نۇر-سۇلتان قالاسىندا وتكەن «نۇر وتان» پارتياسىنىڭ ءحىح سەزىندە بيلىك پارتياسى اتىنان پرەزيدەنت سايلاۋىنا كىم قاتىساتىنى ايتىلدى. پارتيا توراعاسى نۇرسۇلتان نازارباەۆ «نۇر وتان» اتىنان قر پرەزيدەنتتىگىنە ۇمىتكەر رەتىندە قاسىم-جومارت توقاەۆتىڭ كانديداتۋراسىن ۇسىندى.

قازاقستاننىڭ ەكس-پرەزيدەنتى نۇرسۇلتان نازارباەۆ توقاەۆتى "تاجىريبەلى ساياساتكەر" دەپ باعالادى.

- مەنىڭ ساياساتىمدى قازاقستاندىقتاردىڭ باسىم بولىگى قولدايتىنىن بىلەمىن. بۇل ماعان سەنىم ۇيالاتادى. ادامدارعا تۇراقتىلىق كەرەك. قازاقستان پرەزيدەنتىمەن بىرلەسىپ ەلدى كۇشەيتۋ جولىندا جۇمىس ىستەيمىن, - دەدى ەلباسى.

پارتيا سەزىنىڭ جۇمىسىنا قر پرەزيدەنتى قاسىم-جومارت توقاەۆ، پارلامەنت پالاتالارىنىڭ توراعالارى داريعا نازارباەۆا مەن نۇرلان نىعماتۋلين،  پرەمەر-مينيستر اسقار مامين، ۇكىمەت مۇشەلەرى، دەپۋتاتتار، وبلىستاردىڭ، رەسپۋبليكالىق ماڭىزى بار قالالاردىڭ اكىمدەرى، ديپلوماتيالىق كورپۋس وكىلدەرى، وڭىرلەردەن كەلگەن 627 دەلەگات، جالپى 1500-دەن استام ادام قاتىسىپ وتىر.

قازاقستان پرەزيدەنتى قاسىم-جومارت توقاەۆ 9 ساۋىردە رەسپۋبليكالىق ارنالار ەفيرىنەن جاساعان مالىمدەمەسىندە قازاقستانداعى كەزەكتەن تىس پرەزيدەنت سايلاۋى 2019 جىلدىڭ 9 ماۋسىمىندا وتەتىن جاريالاعان.

قازاقستاندا كەزەكتەن تىس وتەتىن پرەزيدەنت سايلاۋىنا كانديداتتاردى ۇسىنۋ 10 ساۋىردە باستالعان. ۇمىتكەرلەردى ۇسىنۋ 28 ساۋىردە، تىركەۋ 11 مامىردا اياقتالادى.

Abai.kz