بۇگىن "اق جول" پارتياسى Nur-Sultan قالاسىندا سەز وتكىزىپ، الداعى پرەزيدەنت سايلاۋىنا تۇڭعىش ايەل كانديدات ءدانيا ەسپاەۆانى ۇسىندى. 

"اق جول" پارتياسىنىڭ سەزىنە ەكى جۇزدەن استام دەلەگات قاتىسقان. سولاردىڭ ىشىنەن التى كانديدات شىقتى. الايدا، بۇل تىزىمدە پارتيا توراعاسى ازات پەرۋاشەۆ بولعان جوق.

"اق جولدىڭ" اتىنان سايلاۋعا تۇسۋگە ۇمىتكەر بولعان التى كانديدات: وسكەمەن قالالىق ءماسليحاتىنىڭ دەپۋتاتى قۋات راحىمبەردين، تاراز قالالىق ءماسليحاتىنىڭ دەپۋتاتى اسان قوشمامبەتوۆ، اتىراۋ وبلىستىق فيليالىنىڭ وكىلى سەرىك ەرۋباەۆ، سكو فيليالىنىڭ توراعاسى ەۆگەني كينتسەل، قر پارلامەنت ءماجىلىسىنىڭ دەپۋتاتى دانيا ەسپاەۆا مەن قازاقستان قۇرىلىسشىلار وداعىنىڭ توراعاسى تالعات ەرعاليەۆ.

جابىق داۋىس بەرۋدە دانيا ەسپاەۆانى 94 دەلەگات قولدادى. ال ەكىنشى تۋر، اشىق داۋىس بەرۋدە ول 170 داۋىس جينادى. ءسويتىپ "اق جول" پارتياسىنىڭ اتىنان سايلاۋعا ەسپاەۆا ءدانيا ماديقىزى تۇسەتىن بولدى.

سونىمەن قاتار، سەزدە پارتيانىڭ سايلاۋالدى باعدارلاماسىنىڭ جەتى باعىتى قابىلداندى. جەتى باعىتتان تۇراتىن باعدارلاما جوباسىندا كاسىپكەرلىكتى قولداۋ، «الاش» ۇلتتىق يدەياسىن ناسيحاتتاۋ، ءبىلىم سالاسىن دامىتۋ، جۇمىسسىزدىقتى قىسقارتۋ، تۇرعىن ءۇي ماسەلەسى، دەموكراتيا مەن پارلامەنتاريزم جانە جەمقورلىقپەن كۇرەس سەكىلدى وزەكتى باعىتتار قامتىلعان.

ەسپاەۆا ءدانيا ماديقىزى 1961 جىلى 5 ناۋرىزدا دۇنيەگە كەلگەن. تۇرمىس قۇرعان، ەكى بالاسى بار.

الماتى ەسەپ-كرەديت تەحنيكۋمىن (1982), قازاق مەملەكەتتىك باسقارۋ اكادەمياسىن بىتىرگەن، الماتى ق-سى، (1993) (ماماندىعى "ەكونوميست").

اقتوبە وبلىستىق ءماسليحاتىنىڭ دەپۋتاتى، وتباسى جانە ايەلدەر ىستەرى جونىندەگى كوميسسيا مۇشەسى (08.2008, 2012-2016 قايتا سايلاندى), "اق جول" پارتياسى اتىنان پارلامەنت ءماجىلىسى دەپۋتاتتىعىنا كانديدات (05.02.2016), "اق جول" پارتياسىنان VI شاقىرىلىمداعى پارلامەنت ءماجىلىسىنىڭ دەپۋتاتى، قر پارلامەنت ءماجىلىسىنىڭ قارجى جانە بيۋدجەت جونىندەگى كوميتەتىنىڭ مۇشەسى (24.03.2016 باستاپ).

"قۇرمەت" وردەنى (2011); مەدالدارى: قر تاۋەلسىزدىگىنىڭ 20 جىلدىعى، "ۇزدىك قارجىگەر".

پرەزيدەنت سايلاۋىنا ۇمىتكەر ءدانيا ەسپاەۆا انا مەن بالا ماسەلەسىن كوتەرەتىنىن ايتىپ وتىر.

- مەن انا رەتىندە وسى پرەزيدەنتتىككە ۇمىتكەر بولامىن. سەبەبى،قازىر ەلىمىزدەگى ەڭ ماڭىزدى ماسەلە - الەۋمەتتىك جاعداي. ءبىرىنشى ماقساتىم - سونى شەشۋ.  ەكىنشىدەن، مەن قارجىگەرمىن. سوندىقتان ءبىزدىڭ باعدارلامامىزدا كوپتەگەن سۇراق قارجىعا بايلانىستى. ول سۇراقتاردى شەشۋ ءۇشىن قارجىگەر رەتىندە ءبىلىمىم جەتەدى. سوندىقتان، ءوز-وزىمە سەنەمىن. 

مۇمكىن وسى سايلاۋدا ايەل پرەزيدەنت بولمايتىن شىعار. ونى ۋاقىت كورسەتەر. بىراق، بىزدە ەلەكتوراتتىڭ باسىم كوپشىلىگى ايەلدەر. سوندىقتان، الداعى ۋاقىتتا ءبارى دە مۇمكىن، - دەدى ەسپاەۆا Abai.kz تىلشىسىنە بەرگەن سۇحباتىندا.

Abai.kz