مەملەكەت باسشىسى مامۋكا باحتادزەنى الداعى گرۋزيانىڭ تاۋەلسىزدىگى كۇنىمەن قۇتتىقتاپ، دوستاس گرۋزين حالقىنا جاقسىلىق پەن باق-بەرەكە تىلەدى، دەپ جازادى اقوردانىڭ رەسمي سايتى.

قاسىم-جومارت توقاەۆ ەكىجاقتى ىنتىماقتاستىقتىڭ باستاۋىندا تۇڭعىش-پرەزيدەنت – ەلباسى نۇرسۇلتان نازارباەۆ تۇرعانىن اتاپ ءوتىپ، ديپلوماتيالىق قاتىناستاردى ورناتقاننان باستاپ ونى دامىتۋعا ءوزى تىكەلەي اتسالىسقانىن ايتتى.

– تۇڭعىش پرەزيدەنتىمىز – ەلباسىنىڭ گرۋزياعا، سىزدەردىڭ باسشىلارىڭىزدىڭ قازاقستانعا جاساعان ساپارلارى ەسىمدە. ەكى ەل اراسىنداعى ىنتىماقتاستىقتىڭ جاقسى دامىپ كەلە جاتقانىن ناقتى ايتا الامىز، – دەدى قازاقستان پرەزيدەنتى.

مەملەكەت باسشىسى قازاقستاننىڭ گرۋزيا ەكونوميكاسىنداعى نەگىزگى ينۆەستورلاردىڭ ءبىرى ەكەنىن اتاپ ءوتتى. بۇگىنگە دەيىنگى سالىنعان ينۆەستيتسيانىڭ جالپى كولەمى 450 ميلليون دوللاردان اسقان.

– ءبىز گرۋزيانى دوستاس مەملەكەت دەپ سانايمىز. ارامىزدا ەشقانداي شەشىلمەگەن ماسەلە جوق. ءبىزدىڭ دەلەگاتسيالارىمىز حالىقارالىق ۇيىمداردا ءوزارا بەلسەندى ىنتىماقتاستىقتا جۇمىس ىستەيدى. قازاقستاندا 60 مىڭعا جۋىق گرۋزين دياسپوراسى بار. ولار ەلىمىزدىڭ تىنىس-تىرشىلىگىنە وتە بەلسەندى ءارى كونسترۋكتيۆتى تۇردە اتسالىسادى. ءسىزدىڭ بۇل ساپارىڭىز مەملەكەتتەرىمىز اراسىنداعى ىنتىماقتاستىقتىڭ ودان ءارى نىعايۋىنا تىڭ سەرپىن بەرەدى دەپ سانايمىن، – دەدى قاسىم-جومارت توقاەۆ.

گرۋزيا ۇكىمەتىنىڭ باسشىسى قازاقستان تاراپىنىڭ ءداستۇرلى تۇردە جىلى قابىلداعانىن اتاپ ءوتىپ، گرۋزيانىڭ ەگەمەندىگى مەن اۋماقتىق تۇتاستىعىنا قاتىستى تۇراقتى ۇستانىمى جانە حالىقارالىق دەڭگەيدە قولداۋ كورسەتكەنى ءۇشىن پرەزيدەنتكە جانە قازاقستان حالقىنا ەرەكشە ريزاشىلىق ءبىلدىردى.

– ماعان قازاقستانعا جۇمىس بابىمەن بىرنەشە رەت كەلۋدىڭ ءساتى ءتۇستى. حالىقتارىمىزدى كوپعاسىرلىق دوستىقتىڭ ارقاۋى بايلانىستىرادى. ءبىز مۇنى ماقتان تۇتامىز. قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ قارىم-قاتىناستارىمىزدى نىعايتۋعا قوسقان تاريحي ءرولى مەن ولشەۋسىز ۇلەسىن اتاپ وتكىم كەلەدى، – دەدى م.باحتادزە.

كەزدەسۋ بارىسىندا ساۋدا-ەكونوميكالىق، گۋمانيتارلىق، تۋريزم جانە ينۆەستيتسيا سالالارىنداعى ىنتىماقتاستىقتىڭ پەرسپەكتيۆالارى قاراستىرىلدى. سونداي-اق، تاراپتار كولىك-ترانزيتتىك، سونىڭ ىشىندە ترانسكاسپي حالىقارالىق كولىك باعدارى اياسىندا اقتاۋ جانە قۇرىق پورتتارى ارقىلى قاتىناستاردى جانداندىرۋ مۇمكىندىكتەرىن تالقىلادى.

Abai.kz