ءتىل ءۇشىن كۇرەس كۇشەيدى. جەر-جەردەن قازاق تىلىنە جاسالعان قياناتتى ۆيدەوعا ءتۇسىرىپ، زاڭ اياسىندا شارا قابىلداۋىن تالاپ ەتكەن جاندار كوبەيۋدە. الەۋمەتتىك ماسەلە تاعى قازاقتى بىرىكتىردى. ويتكەنى الەۋمەتتىك جاعدايى ناشارلاردىڭ كوبى، ءوز ەلىندە تۇرسا دا قازاقتار.

"قازاقتار ەل بولمايدى، ولاردىڭ باسى بىرىكپەيدى" دەگەن زىميان ۇراندى قازاققا جانى قاستار كۇن سايىن تاستاپ جاتىر. قازاقتار بىرىككەن سايىن بۇل ۇران دا ارتا بەرەدى. ويتكەنى كەيبىرەۋلەر كوكبورىنىڭ تاۋەلسىز، ازات ءارى قۋاتتى بولۋىنان سەسكەنەدى. بىراق ولار ءبىر دۇنيەنى تۇسىنبەيدى. قازاق بىرىگىپ قويعان! ەندى ول ءۇردىس تەك كۇشەيە بەرمەك.

جەر ماسەلەسى، ءتىل ءۇشىن كۇرەس، قىتايداعى قازاقتار، قاراعاندى قازاقتارىنىڭ ويانۋى جانە ت.ب. سونىڭ اشىق كورىنىسى. ەندى مىنە ساياسي ناۋقان. 9 ماۋسىمدا بارىپ تاڭداۋ جاسايمىز. كىمگە جاسايتىنىڭىز ءوز ەركىڭىزدە، تەك بارىڭىز. ازاماتتىق قوعامنىڭ الاش ەلىندە باستالعانىن وزگەلەرگە كورسەتىڭىز.

مەن ءۇشىن "قازاقستاندىق قوعام" دەگەن جوق. مەن ءۇشىن "قازاق قوعامى" دەگەن عانا بار. "قازاقستاندىق قوعام" قازاقى قۇندىلىقتار ءۇشىن كۇرەسپەيدى. وندا تەك "130 ۇلت" دەگەن ۇران عانا بار. "قازاقستاندىق قوعام" قازاقتىڭ جانىن تۇسىنە المايدى. ال "قازاق قوعامى" جەر، ءتىل، ۇلتتىق قۇندىلىق، الاش يدەياسى ءۇشىن كۇن سايىن زاڭ اياسىندا كۇرەس جۇرگىزىپ كەلەدى. بۇل كۇرەستى جەڭىسكە جەتكەنگە دەيىن جۇرگىزەتىن بولادى.

ءبىزدىڭ سانىمىز ارتىپ كەلەدى. جىل سايىنعى بالا تۋدىڭ 85-90% قازاقتارعا تيەسىلى. ەندى 10 جىل ءبىز مونوۇلتتى ەلگە اينالامىز. دەمەك، قازاقستانداعى بارلىق ساياسي ماسەلەنى تەك قازاقتار شەشەتىن بولادى دەگەن ءسوز. بۇل تابيعي زاڭدىلىق.

ءبىزدى رۋعا، دىنگە، ۇستانىم مەن ايماققا، ساياسي كوزقاراسقا بولەتىندەر كوبەيە بەرمەك. بىراق ءبىز بولىنبەيمىز. ويتكەنى ءبىزدى بىرىكتىرۋشى ءبىر قۇندىلىق بار. ول - قازاق جەرى، وتكەن ورتاق تاريح جانە بارلىعىمىزدى بىرىكتىرىپ، ءبىر اتاۋمەن اتايتىن قازاق ۇلتى!

اسحات قاسەنعاليدىڭ facebook پاراقشاسىنان

Abai.kz