قر پرەزيدەنتتىگىنە كانديدات جۇماتاي اليەۆ مەملەكەتتىك ءتىلدى مەڭگەرمەگەن. مۇنداي قورىتىندىنى بۇگىن قر ورتالىق سايلاۋ كوميسسياسى جانىنان قۇرىلعان قر پرەزيدەنتتىگىنە كانديداتتىڭ مەملەكەتتىك ءتىلدى مەڭگەرۋ دەڭگەيىن انىقتايتىن لينگۆيستيكالىق كوميسسيا شىعاردى.

«بۇگىن «حالىق دەموگرافياسى» قوعامدىق بىرلەستىگىنەن پرەزيدەنتتىككە ۇمىتكەر رەتىندە ۇسىنىلعان جۇماتاي اليەۆ ەمتيحانعا بەرىلگەن ۋاقىتىن تولىق پايدالاندى. كوميسسيا بارلىق كەزەڭدەردى جان-جاقتى تالقىلادى»، - دەدى ۇمىتكەردىڭ ەمتيحان ناتيجەسىن جاريا ەتكەن لينگۆيستيكالىق كوميسسيا مۇشەسى ءادىل احمەتوۆ.

ونىڭ ايتۋىنشا، ۇمىتكەر ءبىرىنشى كەزەڭدە «مەملەكەت جانە ءدىن» دەگەن تاقىرىبىندا شىعارما جازعان. 1,5 ساعات وتىرعانىمەن، تاقىرىپتى مۇلدە اشا الماعان.

«تاقىرىپ مۇلدەم اشىلماعان، سويلەمدەرىنىڭ بارلىعى جۇيەسىز. ءدىن ماسەلەسى دە مۇلدەم اشىلمادى دەۋگە بولادى، ءۇستىرت. ەكىنشى كەزەڭدە مۇحتار اۋەزوۆتىڭ «اباي جولى» رومانىنىڭ 2-تومىنان ءۇزىندى وقىدى. م.اۋەزوۆتىڭ سوزدەرى «قىزدىڭ جيعان جۇگىندەي» عوي. ءماتىننىڭ ءوز «اۋەزى بار. بۇل جەردە دە ءوزىنىڭ شورقاقتىعىن بايقاتتى. ءۇشىنشى كەزەڭدە «ىرىس الدى - ىنتىماق» تاقىرىبىندا بايانداما جاسادى. «ىرىس الدى - ىنتىماق» تاقىرىبى مۇلدەم اشىلمادى. تاعى دا ءۇستىرت بولدى. ساۋاتسىز بولدى. ماسەلەن، ءبىرىنشى كەزەڭدەگى شىعارمادا باس-اياعى 13 سويلەمدە 19 قاتە. وزدەرىڭىزگە بەلگىلى 8 دەن اسسا ول شىعارما تەرىس باعالانادى. سوندىقتان پرەزيدەنتتىككە ۇمىتكەر جۇماتاي اليەۆ مەملەكەتتىك ءتىلدى ەركىن مەڭگەرمەگەن دەگەن كوميسسيا قورىتىندىسى شىقتى»، - دەدى ول.

ايتا كەتەيىك، جۇماتاي اليەۆ مەملەكەتتىك تىلدەگى ەمتيحاننان سۇرىنگەن العاشقى ۇمىتكەر. بۇعان دەيىن كانديداتتاردىڭ بارلىعى بۇل سىناقتان وتكەن بولاتىن.

دەرەككوز: قازاقپارات

Abai.kz