ءۇي جانۋارلارىنىڭ قاتىسۋىمەن بولعان جول كولىك وقيعالارىندا مال يەسى جاۋاپكەرشىلىككە تارتىلا ما؟
قازاقستان رەسپۋبليكاسى
باس پروكۋرورى
ع.د. نۇرداۋلەتوۆكە
قۇرمەتتى عيزات داۋرەنبەكۇلى!
مەملەكەتتىك قۇزىرەتتى ورگانداردىڭ رەسمي مالىمەتىنە سايكەس تەك 2017 جىل مەن 2018 جىلدىڭ 10 ايىندا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 615 جانە 620-باپتارىمەن ءۇي جانۋارلارىنىڭ قاتىسۋىمەن بولعان جول كولىك وقيعالارى بويىنشا 400 ادام، ياعني وسىنشاما مال يەلەرى اكىمشىلىك جاۋاپكەرشىلىككە تارتىلعان.
باس پروكۋراتۋرا ءبىزدىڭ اتىمىزعا جولداعان مالىمەتىندە (№ 2-010317-19-10476) «جول ءجۇرىسى تۋرالى» قازاقستان رەسپۋبليكاسىنىڭ زاڭىنىڭ جانە اكىمشىلىك قۇقىق بۇزۋشىلىق تۋرالى كودەكسىنىڭ نورمالارىنا سايكەس مال يەلەرى جول قوزعالىسىنىڭ قاتىسۋشىلارىنا جاتپايتىنى جانە ولاردىڭ اكىمشىلىك جاۋاپكەرشىلىك سۋبەكتىسى بولمايتىنى تۋرالى ناقتى كورسەتكەن.
ايتا كەتۋىمىز كەرەك، قاداعالاۋ ورگانىنىڭ مۇنداي شەشىمگە كەلۋىنە ولاردىڭ اتىنا ءماجىلىس دەپۋتاتتارىنىڭ ارنايى جازعان حاتى تۇرتكى بولدى. وندا ءبىز بىلتىر «Nur Otan» پارتياسىنىڭ اتىراۋ وبلىستىق فيليالىنىڭ ۇيىمداستىرۋىمەن بولعان قوعامدىق قابىلداۋدا جەرگىلىكتى ازاماتتاردىڭ جوعارىدا اتالعان دەرەكتەر بويىنشا جازىقسىز جاۋاپكەرشىلىككە تارتىلىپ جاتقاندىعى تۋرالى شاعىمدارىن بايانداي كەلە، اراشا بولۋدى وتىندىك.
قۇزىرلى ورگان ءوز جاۋابىندا دەپۋتاتتاردىڭ اتاپ كورسەتكەن ۋاجدەرىنىڭ بارلىعى ءوز دالەلدەرىن تاۋىپ، جوعارعى سوتقا نارازىلىق بەرىلىپ، سونىڭ ناتيجەسىندە اكىمشىلىك سوت پراكتيكاسى وزگەرىپ، ەندىگى كەزەكتە جول كولىك وقيعالارى بويىنشا مال يەلەرى كورسەتىلگەن باپپەن جاۋاپكەرشىلىككە تارتىلۋعا جاتپايتىندىعى باياندالعان.
الايدا، زاڭسىز جاۋاپكەرشىلىككە تارتىلعان قانشاما ازاماتتارىمىزدىڭ قۇقىعى تولىق قورعالماعان. ويتكەنى كاسساتسيالىق تارتىپپەن زاڭدى كۇشىنە ەنىپ كەتكەن سوت قاۋلىسىنىڭ زاڭدىلىعى مەن نەگىزدىلىگىن تەكسەرۋ تەك لاۋازىمدى تۇلعالاردىڭ ۇسىنىسىمەن نەمەسە نارازىلىعىمەن عانا جۇزەگە اسادى. ال جازىقسىز جاۋاپكەرشىلىككە تارتىلعان ازاماتتاردىڭ بارلىعى دەرلىك ءتيىستى ورگاندار مەن سوتتارعا شاعىمدانىپ، ادىلدىككە جەتە الماعان. اكىمشىلىك قۇقىق بۇزۋشىلىق تۋرالى كودەكستىڭ 765- بابىنىڭ تالابىنا سايكەس قۇقىق بۇزۋشىلىق تۋرالى حاتتاما دالەلدەمە بولىپ تابىلادى جانە دە ولار زاڭنىڭ تالابىنا ساي جيناقتالۋى قاجەت. ال اكىمشىلىك ءىس قارايتىن لاۋازىمدى تۇلعالارمەن سۋديالار ءىس قاراۋ بارىسىندا جيناقتالعان دالەلدەمەلەرگە قۇقىقتىق باعا بەرىپ، ەگەر ولار كودەكستىڭ تالابىنا ساي بولماعان جاعدايدا كۇشىن جويۋعا (765-بابتىڭ 3) تارماقشاسى جانە 8-بابىنىڭ 2-تارماعى) جانە زاڭدىلىقتى ساقتاۋعا مىندەتتى.
بىراق، بارلىق اكىمشىلىك ءىس بويىنشا ۋاكىلەتتى مەملەكەتتىك ورگانداردىڭ تولتىرعان زاڭسىز قۇقىق بۇزۋشىلىق تۋرالى حاتتامالارىنا لاۋازىمدى اداممەن نەمەسە سوتپەن ءىستى قاراۋ بارىسىندا قۇقىقتىق باعا ءبىر جاقتى، ءۇستۇرت بەرىلىپ، ولاردىڭ - دالەل رەتىندە كۇشى جويىلماعان.
ءاربىر زاڭسىز ۋاكىلەتتى ورگانمەن سوت قاۋلىلارىنىڭ ارتىندا قاراپايىم ازاماتتاردىڭ تاپتالعان قۇقىعى مەن قارجىلاي شىعىندارى تۇر، ولاردىڭ كوز جاسى مەن رەنىشى - سوت ادىلدىگىنە، جالپى بيلىككە دەگەن سەنىمىنىڭ جوعالۋىنا اكەلۋى مۇمكىن. وسى ورايدا شىعىستىڭ «ەگەر ەلدى، قوعامدى بۇلدىرگىڭ كەلسە، جازىقسىزداردى جازالاپ، ال كىنالىلەردى اقتاپ وتىر» دەگەن ناقىل سوزدەرى ويعا كەلەدى.
قۇرمەتتى عيزات داۋرەنبەكۇلى!
اتالعان ءمان-جايلار بويىنشا اكىمشىلىك قۇقىقتىق جانە سوت پراكتيكاسىن تاعى دا قوسىمشا زەردەلەپ، انىقتالعان زاڭ بۇزۋشىلىق بويىنشا ءتيىستى پروكۋرورلىق قاداعالاۋ اكتىلەرىن قابىلداپ، جوعارىدا اتالعان مەملەكەتتىك ورگاندار مەن سوت قاۋلىلارىن بۇزۋعا جانە دە سونىڭ ناتيجەسىمەن باسقا دا زاڭمەن كوزدەلگەن شارالاردى قاراستىرۋعا;
ناتيجەسى تۋرالى جاۋاپتى زاڭدا بەلگىلەنگەن مەرزىمدە جازباشا تۇردە بەرۋىڭىزدى سۇرايمىز.
قۇرمەتپەن،
«Nur Otan» پارتياسى
فراكتسياسىنىڭ مۇشەلەرى،
ءماجىلىس دەپۋتاتتارى
م. ماحامبەتوۆ
د. مىڭباي
س. قانىبەكوۆ
Abai.kz
