بۇرىنعى. بىزدە ءبارى بۇرىنعىداي. سايلاۋ دەيسىز بە؟ ول دا بۇرىنعىداي. كانديداتتار دەيسىز بە؟ ولار دا بۇرىنعىلار... جۇرتتىڭ اۋزىنداعى ءسوز عوي بۇل. شىنىندا نەگە ءبارى بۇرىنعىلار؟ پرەزيدەنت بولماققا بەكىنگەن 8 ادام وسك-عا قۇجات تاپسىرىپ، ءتىل ەمتيحانىن تاپسىردى عوي. سول سەگىزدىكتىڭ ساياساتتاعى جۇرگىپ وتكەن جولىنا ءبىر كوز ءسۇزىپ شىعايىقشى...

قاسىم-جومارت توقاەۆ. بيلىكتەگى باس پارتيانىڭ توراعاسى باسشى بولۋعا لايىق دەپ تانىعان ادام. توقاەۆتىڭ دا ۇلكەن ساياساتتا جۇرگەنىنە وتىز جىلدان استى. جاڭا كادر، جاڭا ادام دەپ ايتا المايسىز.

توقاەۆ – بۇرىنعى كسرو دەيتىن قۇراما ەلدىڭ سىرتقى ىستەر مينيسترلىگىنىڭ بۇرىنعى قىزمەتكەرى. ول – قازاقستاننىڭ بۇرىنعى سىرتقى ىستەر ءمينيسترى. ول – قازاقستاننىڭ بۇرىنعى پرەمەر-ءمينيسترى. ول – قازاقستان سەناتىنىڭ بۇرىنعى توراعاسى. ول – بۇۇ باس  حاتشىسىنىڭ بۇرىنعى ورىنباسارى.

ءامىرجان قوسانوۆ. ول – بۇرىنعى جۋرناليست. ول – جاستار ءىسى جونىندەگى مەملەكەتتىك كوميتەتتىڭ بۇرىنعى باسشىسى. قوسانوۆ پرەمەر-ءمينيستردىڭ جانە ۇكىمەتتىڭ بۇرىنعى ءباسپاسوز حاتشىسى. ول – جسدپ-نىڭ بۇرىنعى باسشىلارىنىڭ ءبىرى.

دانيا ەسپاەۆا. تاۋەلسىزدىك تاريحىندا قازاقستان پرەزيدەنتتىگىنە ۇمىتكەر تۇڭعىش ايەل ادام. دەسە دە، ەسپاەۆا دا بۇرىنعى بانك قىزمەتكەرى. بۇرىنعى «بتا بانكتىڭ» اقتوبە وبلىستىق فيليالىنىڭ ديرەكتورى بولعان. بۇرىنعى ءماسليحات دەپۋتاتى.  بانك سالاسىندا 30 جىلدان استام ۋاقىت قىزمەت ەتكەن.

جامبىل احمەتبەكوۆ. پرەزيدەنتتىككە ەكىنشى رەت تۇسكەلى وتىر. ول – بۇرىن مادەنيەت، سوسىن سپورت-تۋريزم باسقارماسىن باسقارعان. ول – بۇرىن قورعالجىڭ اۋدانىندا بىرقاتار قىزمەتتەردى اتقارعان. ول – بۇرىنعى سايلاۋدىڭ بۇرىنعى ۇمىتكەرى بولدى. ول – بۇرىن نۇرسۇلتان نازارباەۆتان جەڭىلگەن.

تولەۋتاي راحىمبەكوۆ. ول – بۇرىنعى بيزنەسمەن. ساتباەۆ قالاسى اكىمىنىڭ، قاراعاندى وبلىسى اكىمىنىڭ بۇرىنعى ورىنباسارى. اۋىلشارۋاشىلىعى مينيسترلىگىنىڭ بۇرىنعى دەپارتامەنت باسشىسى. اتالعان مينيسترلىكتىڭ بۇرىنعى ۆيتسە-ءمينيسترى.

امانگەلدى تاسپيحوۆ. بۇرىنعى ءوندىرىس سالاسىنىڭ قىزمەتكەرى. قر ساۋدا جانە يندۋستريا مينيسترلىگىنىڭ بۇرىنعى قىزمەتكەرى. بۇرىنعى سەنات دەپۋتاتى. بۇرىنعى ءماجىلىس دەپۋتاتى.

سادىبەك تۇگەل. بۇرىنعى جۋرناليست. اقمولادا وبلىس اكىمىنىڭ ءباسپاسوز حاتشىسى بولعان. بۇرىن «مەنىڭ قازاقستانىم» قوزعالىسىن باسقارعان.

جۇماتاي اليەۆ. بۇرىنعى مۇعالىم. بۇرىن ورتالىق ازيا ۋنيۆەرسيتەتىن باسقارعان. بۇرىنعى ءماجىلىس دەپۋتاتى.

جاس كاتەگورياسىنا قاراي:

قاسىم-جومارت توقاەۆ – 65 جاستا;

ءامىرجان قوسانوۆ – 54 جاستا;

دانيا ەسپاەۆا – 58 جاستا;

جامبىل احمەتبەكوۆ – 58 جاستا;

تولەۋتاي راحىمبەكوۆ – 55 جاستا;

امانگەلدى تاسپيحوۆ – 60 جاستا;

سادىبەك تۇگەل – 64 جاستا;

جۇماتاي اليەۆ – 67 جاستا.

بۇل سەگىز كانديداتتىڭ تورتەۋىن پارتيالار ۇسىندى. ۇشەۋىن قوعامدىق ۇيىمدار، تاعى بىرەۋىن كاسىپوداقتار فەدەراتسياسى تاڭدادى.

مىنە، ماۋسىمدا وتەتىن پرەزيدەنت سايلاۋىنىڭ ۇمىتكەرلەرى وسى ازاماتتار. كانديداتتاردىڭ الدى جەتپىسكە تاياعاندار بولسا، سالىستىرمالى تۇردە ەڭ جاسى – ءامىرجان قوسانوۆ ەكەن. ونىڭ ءوزى 54 جاستا. سەگىز ۇمىتكەردىڭ ىشىندە جاسى ەلۋگە تولماعان بىردە-ءبىر ادام جوق. بۇل ءوز كەزەگىندە تاۋەلسىزدىك العان 28 جىلدىڭ ىشىندە ەڭ قۇرىعاندا پرەزيدەنتتىككە ۇمىتكەر بولۋعا لايىق ءبىر ادامدى تاربيەلەپ شىعارا الماعانىمىزدى كورسەتەدى.

بۇل ازاماتتاردىڭ بارلىعى دەرلىك جوعارىداعى بۇرىنعىلار دەگەن كاتەگوريانىڭ وكىلدەرى. بارلىعى دا بۇرىنعىلار. بۇرىنعى دەپۋتاتتار، بۇرىنعى اكىمدەر، بۇرىنعى ءباسپاسوز حاتشىلار... ال بۇگىنگىلەر قايدا؟

نۇرگەلدى ابدىعانيۇلى

Abai.kz