دانيا ەسپاەۆا قالالار اۋماعىنا قوسىلعان ەلدى مەكەندەر مەن اۋىلداردا شاعىن جانە ورتا بيزنەسكە نەسيە بەرۋ تالاپتارىن قايتا قاراۋعا قول جەتكىزدى. ۇلتتىق ەكونوميكا مينيسترلىگى «اۋىل شارۋاشىلىعىن قارجىلاي قولداۋ قورى» ارقىلى وسى اۋماقتاردىڭ تۇرعىندارىنا نەسيە بەرۋدى قايتارۋعا مۇمكىندىك بار دەپ سانايدى.

ەسكە سالا كەتەيىك، وسى جىلدىڭ 3 ساۋىرىندە دەپۋتات ەسپاەۆا قالالار اۋماقتارىنا بىرىكتىرىلگەن شاعىن قالالار مەن اۋىلداردىڭ كاسىپكەرلەرىن قورعاپ ءسوز سويلەگەن بولاتىن. اۋىلدىق جەرلەردەگى ميكرونەسيەلەندىرۋدى «قازاگرو» حولدينگىنىڭ ەنشىلەس كومپانياسى – ءونىمدى جۇمىسپەن قامتۋ جانە بۇقارالىق كاسىپكەرلىكتىڭ اعىمداعى باعدارلاماسى اياسىندا بەرىلەتىن بارلىق قاراجاتتىڭ 65% -ىن قۇرايتىن «ەڭبەك» اۋىل شارۋاشىلىعىن قارجىلاي قولداۋ قورى قامتاماسىز ەتەدى. الايدا، اتالمىش وپەراتورعا تيەسىلى باعدارلامانىڭ ىشكى تالاپتارى مونو/شاعىن قالالار مەن قالانىڭ اۋماعىنا كىرەتىن اۋىلدىق ەلدى مەكەندەردى قارجىلاندىرۋعا مۇمكىندىك بەرمەيدى.

«ناتيجەسىندە، مەملەكەتتىك قولداۋ شارالارى اۋىل شارۋاشىلىعىمەن اينالىسقىسى كەلەتىن، بىراق مونو / شاعىن قالالاردا، سونداي-اق قالانىڭ بولىگى بولىپ تابىلاتىن اۋىلدىق وكرۋگتەردە ءومىر سۇرەتىن  نەسيە الۋشىلارعا قولجەتىمسىز بولدى»، - دەپ ايتىلعان جولدانعان دەپۋتاتتىق ساۋالدا.

ەسپاەۆا اۋىلدىق جەرلەردى قالا اۋماعىنا كىرىكتىرۋ مەرزىمدى ىسكە اسىرىلىپ تۇرادى دەپ اتاپ ءوتتى. جاقىندا عانا تۇركىستان وبلىسىندا 12 اۋىلدىق وكرۋگ كەنتاۋ قالاسىنىڭ قۇرامىنا ەنگىزىلدى. بۇدان بۇرىن شىمكەنت قالاسىنا بىرنەشە اۋىلدار قوسىلدى، قالانى كەڭەيتۋ ءۇردىسى باسقا وڭىرلەردە دە بەلسەندى جۇرۋدە. بىراق ولاردىڭ تۇرعىندارىنىڭ قىزمەتى مەن تابىس كوزى وزگەرگەن جوق جانە ولاردىڭ ءبارى نەسيە الۋدا قيىندىقتارعا تاپ بولۋدا.

دانيا ەسپاەۆا كوتەرگەن بۇل وزەكتى ماسەلە وڭىنان شەشىلگەنى بۇگىن بەلگىلى بولدى.

«اۋىلدىق ەلدى مەكەندەردەگى كاسىپكەرلەر ءۇشىن ولاردىڭ اكىمشىلىك ورنالاسقان جەرىنە قاراماي «اۋىل شارۋاشىلىعىن قارجىلاي قولداۋ قورى»، ميكروقارجىلاندىرۋ ۇيىمدارى جانە نەسيەلەندىرۋ سەرىكتەستىكتەرى ارقىلى ميكرونەسيەلەندىرۋدى جۇرگىزۋگە مۇمكىندىك بار دەپ سانايمىز»، - دەلىنگەن بۇگىن كەلىپ تۇسكەن ۇلتتىق ەكونوميكا مينيسترلىگىنىڭ بەرگەن رەسمي جاۋابىندا.

«اق جول» پارتياسى بۇل شەشىم اۋىلداعى بيزنەستى دامىتۋعا ەلەۋلى قولداۋ ەكەنىنە جانە دە جۇزدەگەن جۇمىس ىستەپ تۇرعان كاسىپكەرلىك سۋبەكتىلەرى مەن جۇمىس ورىندارىن ءارى قاراي ساقتاپ قالۋعا مۇمكىندىك بەرەتىنىنە سەنىمدى.

«اق جول» قدپ جانە ونىڭ پارلامەنتتىك فراكتسياسى سايلاۋالدى باعدارلامانى جۇزەگە اسىرۋ جانە وتاندىق بيزنەستىڭ مۇددەسىن قورعاۋ بويىنشا جۇمىستاردى جالعاستىرۋدا.

Abai.kz