباەۆ مالىمەدى.

ماۋلەن اشىمباەۆتىڭ ايتۋىنشا، مەملەكەت باسشىسى كەزەكتەن تىس پرەزيدەنتتىك سايلاۋ وتكىزۋ تۋرالى شەشىمدى ءدال ۋاقىتىندا قابىلداپ وتىر. ويتكەنى، ءدال قازىر پرەزيدەنتتىك سايلاۋ وتكىزۋ وتە ىڭعايلى كەزەڭ تۋىپ وتىر. سول ءۇشىن ماۋلەن ساعاتحانۇلى مەملەكەت باسشىسىنىڭ بۇل باستاماسىن بۇكىل ەل بولىپ شىنايى قولداۋ كەرەك دەگەن پىكىردە.

ماۋلەن اشىمباەۆ ءوز سوزىندە، قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ كەزەكتەن تىس پرەزيدەنت سايلاۋىن وتكىزۋ تۋرالى شەشىمىن تولىعىمەن قولداۋىمىز كەرەك ەكەنىن ايتا كەلىپ، بۇل شەشىمنىڭ ەلدىڭ بىرلىگى مەن بەرەكەسىن نىعايتىپ، ەل بيلىگىنىڭ تۇراقتىلىعىن قامتاماسىز ەتۋ ءۇشىن قابىلدانىپ وتىرعانىن جەتكىزدى. شەشىم ءدار كەزىندە قابىلدانىپ وتىر. سوندىقتان دا «Nur Otan» پارتياسى سايلاۋ ناۋقانىنا تاس-ءتۇيىن دايىن بولاتىنىن ايتتى پارتيا توراعاسىنىڭ ورىنباسارى.

ماۋلەن اشىمباەۆ، «Nur Otan» پارتياسى توراعاسىنىڭ ءبىرىنشى ورىنباسارى

– «Nur Otan» پارتياسى الداعى 9 ماۋسىمدا وتەتىن سايلاۋ ناۋقانىنا تاس-ءتۇيىن دايىن. ءبىز بۇل سايلاۋدا ءوزىمىزدىڭ ۇيىمداستىرۋشىلىق، كادرلىق، ساياسي جانە اقپاراتتىق الەۋەتىمىزدى تولىق پايدالانىپ، زاڭ اياسىندا عانا جۇمىس ىستەيتىن بولامىز. سايلاۋ ەلىمىزدەگى تۇراقتىلىق پەن بىرلىكتىڭ ودان ءارى كۇشەيۋىنە وڭ اسەرىن تيگىزىپ، حالىقتى ەلباسىنىڭ ساياساتى اياسىندا جاڭا ماقساتتارعا جەتەلەيدى دەپ سەنەمىز.

سونداي-اق، وسى جينالىستا ماۋسىم ايىندا وتەتىن كەزەكتەن تىس پرەزيدەنتتىك سايلاۋعا بيلىك پارتياسىنىڭ اتىنان قاتىساتىن كانديداتتىڭ ەسىمى 23 ساۋىردە وتەتىن پارتيانىڭ كەزەكتەن تىس XIX سەزىندە بەلگىلى بولاتىنى ايتىلدى. پارتيا توراعاسى ورىنباسارىنىڭ ايتۋىنشا، ەلباسى نۇرسۇلتان ءابىشۇلى نازارباەۆ پارتيانىڭ كەزەكتەن تىس سەزىن شاقىرۋ تۋرالى قاۋلىعا قول قويعان.

ماۋلەن اشىمباەۆ، «Nur Otan» پارتياسى توراعاسىنىڭ ءبىرىنشى ورىنباسارى

– ەلىمىزدەگى جەتەكشى ساياسي پارتيا رەتىندە «Nur Otan» پرەزيدەنت سايلاۋىنا بەلسەندى تۇردە قاتىسادى. پارتيا توراعاسىنىڭ تاپسىرماسىنا سايكەس پارتيامىز سايلاۋعا قاتىسۋ ءۇشىن ءوز كانديداتىن ۇسىنادى. سوعان بايلانىستى بۇگىن نۇرسۇلتان ءابىشۇلى نازارباەۆ 2019 جىلدىڭ 23 ساۋىرىندە پارتيانىڭ كەزەكتەن تىس XIX سەزىن شاقىرۋ تۋرالى قاۋلىعا قول قويدى. سول سەزدە «Nur Otan» اتىنان سايلاۋعا قاتىساتىن كانديداتتىڭ ەسىمى بەلگىلى بولادى.

جيىن سوڭىنا قاراي پارتيا توراعاسى ورىنباسارى ماۋلەن اشىمباەۆ ەلدەگى ەڭ ءىرى ساياسي ناۋقانعا جان-جاقتى دايىندالۋ ءۇشىن اتقارىلار ىستەردى اتاپ ءوتتى. ءارى پارتيانىڭ ورتالىق اپپاراتى مەن بارلىق دەڭگەيدەگى فيليالدارىنا جانە باستاۋىش پارتيا ۇيىمدارىنا سايلاۋعا تىڭعىلىقتى دايىندالۋدى ەسكەرتىپ، ناقتى تاپسىرمالار بەردى.

Abai.kz