ەلىمىزدە “Nur-Otan” پارتياسىنىڭ باستاماسىمەن «حالىققا كومەك» جوباسى باستالعانى بەلگىلى. بۇل جوبا اياسىندا «Nur Otan» پارتياسىنىڭ قوعامدىق قابىلداۋ بولمەلەرى بىرىڭعاي الەۋمەتتىك تەرەزە جۇيەسى بويىنشا قىزمەت كورسەتە باستادى. سوعان وراي كەشە اقتوبە وبلىسىنا بارعان پارتيا توراعاسىنىڭ ءبىرىنشى ورىنباسارى ماۋلەن اشىمباەۆ پارتيانىڭ ايماقتىق فيليالىنىڭ قوعامدىق قابىلداۋ بولمەسىندە بولىپ، جاڭا جۇيەنىڭ جۇمىسىمەن تانىستى.

ساپار بارىسىندا ماۋلەن اشىمباەۆ اقتوبە وبلىسىنىڭ اكىمى وڭداسىن ورازالينمەن بىرگە «باقىتتى وتباسى» جوباسى اياسىندا از قامتىلعان وتباسىلارعا پاتەر كىلتىن تاپسىرۋ راسىمىنە قاتىستى. سونىڭ ناتيجەسىندە كوپ بالالى وتباسى، جاس وتباسى، اتا-انا قامقورلىعىنسىز قالعاندار جانە مۇمكىندىگى شەكتەۋلى جاندار باسپانالى بولدى.
ولاردى قۋانىشتى ساتپەن قۇتتىقتاعان پارتيا توراعاسىنىڭ ءبىرىنشى ورىنباسارى بۇل ەلباسى ساياساتىنىڭ ناتيجەسى ەكەنىنە نازار اۋداردى.

– حالىقتىڭ ءال-اۋقاتىن ودان ءارى ارتتىرۋ ەلباسى ساياساتىنىڭ نەگىزگى باسىمدىعى بولىپ تابىلادى. سونىڭ ىشىندە باسپانامەن قامتۋدىڭ ماڭىزى زور. وسى تۇرعىدان كەلگەندە، ەلباسىنىڭ تىكەلەي تاپسىرماسىمەن ايتارلىقتاي جۇمىستار اتقارىلىپ، ۇلكەن ناتيجەلەرگە قول جەتكىزىپ جاتىرمىز، – دەدى ماۋلەن ساحاتحانۇلى.

ايتا كەتەيىك، بۇگىندە ەلباسى نۇرسۇلتان نازارباەۆتىڭ تىكەلەي تاپسىرماسىمەن Nur-Otan پارتياسى «حالىققا كومەك» جوباسىن قولعا الىنىپ وتىر. جوبانىڭ باستى ماقساتى - مەملەكەت تاراپىنان كورسەتىلەتىن بارلىق الەۋمەتتىك كومەكتى بىرىڭعاي الەۋمەتتىك تەرەزە ارقىلى ءبىر جەردەن ءارى جەدەل تۇردە حالىققا جەتكىزۋ. “Nur-Otan”  پارتياسى بۇل ىسكە مەملەكەتتىك ورگانداردى، ۇكىمەتتىك ەمەس ۇيىمداردى جانە بيزنەس قاۋىمداستىقتى دا جۇمىلدىرىپ، ولاردىڭ قىزمەتتەرىن ۇيلەستىرۋشى ءرولىن اتقاراتىن بولادى.

ال، Nur Otan پارتياسىنىڭ XVIII سەزىنەن كەيىن جەرگىلىكتى قوعامدىق قابىلداۋ بولمەلەرىنە 3 مىڭعا جۋىق ازامات حابارلاسقان. پارتيا ولاردىڭ تەڭ جارىمىنا كومەك كورسەتىپ ۇلگەرگەن. ازاماتتار نەگىزىنەن باسپانا ماسەلەسى مەن ەڭبەك داۋى بويىنشا جانە مۇمكىندىگى شەكتەۋلى بالالارعا قولداۋ كورسەتۋگە مۇددەلى ەكەنى انىقتالعان.

كەزدەسۋ بارىسىندا اقتوبە وبلىسىنىڭ اكىمى وڭداسىن ورازالين «Nur Otan» پارتياسىنىڭ كەزەكتى XVIII سەزىندە پارتيا توراعاسى ءنۇرسۇلتان نازارباەۆتىڭ  كونتسەپتۋالدى بايانداما جاساعانىنا نازار اۋدارىپ، ەلباسىنىڭ اتالعان سەزدەگى ءسوزى، وتكەن جىلدىڭ قازان ايىنداعى قازاقستان حالقىنا ارناعان جولداۋى جانە بەس الەۋمەتتىك باستاماسى ەلىمىزدىڭ قازىرگى تاڭداعى جاڭا الەۋمەتتىك دوكتريناسىنىڭ نەگىزىن قالاپ بەرگەنىن اتاپ ءوتتى.

Abai.kz