بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى #NurOtanPikir ەركىن پىكىرتالاس الاڭىنىڭ كەزەكتى وتىرىسىندا ايتتى.

ءىس-شارا بارىسىندا «جاڭا الەمدەگى جاستار كەلبەتى» اتتى تاقىرىپ بويىنشا قاتىسۋشىلار ەلىمىزدەگى جاستار ساياساتى جايىندا ءسوز ءوربىتتى.

سونىمەن قاتار ساراپشىلار قازاقستاندىق جاستاردىڭ شەتەلگە كەتۋ ماسەلەسىن دە كوتەردى. بۇل جونىندە ماۋلەن اشىمباەۆ مۇنداي تاجىريبەنىڭ الەمدە كەڭىنەن تاراعانىن ايتتى.

– جاستاردىڭ شەتەلگە كەتۋى الەۋمەتتىك جەلىلەردە ءجيى تالقىلانىپ جۇرگەن وزەكتى ماسەلەلەردىڭ ءبىرى. بۇل ماسەلەنىڭ بىرنەشە دەڭگەيى بار. ەگەر جاس ازامات شەتەلگە ءبىلىمىن جەتىلدىرىپ، بىلىكتى مامان بولىپ قالىپتاسۋ ءۇشىن نەمەسە جاڭا كاسىپ باستاۋ ءۇشىن بارىپ، ول ويىن جۇزەگە اسىرىپ جاتسا، بۇل ءوزى ءۇشىن دە، ەلىمىز ءۇشىن دە پايدالى. ءبىز ءبىر شەڭبەرمەن شەكتەلمەۋىمىز كەرەك. اسىرەسە قاسىمىزدا قىتاي سياقتى، ار جاعىندا ءۇندىستان سياقتى الپاۋىت نارىقتار تۇرعان كەزدە سولاردى يگەرۋگە تالپىنۋىمىز كەرەك. ءبىز وسىلاي ءوز ءىسىمىزدى جاڭا بەلەسكە كوتەرۋدى ماقسات تۇتۋىمىز قاجەت. سول سەبەپتى شەتەلگە كەتىپ جاتقانداردىڭ بارىنە توسقاۋىل قويۋ كەرەك دەگەن بىرجاقتى پىكىرلەر دۇرىس ەمەس. ال ەگەر جاستارىمىز ەلىمىزدەگى جاعدايلارعا كوڭىلى تولماي، باسقا سەبەپتەرمەن كەتىپ جاتسا، ول باسقا اڭگىمە. ونداي كەزدە ءبىز زەرتتەپ، زەردەلەپ، سەبەپتەرىن انىقتاپ، ونى بولدىرماۋدىڭ جولدارىن قاراستىرۋىمىز كەرەك، – دەدى ماۋلەن اشىمباەۆ.

پىكىرتالاس الاڭىنىڭ وتىرىسىنا اقپارات جانە قوعامدىق دامۋ ۆيتسە-ءمينيسترى جۇلدىز وماربەكوۆا، بەلگىلى اقىن، قازاقستان جازۋشىلار وداعىنىڭ مۇشەسى، «Shalqar» راديوسىنىڭ ديرەكتورى قالقامان سارين، كاسىپكەر، ءىت تەحنولوگيالار سالاسىندا قىزمەت كورسەتەتىن STEM اكادەمياسىنىڭ نەگىزىن قالاۋشى ءابۋتالىپ ءمۇتالى، «Qazaqstan» ۇلتتىق تەلەارناسىنىڭ جۇرگىزۋشىسى ايگەرىم ەسەنالى، «Nur Otan» پارتياسى ءباسپاسوز قىزمەتىنىڭ باسشىسى ماكسيم سپوتكاي جانە «جاس وتان» جاستار قاناتىنىڭ اتقارۋشى حاتشىسى داۋلەت كارىبەك قاتىسىپ، كوتەرىلگەن تاقىرىپقا قاتىستى ءوز ويلارىن ءبىلدىردى.

داستۇرگە ساي وتىرىستى عالىم، حالىقارالىق تۇركى اكادەمياسىنىڭ پرەزيدەنتى، «Egemen Qazaqstan» رەسپۋبليكالىق گازەتى» اق-نىڭ باسقارما توراعاسى دارحان قىدىرالى جۇرگىزدى.

Abai.kz